Azərbaycanın ərazi bütövlüyünə və suverenliyinə tam dəstək ifadə edilir

Bakı:

23 °C

56 %

9 m/s

Əlaqə

AZ RU EN

Ana səhifə / Siyasət / Azərbaycanın ərazi bütövlüyünə və suverenliyinə tam dəstək ifadə edilir

Azərbaycanın ərazi bütövlüyünə və suverenliyinə tam dəstək ifadə edilir

28.07.2020 [09:03]

Regional və beynəlxalq təşkilatlar tərəfindən qəbul edilmiş sənədlərdə BMT Təhlükəsizlik Şurasının müvafiq qətnamələrinin icra olunmasının, ölkəmizin ərazi bütövlüyünün bərpasının zəruriliyi vurğulanır
Məlum olduğu kimi, Ermənistan-Azərbaycan Dağlıq Qarabağ münaqişəsinin beynəlxalq hüquq normaları əsasında həlli Azərbaycan Respublikası üçün prioritet təşkil edir. Ölkəmiz bu istiqamətdə qətiyyətli mövqe sərgiləyir: münaqişə Azərbaycanın ərazi bütövlüyü çərçivəsində və BMT Təhlükəsizlik Şurasının müvafiq qətnamələri əsasında öz həllini tapmalıdır. Bütün bunlara baxmayaraq, Ermənistan hakimiyyəti danışıqlar prosesini pozmağa hesablanmış addımlar atır, mütəmadi olaraq atəşkəs rejimini pozmaqla təxribatlar törətməyə cəhd edir. Bu baxımdan, iyulun 12-dən başlayaraq Ermənistan silahlı qüvvələrinin Azərbaycan-Ermənistan dövlət sərhədinin Tovuz rayonu istiqamətində təxribat törətməsi, həmçinin işğalçı dövlətin pandemiya şəraitində də təxribatçı fəaliyyətini davam etdirməsi yolverilməz hesab olunaraq beynəlxalq səviyyədə ciddi tənqid olunub. Bu baxımdan, Nizami Gəncəvi Beynəlxalq Mərkəzinin həmsədrləri və İdarə Heyətinin üzvlərinin yaydıqları “Dağlıq Qarabağa sülh və ədalət” adlı bəyanat da mühüm əhəmiyyət daşıyır. Bəyanatda Azərbaycan Respublikasının beynəlxalq ictimaiyyət və Birləşmiş Millətlər Təşkilatı tərəfindən tanınmış sərhədləri çərçivəsində ərazi bütövlüyü və suverenliyinə tam dəstək ifadə edilib, həmçinin Ermənistanın təxribat cəhdləri, Azərbaycan vətəndaşlarının və mülki obyektlərinin hədəfə alınması qətiyyətlə pislənib: “Azərbaycan güclü beynəlxalq qanuni dəstək alıb: BMT Təhlükəsizlik Şurası Ermənistan qoşunlarının işğal olunmuş ərazilərdən qeyd-şərtsiz çıxarılmasını tələb edən dörd qətnamə qəbul edib. Beynəlxalq ictimaiyyət ərazinin müharibə yolu ilə ələ keçirilməsini tanımadığını bir daha təsdiqləyib. Qanunsuz yolla gücün tətbiqi heç bir şəkildə əsaslandırıla bilməz. Biz Ermənistan və Azərbaycan sərhədi boyunca Azərbaycan vətəndaşlarının və mülki obyektlərinin hədəfə alınmasını qətiyyətlə pisləyirik. Qanunsuz fəaliyyətlər, eləcə də Azərbaycanın işğal edilmiş ərazilərində qanunsuz məskunlaşdırılma dayandırılmalıdır”, - deyə qeyd edilib.
Məsələyə münasibət bildirən Milli Məclisin üzvü Nizami Cəfərov deyib ki, son vaxtlar müxtəlif dövlətlər, beynəlxalq təşkilatlar və təsisatlar tərəfindən səsləndirilən bəyanatlar, qəbul edilmiş sənədlər Azərbaycanın haqlı və ədalətli mövqeyinin dəstəklənməsinin bariz nümunəsidir: “Nizami Gəncəvi Beynəlxalq Mərkəzinin bəyanatında da Azərbaycanın beynəlxalq ictimaiyyət və BMT tərəfindən tanınmış sərhədləri çərçivəsində ərazi bütövlüyünün və suverenliyinin tam dəstəklənməsi mühüm hadisədir. Bəyanatda BMT Təhlükəsizlik Şurasının Ermənistan qoşunlarının işğal olunmuş ərazilərdən qeyd-şərtsiz çıxarılmasını tələb edən dörd qətnaməsinin icrasının zəruriliyindən bəhs olunur. Ən mühüm məqamlardan biri odur ki, dünyanın məşhur ictimai-siyasi xadimləri Ermənistan-Azərbaycan sərhədindəki son təxribatı, Azərbaycan vətəndaşlarının və mülki obyektlərinin hədəfə alınmasını qətiyyətlə pisləyirlər”.
N.Cəfərovun sözlərinə görə, bəhs olunan sənəddə işğal faktının dəfələrlə qeyd olunması ilə yanaşı, Azərbaycanın işğal edilmiş ərazilərində qanunsuz məskunlaşdırılmanın dayandırılması tələbinin yer alması xüsusi önəm kəsb edir: “Əlbəttə, qeyri-qanuni məskunlaşdırılma dayandırılmalı, beynəlxalq ictimaiyyət tərəfindən Ermənistana qarşı təzyiqlər artırılmalı, təcavüzkar ölkənin işğalçılıq siyasəti ardıcıl olaraq kəskin şəkildə pislənilməlidir”.
Milli Məclisin deputatı Ramin Məmmədov isə deyib ki, dövlət başçısı İlham Əliyevin qətiyyətli siyasətinin nəticəsi kimi, beynəlxalq ictimaiyyətin Azərbaycanın Dağlıq Qarabağ münaqişəsinin həlli ilə əlaqədar ədalətli mövqeyini dəstəkləməsi strateji önəm kəsb edir: “Nizami Gəncəvi Mərkəzinin bəyanatı nüfuzlu beynəlxalq təşkilatların və dövlətlərin rəhbərləri olmuş şəxslərin imzası ilə yayımlanıb və bu, indiki məqamda mühüm önəm kəsb edir. Mərkəzin rəhbərləri xüsusi olaraq vurğulayırlar ki, münaqişənin həlli üçün bütün mümkün diplomatik kanalları fəallaşdırmağın vaxtıdır”.
R.Məmmədov deyib ki, dünyanın nüfuzlu ictimai-siyasi xadimlərinin Azərbaycanın ərazi bütövlüyünün bərpası ilə bağlı çağırışlar etmələri böyük əhəmiyyətə malikdir: “Bəyanatda, həmçinin ATƏT-in Minsk qrupunun həmsədrləri olan Rusiya, Fransa və ABŞ-ın vasitəçilik etdikləri danışıqlar prosesinin münaqişənin həll olunması üçün heç bir real nəticə vermədiyi qeyd edilir. Davamlı sülhə nail olmaq istiqamətində məqsədyönlü danışıqlar aparılmasını təmin etmək üçün həmsədrlər öz səylərini ikiqat artırmağa çağırılır”.
Qaşqay ZİYƏDDİNOĞLU

Paylaş:

Baxılıb: 414 dəfə