Əli Kərimlinin yalanları növbəti dəfə ifşa olundu

Bakı:

22 °C

58 %

1 m/s

Əlaqə

AZ RU EN

Ana səhifə / Siyasət / Əli Kərimlinin yalanları növbəti dəfə ifşa olundu

Əli Kərimlinin yalanları növbəti dəfə ifşa olundu

05.02.2019 [09:43]

Yanvarın 31-də radikal antimilli ünsürlərin xalq tərəfindən dəstəklənmədiyi bir daha sübuta yetirildi
Ölkəmizin ictimai-siyasi həyatında heç bir rola malik olmayan, xalq tərəfindən dəstəklənməyən radikal müxalifət düşərgəsi öz varlığını sübut etmək üçün müxtəlif yollara əl atmaqdadır. Anti-azərbaycançı mərkəzlərin sifarişi və direktivləri əsasında fəaliyyət göstərən radikal ünsürlər adıçəkilən dairələrdən ianələr almaq üçün mitinq şouları “təşkil edir”, özlərini təsdiqləməyə çalışırlar. Hər dəfə də acı fiasko ilə üzləşən dağıdıcı ünsürlər biabırçılıqlarını sosial şəbəkələrlə ört-basdır etməyə çalışır, “gələn mitinqə” insan axınının gələcəyinə “söz verirlər”.
Eyni aqibət radikal düşərgədə yenidən müşahidə olunmaqdadır. Öncəki aksiyalarda hətta min nəfəri belə “Məhsul” stadionuna yığa bilməyən radikal ünsürlər yalançı pafoslarından əl çəkmir, yenə də gözə kül üfürməklə məşğul olurlar. Bu “qüvvə”lərin xalqın dəstəyini tam şəkildə itirdiyini yanvarın 19-da “Məhsul” stadionunda keçirdikləri və cəmi 2000-dən bir az artıq adamın iştirak etdiyi mitinq də sübut etdi.
Qeyd edilməlidir ki, yanvarın üçüncü ongünlüyü başlayar-başlamaz yenə də sosial şəbəkələr və başqa vasitələrlə Məhəmməd Əmin Rəsulzadənin anadan olması ildönümünü “möhtəşəm aksiya”ya çevirəcəklərini bəyan edən, minlərin, on minlərin bu “aksiya”ya qoşulacağına söz verən qondarma “Milli şura”, “Müsavat”, AXCP və digər partiyalar nəticədə cəmi 120-130 adamla “kifayətləniblər”.
KİV nümayəndələrinin müşahidəsinə əsasən, AXCP sədri Əli Kərimli və “Milli şura” adlanan qondarma qurumun rəhbərliyi heykəlin yanına 100 nəfərdən bir az artıq adamla gəlib. Elə Müsavat Partiyasının fəallarının da sayı bu qədər olub. AXP sədri Pənah Hüseyn isə abidənin önünə cəmisi 3 nəfərlə gəlib. Yerdə qalan “möhtəşəm partiya” sədrləri isə tədbirə tək qatılmaq məcburiyyətində qalıblar. Bu faktın özü radikal müxalifətin nə dərəcədə miskin və acınacaqlı durumda olduğunu əyani şəkildə nümayiş etdirir. Ağız dolusu “xalqın dəstəyi” barədə danışan “liderciklər” bütün hazırlıqlarına baxmayaraq, öndər hesab etdikləri şəxsin ildönümünə cəmi 120-130 adamla qatıla biliblər.
Əslində, radikal müxalifət düşərgəsinin üzvlü, tərəfdarlı, qohum-əqrəbalı elektoratının real sayı cəmi bu qədərdir. Əli Kərimli, Cəmil Həsənli və ya digər özünü “lider” sayanların danışdıqları yalanlar, sadəcə, kameralara və yalan təbliğata hesablanıb. Elə onların yanvarın 20-də Şəhidlər xiyabanını ziyarət zamanı yaradılmasına çalışdıqları süni qarşıdurmanın da əsasında bu amil dayanırdı. Cəmisi beş-on adamla ziyarətə gələn Əli Kərimli digər ziyarətçiləri də “öz ayağına” yazmaq üçün dəridən-qabıqdan çıxırdı. Bunun nəticəsi idi ki, Əli Kərimli internet mediaya onunla xiyabana gələn “on minlərlə” adamın qarşısının necə alınmasından danışmışdı. O, utanmadan deyirdi ki, polis qəsdən “Milli şura”nın tərəfdarlarını qrup şəklində Şəhidlər xiyabanına buraxır ki, az görünsünlər. Halbuki ətrafdakı insanların mühüm əksəriyyəti Əli Kərimlinin bu siyasi manipulyasiyasını pisləmişdi.
Bəs, görəsən, “Milli şura” M.Ə.Rəsulzadənin heykəlinin yanına həmin on minləri niyə aparmayıb? Niyə oraya cəmi 120-130 adamla gəlib? Axı Əli Kərimlinin özünün təbirincə desək, polis onlara heç bir maneçilik törətməmişdi! Bütün bunlar göstərir ki, Əli Kərimli, Cəmil Həsənli və digər radikal müxalifət başçılarının dedikləri ağ yalan və ictimaiyyətin çaşdırılmasına yönəlmiş ucuz təbliğatdan başqa bir şey deyil.
Bəli, bu, növbəti dəfə bir faktı təsdiqləmiş olur ki, ermənipərəst dairələrin ölkəmizə qarşı apardığı çirkin kampaniyaların tərkib hissəsi kimi çıxış edən radikal ünsürlər sifarişlər və direktivlər əsasında fəaliyyət göstərirlər. Eyni zamanda, uğradığı bu rəzillik Əli Kərimli və onun tərəfdarlarının hakimiyyətin son tədbirlərini - struktur islahatları nəticəsində fəaliyyətinə xitam verilmiş orqanların əməkdaşlarının işlə təmin olunması barədə dövlət başçısının və Birinci vitse-prezidentin tapşırıqlarını, şəhid ailələri ilə keçirilən görüşü, dövlətin bu kateqoriyadan olan insanlara yüksək münasibətini və qayğısını, bununla bağlı verilmiş Fərman və sərəncamları 19 yanvar mitinqinin effekti ilə izah etmək cəhdinin sabun köpüyündən başqa bir şey olmadığını göstərir.
Pərviz SADAYOĞLU

Paylaş:

Baxılıb: 538 dəfə