Azərbaycanda siyasi sistemin təkmilləşdirilməsinə xidmət edən islahatlar davamlı xarakter daşıyır

Bakı:

26 °C

65 %

2 m/s

AZ RU EN

Ana səhifə / Siyasət / Azərbaycanda siyasi sistemin təkmilləşdirilməsinə xidmət edən islahatlar davamlı xarakter daşıyır

Azərbaycanda siyasi sistemin təkmilləşdirilməsinə xidmət edən islahatlar davamlı xarakter daşıyır

30.04.2020 [10:56]

Siyasi dialoqdan imtina edən, milli maraqlara zidd mövqe sərgiləyən marginal qruplaşmanın ölkəmizdə həyata keçirilən islahatların, eləcə də qazanılan nailiyyətlərin üzərinə kölgə salmaq cəhdləriisə fiaskoya məhkumdur

Azərbaycanda həyata keçirilən çoxşaxəli islahatlar kursu bütün sahələrin dinamik inkişafını təmin edib. Qeyd edilməlidir ki, sosial-iqtisadi platformada atılan uğurlu addımlar bu gün ölkəmizin iqtisadi gücünü daha da artırır. Bununla yanaşı, siyasi sistemin inkişafına xidmət edən ardıcıl və məqsədyönlü islahatlar da mühüm əhəmiyyətə malikdir.

Xüsusi olaraq vurğulamaq lazımdır ki, 2020-ci ilin fevralın 9-da ölkəmizdə keçirilmiş parlament seçkilərindən sonra yeni formalaşan qanunverici orqanda aparılan islahatlar siyasi sistemin yeni konfiqurasiyasının meydana çıxmasını şərtləndirib. Bəhs olunan seçkilərdən sonra müstəqil Azərbaycanın tarixində ilk dəfə olaraq müxalifət nümayəndəsinin Milli Məclisin Sədrinin müavini vəzifəsinə, eləcə də müxalifət nümayəndələrinin parlament komitələrinə həm sədr, həm müavin vəzifələrinə seçilmələri bu baxımdan xüsusi qeyd edilməlidir. Şübhəsiz ki, bu, siyasi sistemin təkmilləşdirilməsi və siyasi münasibətlərin sağlam zəmində qurulması istiqamətində atılmış strateji əhəmiyyətli addım kimi səciyyələndirilə bilər.

Məsələ ilə bağlı fikirlərini bölüşən Milli Məclisin deputatı Kamilə Əliyeva Prezident İlham Əliyevin rəhbərliyi ilə həyata keçirilən siyasi islahatların ölkəmizin qüdrətinin daha da artmasına xidmət etdiyini deyib. Ölkəmizdə siyasi sistemin təkmilləşdirilməsinə xidmət edən islahatların davamlı xarakter daşıdığını deyənmillət vəkili bildirib ki, 2020-ci ilin əvvəlindən daha geniş vüsət alan siyasi islahatlar ölkəmizdə siyasi dialoq mühitinin daha yüksək səviyyəyə çatdırılmasında əsaslı rol oynayıb. Qısa zaman çərçivəsində reallaşdırılan islahatlar, həmçinin kadr islahatları və yeni tərkibdə formalaşan Milli Məclis daha təkmil və çevik idarəetmə mexanizminin yaranmasına yol açıb. Təbii ki, bu yeniliklər, aparılan islahatlar siyasi sistemin yeni konfiqurasiyasının meydana çıxmasını şərtləndirib: "Digər mühüm məqamlardan biri bu ilin əvvəlindən hakimiyyət tərəfindən parlamentdə təmsil olunan və olunmayan siyasi qüvvələrlə dialoq prosesinə start verilməsidir. Təbii ki, öz fəaliyyətində milli maraqları – dövlətin strateji mənafelərini üstün tutan siyasi qüvvələrin mütləq əksəriyyəti bu dialoq təklifinə müsbət yanaşdılar. Hazırda fərqli siyasi baxışlarına baxmayaraq, milli dövlətçilik mənafeyindən, dövlət maraqlarından çıxış edən siyasi qüvvələrlə dialoq strateji önəm kəsb edir. Ədliyyə Nazirliyinin kollegiyasının qərarı ilə Azad Demokratlar Partiyasının və Yeni Zaman Partiyasının qeydiyyata alınması da islahatların tərkib hissəsi kimi olduqca əhəmiyyətlidir. Bu siyasi partiyaların qeydiyyata alınması ölkəmizdə mövcud olan yeni siyasi münasibətlərin təzahürüdür, eyni zamanda, Azərbaycanın siyasi sistemində yeniləşmənin ikinci fazası olaraq xarakterizə edilə bilər".

Millət vəkili onu da qeyd edib ki, dialoqdan imtina edən marginal qruplaşma isə anti-Azərbaycan dairələrin direktivləri əsasında hərəkət edir, milli maraqlara zidd mövqe sərgiləyir. Onun sözlərinə görə, həmin radikal qrupların islahatların, eləcə də ölkəmizin qazandığı nailiyyətlərin üzərinə kölgə salmaq cəhdləri fiaskoya məhkumdur.

"Xalq cəbhəsi" qəzetinin baş redaktoru, siyasi ekspert Elçin Mirzəbəyli də Azərbaycanda iqtisadi və digər sahələrdə həyata keçirilən islahatlarla yanaşı, siyasi islahatların daha da dərinləşdirilməsinin olduqca mühüm əhəmiyyət kəsb etdiyini diqqətə çatdırıb. Onun sözlərinə görə, təcrübə göstərir ki, islahatlar bütün sahələr üzrə paralel şəkildə aparıldıqda, dövlət idarəçiliyi sistemi mövcud çağırışlara cavab verdikdə və prosesə ictimai nəzarət mexanizmləri gücləndirildikdə effektiv nəticə verir: "Azərbaycanda ötən müddət ərzində idarəetmə mexanizmlərinin təkmilləşdirilməsi, gənclərə öz potensiallarını ortaya qoymaları üçün geniş imkanların yaradılması, kadrlara münasibətdə peşəkarlıq, dürüstlük, vətənpərvərlik kimi mühüm keyfiyyətlərin ön plana keçirilməsi islahatların qarşıdakı mərhələdə də uğurla davam etdirilməsinə zəmin yaradır".

E.Mirzəbəyli onu da əlavə edib ki, siyasi sistemin yeni konfiqurasiyası, ilk növbədə, qarşılıqlı etimadlı siyasi münasibətlər sisteminin, dialoq mədəniyyətinin formalaşmasını, çoxpartiyalı sistemin istisnasız olaraq Azərbaycan dövlətinin, xalqının maraqlarına xidmət edəcək bir platforma üzərindən inkişafını, dövlətçilik və müstəqillik prinsiplərinin rəhbər tutulmasını ehtiva edən siyasi sistemin yaradılmasıdır. Bu, Azərbaycan dövlətçiliyi üçün yeni və olduqca mühüm, bəlkə də, tarixi əhəmiyyət kəsb edən bir mərhələdir: "Təəssüf ki, son dövrlərədək Azərbaycanda dövlətçilik, müstəqillik, azadlıq, rifah və inkişaf kimi müqəddəs amallar ətrafında yeni siyasi münasibətlər sisteminin formalaşmasına həm daxili – antimilli qruplaşmalar, həm də Azərbaycana düşmən kəsilən xarici qüvvələr ciddi maneələr yaratmağa çalışıblar. Lakin bütün bu cəhdlər Prezident İlham Əliyevin qətiyyəti, Azərbaycan xalqının toplumsal siyasi səviyyəsi və ölkəmizdəki siyasi qüvvələrin mütləq əksəriyyətinin obyektiv dəyərləndirmə hissini itirməməsi nəticəsində iflasa uğrayıb və keçmişdə qalıb. Azərbaycanın islahatlar yolu ilə yeni inkişaf mərhələsinə qədəm qoyması, bu istiqamətdə inamla addımlaması xalqın, siyasi qüvvələrin mütləq əksəriyyətinin birmənalı şəkildə dəstəklədiyi, alternativi olmayan yoldur".

Pərviz SADAYOĞLU

Paylaş:

Baxılıb: 428 dəfə