Azərbaycanın işğal edilmiş ərazilərinə qanunsuz səfərlər edən Eleni Teoxarus növbəti qalmaqal ilə gündəmə gəlib

Bakı:

22 °C

60 %

4 m/s

AZ RU EN

Ana səhifə / Siyasət / Azərbaycanın işğal edilmiş ərazilərinə qanunsuz səfərlər edən Eleni Teoxarus növbəti qalmaqal ilə gündəmə gəlib

Azərbaycanın işğal edilmiş ərazilərinə qanunsuz səfərlər edən Eleni Teoxarus növbəti qalmaqal ilə gündəmə gəlib

15.11.2018 [09:29]

Avropa Parlamentinin Kipr Respublikasından olan deputatı Albaniya Respublikasında da arzuolunmaz şəxs elan olunub
Azərbaycanın işğal edilmiş ərazilərinə qanunsuz səfərlər edən və bunun nəticəsində ölkəyə “girişi arzu olunmayan şəxslər siyahısı”na daxil edilən, o cümlədən Azərbaycan Respublikası Cinayət Məcəlləsinin müvafiq maddələri ilə haqqında cinayət işi açılan Avropa Parlamentinin (AP) Kipr Respublikasından olan deputatı Eleni Teoxarus növbəti qalmaqal ilə gündəmə gəlib. O, bu dəfə Albaniya Respublikasında da arzuolunmaz şəxs elan olunub.
Bəllidir ki, separatizmi, etnik təmizləməni təbliğ edən E.Teoxarus erməni diasporunun sifarişi əsasında ölkəmizin işğal edilmiş Dağlıq Qarabağ bölgəsinə səfərlər etməklə təxribatçı hərəkətlərə yol vermişdi. AP-nin Kiprdən olan bu üzvünün beynəlxalq hüququn prinsiplərinə, xüsusilə də ərazi bütövlüyü prinsipinə münasibətdə barışmaz mövqeyi, ekstremist çağırışlarının növbəti hədəfi Azərbaycan və Ukraynadan sonra Albaniya olub. Bu şəxsin Albaniya Respublikasının Konstitusiyasına, təhlükəsizliyinə və ölkədə asayişə təhlükə yaradan ekstremist və nifrət çıxışı səbəbindən Albaniyanın Avropa və Xarici İşlər Nazirliyi və Daxili İşlər Nazirliyinin birgə qərarı ilə ölkəyə girişi arzuolunmaz şəxs elan olunub. Daha dəqiq desək, deputatın Albaniyanın cənub torpaqlarına qarşı ərazi iddialarını ehtiva edən ekstremist millətçi çıxışı Albaniya tərəfindən ölkənin ərazi bütövlüyünə və konstitusiyaya əsaslanan asayişi pozmaq cəhdi kimi qiymətləndirilərək belə bir qərar qəbul edilib.
Ümumiyyətlə, beynəlxalq hüquq normaları və prinsiplərinə zidd olan bu cür təxribatçı xarakterli hərəkətlər, o cümlədən qanunsuz səfərlər milli dövlətlərin ərazi bütövlüyü və suverenliyinin heçə sayılması, beynəlxalq qanunvericiliyin tələblərinin pozulmasıdır. Belə qəbuledilməz hallar, həmçinin mənfi presedentlərin meydana çıxmasına rəvac verir. Ona görə də Albaniyanın qərarı heç də təəccüb doğurmur. Ən əsası, bu qərarın heç də bu qəbildən olan sonuncu qərar olmayacağını asanlıqla ifadə etmək olar. Hətta əgər belə davam etsə, bu deputat bir neçə ölkənin müraciəti əsasında beynəlxalq axtarışa verilən ilk AP üzvü “statusu”nu da qazana bilər.
Digər tərəfdən, E.Teoxarusun Kaspar Karampetyanla əlaqələrinin mövcudluğu və onun işğal olunmuş ərazilərimizə səfərlərinin təşkilatçısının məhz Karampetyan olduğu bəllidir. Belə olan halda, AP-nin Kiprdən olan bu üzvünün Avropa İttifaqına üzvlüyə namizəd ölkə olan Albaniya tərəfindən də arzuolunmaz şəxslər siyahısına daxil olunması onun Azərbaycanın işğal olunmuş ərazilərinə qanunsuz səfərini təşkil edən erməni lobbi dairələrinin, xüsusilə Brüsseldə fəaliyyət göstərən və brilyant alveri ilə məşğul olan, əslən Yunanıstandan olan Kaspar Karampetyanın da növbəti ifşasıdır.
Bütün bunlara paralel olaraq bir məqama da toxunmaq məqsədəmüvafiqdir. Belə ki, bu günlərdə Almaniyada erməni mafiyasına qarşı aparılan əməliyyat çərçivəsində Bundestaqın deputatı və erməni lobbist təşkilatı olan Almaniya-Ermənistan Forumunun təsisçisi Albert Vayler də şübhə obyektinə çevrilib və bu ölkənin hüquq-mühafizə orqanları tərəfindən dindirilib. Ermənistanın Almaniyadakı səfirinin də adının hallandığı bu cinayət işi göstərir ki, ermənilərin lobbist fəaliyyətinin maliyyə təminatçısı və əlaqələndiricisi erməni mafiyasıdır. Albert Vayler də işğal olunmuş ərazilərimizə qanunsuz səfərə görə arzuolunmaz şəxslər siyahısına salınıb və Almaniya kansleri Angela Merkelin ölkəmizə səfəri zamanı həmin şəxsin Azərbaycan ərazisinə daxil olmasına icazə verilməyib. Bütövlükdə, E.Teoxarusun Albaniyada ifşası, Almaniyada erməni mafiyası ilə əlaqədar üzə çıxarılan faktlar Avropa ölkələrində, o cümlədən Avropa Parlamenti və Avropa Şurası Parlament Assambleyasında Azərbaycana qarşı fəaliyyət aparan, işğal olunmuş ərazilərimizə qanunsuz səfər edən qərəzli şəxslərin erməni mütəşəkkil cinayət qruplaşmaları ilə əlaqələrinin araşdırılmasını labüd edir.
Nurlan QƏLƏNDƏRLİ

Paylaş:

Baxılıb: 576 dəfə