KİV-in inkişafına Dövlət Dəstəyi Fondu ötən ilə dair hesabat verib

Bakı:

30 °C

50 %

7 m/s

Əlaqə

AZ RU EN

Ana səhifə / Siyasət / KİV-in inkişafına Dövlət Dəstəyi Fondu ötən ilə dair hesabat verib

KİV-in inkişafına Dövlət Dəstəyi Fondu ötən ilə dair hesabat verib

11.02.2010 [02:51]

Bununla bağlı təşkil edilən tədbirdə 2010-cu ildə həyata keçiriləcək tədbirlər haqqında da danışılıb
Azərbaycan Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu 2009-cu il üzrə hesabatını açıqlayıb. Fond rəhbərliyi dünən keçirdiyi mətbuat konfransında dövlət büdcəsindən quruma ayrılmış vəsaitin xərclənmə istiqamətləri ilə bağlı geniş məlumat verib. Tədbirdə 2010-cu ildə həyata keçiriləcək tədbirlər haqqında da danışılıb. Hesabat toplantısında Azərbaycan Prezidenti yanında KİV-in inkişafında Dövlət Dəstəyi Fondunun sədri Vüqar Səfərli, Mətbuat Şurasının rəhbəri Əflatun Amaşov, Fondun Müşahidə Şurasının üzvləri Umud Rəhimoğlu, Vüqar Rəhimzadə, Müşfiq Ələsgərli və Bəxtiyar Sadıqov iştirak edib.
V.Səfərli bildirib ki, ötən il Fonda ayrılan 1 milyon 304 min 160 manatın 14 min 645 manatı fondun ştatda olan, 15 min manatı isə ştatdan kənar işçilərinin əməkhaqqısının ödənilməsinə sərf edilib.
ötən il ərzində Milli Mətbuat Günü münasibətilə 39 redaksiyaya ümumilikdə 39 min manat həcmində birdəfəlik yardım göstərilib. 63 layihənin maliyyələşməsinə 676 min 873 manat vəsait xərclənib. Fərdi jurnalist müsabiqəsinin qalibi olmuş 33 jurnalistə isə ümumilikdə 33 min manat məbləğində maliyyə yardımı verilib.
Fondun builki büdcəsində əvvəlki ildəkindən fərqli heç bir dəyişiklik olmayıb: “Bu il üçün fonda 2 milyon manat pul ayrılıb. Amma indiyədək dövlət tərəfindən maliyyələşən bir sıra KİV-lərin maliyyələşməsi də fonda həvalə edildiyindən, həmin məbləğin 700 min manatı bu məqsədlə istifadə olunacaq. Qalan 1 milyon 300 min manat isə yenə də Fondun hesabındadır”.
KİV-in İnkişafına Dövlət Dəstəyi Fondu mətbuat orqanları və fərdi jurnalistlər üçün bu il də müsabiqə elan edib. Bu barədə də açıqlama verən V.Səfərli deyib ki, martın 1-də sənədlərin təqdimatı üçün ayrılan müddət bitəcək. Buna baxmayaraq, hələlik heç bir layihə təqdim olunmayıb. ötən il keçirilən müsabiqədə də eyni vəziyyətin müşahidə olunduğunu vurğulayan qurumun rəhbəri deyib: “Mən buna çox təəssüflənirəm. ötən il də nədənsə, jurnalistlər və qəzetlər axırıncı həftədə layihələri gətirməyə başladılar. Təəssüflər olsun ki, indiyədək Fonda nə bir layihə, nə də yazı daxil olmayıb”.
V.Səfərlinin sözlərinə görə, həm fərdi jurnalistlər, həm də media orqanları üçün elan olunmuş müsabiqənin nəticələri martın 17-də açıqlanacaq. Həmin gün Fond media nümayəndələri üçün Novruz şənliyi keçirəcək. Onun sözlərinə görə, bu il, həmçinin, Milli Mətbuat Günü ərəfəsində bir sıra tədbirlərin keçirilməsi də gözlənilir. Belə ki, Milli Mətbuatın yaradılmasının 135 illik yubileyi münasibətilə aparıcı KİV-lərə birdəfəlik maliyyə vəsaitinin ayrılması gözlənilir. Bayram münasibətilə qabaqcıl jurnalistlərin ölkə Prezidenti tərəfindən fəxri adların veriləcəyi də gözlənilir. Milli Mətbuat Günündə fərdi jurnalistlər də sevindiriləcək. Fərdi jurnalist yazıları müsabiqəsinin nəticələri məhz bu ərəfədə elan ediləcək.
RUHİYYƏ

Paylaş:

Baxılıb: 1271 dəfə