“Jara-2018” Beynəlxalq Musiqi Festivalı Azərbaycan mədəniyyətinin təbliğinə xidmət edir

Bakı:

18 °C

62 %

3 m/s

Əlaqə

AZ RU EN

Ana səhifə / Siyasət / “Jara-2018” Beynəlxalq Musiqi Festivalı Azərbaycan mədəniyyətinin təbliğinə xidmət edir

“Jara-2018” Beynəlxalq Musiqi Festivalı Azərbaycan mədəniyyətinin təbliğinə xidmət edir

28.07.2018 [09:34]

“Jara” hər şeydən əvvəl beynəlxalq musiqi festivalıdır və bunu mühüm incəsənət hadisəsi kimi qəbul etmək lazımdır. Ona siyasi don geyindirmək, siyasi eynəklə baxmaq düzgün deyil. Məsələyə bu kontekstdən yanaşa bilsək, görəcəyik ki, orda kiminsə iştirak edib-etməməsi ən sonuncu məsələlərdən biridir. Çünki söhbət musiqidən, incəsənətdən gedir. Bu musiqi hadisəsi, nəticə etibarilə, həm də Azərbaycan musiqisinin, mədəniyyətinin təbliğ olunmasına xidmət edir. Ona görə də bu məsələ ətrafında sosial şəbəkələrdə və bəzi media qurumları tərəfindən təşkil olunan süni ajiotaj yersizdir.
Bu fikirləri AZƏRTAC-a açıqlamasında Milli Məclisin deputatı, “Yeni Azərbaycan” qəzetinin baş redaktoru Hikmət Babaoğlu bildirib. O qeyd edib ki, bizim torpaqlarımızı işğal edən Ermənistandır və biz bu işğalçı ölkəyə görə hamı ilə düşmən ola bilmərik. Tam əksinə, problemin həlli üçün bizə dostlar lazım olduğunu deyən H.Babaoğlu əlavə edib ki, əgər bu gün Rusiya vətəndaşı olan, kürd mənşəli müğənni Azərbaycan mədəniyyətinə, musiqisinə, dünyada multikulturalizmin paytaxtı kimi qəbul edilən Bakımıza rəğbətini bildirirsə, buraya gəlmək maraqlıdırsa, doğma dilimizdə musiqi səsləndirmək istəyirsə, bunu normal qəbul etmək lazımdır. “Necə ola bilər ki, Avropa Oyunlarına, İslam Həmrəyliyi Oyunlarına ev sahibliyi edən, bütöv bir ili “Multikulturalizm İli” elan edən, “İslam Həmrəyliyi İli” elan edən və bunu əslində dinlərarası dialoqa çevirməyi bacaran bir ölkə onun mədəniyyətini və incəsənətini daha yaxından tanımağa çalışan bir incəsənət xadimini qəbul edə bilməsin”, - deyə müsahibimiz bildirib. Onun sözlərinə görə, Azərbaycan dünyada tolerantlıq, tərəfdaşlıq məkanı kimi tanınır. Ona görə bu cür məsələlərə bir qədər soyuqqanlı, təmkinli yanaşmaq daha obyektiv və realist düşünməyimizə gətirib çıxara bilər. Ancaq təəssüf ki, bəzi hallarda realist mövqedən çıxış edən şəxslər və qurumlar öz mövqelərinə görə hücuma məruz qalırlar.
Hikmət Babaoğlu əlavə edib ki, artıq “Jara” Beynəlxalq Musiqi Festivalı başlayıb və həmişə olduğu kimi bu dəfə də paytaxt sakinləri tərəfindən olduqca maraq və coşquyla qarşılanıb. İnanırıq ki, bu musiqi festivalı Azərbaycan incəsənətinin, Qarabağ həqiqətlərinin dünyaya çatdırılmasına öz töhfəsini verən mühüm tədbirlərdən biri kimi yadda qalacaq.

Paylaş:

Baxılıb: 685 dəfə