“Jara” musiqi festivalı xalqımızın zəngin mədəniyyətini və ölkəmizin inkişafını dünya ictimaiyyətinə təqdim edən uğurlu təşəbbüsdür

Bakı:

21 °C

56 %

5 m/s

AZ RU EN

Ana səhifə / Siyasət / “Jara” musiqi festivalı xalqımızın zəngin mədəniyyətini və ölkəmizin inkişafını dünya ictimaiyyətinə təqdim edən uğurlu təşəbbüsdür

“Jara” musiqi festivalı xalqımızın zəngin mədəniyyətini və ölkəmizin inkişafını dünya ictimaiyyətinə təqdim edən uğurlu təşəbbüsdür

27.07.2018 [09:51]

Bu gün bəzi maraqlı dairələrin festivalın gözdən salınmasına xidmət edən “qara piar” kampaniyası heç bir nəticə verməyəcək
Bir neçə gündür ki, müəyyən dairələr tərəfindən sosial şəbəkələrdə “Jara” musiqi festivalının iştirakçısı, Rusiya vətəndaşı Zara ilə bağlı geniş kampaniya təşkil olunub və hazırda da davam etdirilir. Əsas iddia kimi guya milliyyətcə erməni olan bu müğənninin Azərbaycana gəlməsi və festivalda çıxışının yolverilməzliyi barədə əsassız fikirlər irəli sürülür.
Amma hər kəsə bəllidir ki, Azərbaycan bütün xalqların sülh və qarşılıqlı anlaşma şəraitində yaşadığı tolerant, bütün dini və milli azadlıqların təmin edildiyi ölkədir. Azərbaycan dünyaya göstərir ki, Ermənistanda bir nəfər azərbaycanlı yaşamadığı, onların doğma yurdlarından qovulduqları halda, Dağlıq Qarabağ nəzərə alınmasa, ölkəmizdə 30 min erməni əsilli vətəndaş yaşayır. Azərbaycan torpaqlarının işğalında iştirakçı olmayan, xalqımıza qarşı cinayət törətməyən, dinc həyat tərzi sürən hər hansı erməni əsilli şəxsin ölkəmizə gəlməsi niyə yolverilməz hesab olunmalıdır? Erməni şovinistlərinin xalqımıza qarşı soyqırımı törətdiyi, Ermənistana rəhbərlik etmiş şəxslərin ermənilərlə azərbaycanlılar arasında irqi uyğunsuzluq olması ilə bağlı iddialar irəli sürdüyü şəraitdə, biz niyə özümüzü dünyaya layiq olmadığımız şəkildə təqdim etməliyik?
Digər tərəfdən, müğənni Zara Ermənistanda anadan olsa da, milliyyətcə yezidi kürddür və Rusiya vətəndaşıdır. Və hər hansı şəxsin doğulduğu ölkəyə hörmətlə yanaşması normaldır. Əgər Zara Ermənistana səfər edib həmin ölkəni tərifləyib və təbliğ edirsə, nəyə görə onun Azərbaycana gəlib ölkəmiz haqqında xoş fikirlər səsləndirməsinə şərait yaradılmamalıdır? Nəzərə alınmalıdır ki, Azərbaycan dövləti, xalqımız heç bir ölkəni və xalqı, o cümlədən erməniləri özünə düşmən hesab etmir. Azərbaycanın düşməni erməni xalqı deyil, erməni milliyyətçiləri və şovinistlərinin ideoloqları, Ermənistanın işğalçı, xunta və terrorçu rejimidir.
Erməni xalqı da bu dairələrin girovudur və bundan əziyyət çəkir. Qeyd edək ki, Azərbaycan xalqı ermənilərlə dinc yaşamağa hazırdır. Bunun üçün ilk növbədə torpaqlarımız işğaldan azad olunmalı, ölkəmizin ərazi bütövlüyü bərpa edilməlidir. “Jara” musiqi festivalının təşkilat komitəsinin rusiyalı müğənni Zaranın tədbirdə iştirakına dair açıqlamasında da bildirilir ki, mədəniyyətlərarası dialoq Azərbaycan dövlətinin siyasətinin vacib tərkib hissələrindən biridir. Açıqlamada vurğulanır: “Bizim ölkə dialoq və əməkdaşlığa açıqdır, müxtəlif millətləri və mədəniyyətləri birləşdirən məkandır. Məlumdur ki, incəsənətlə idman siyasətdən kənar sahələrdir, onlar insanları yaxınlaşdırır, konsolidasiya edir. Bu münasibətlə ölkəmizdə “Avroviziya” mahnı müsabiqəsi, ilk Avropa Oyunları, İslam Həmrəyliyi Oyunları və digər tədbirlərin keçirildiyini xatırlatmaq kifayətdir. “Jara” festivalı bu sırada öz layiqli yerini tutub və artıq üçüncü dəfədir paytaxtımızda müxtəlif millətlərin nümayəndələri olan Rusiya şou-biznesinin ulduzlarını toplayır. Milliyyətcə kürd olan müğənni Zara özü ölkəmizə gəlmək istədiyini dilə gətirib. O, bizim qədim mədəniyyətimiz, zəngin tarix və adət-ənənələrimizlə tanış olmaq istəyir. Biz də tolerant və qonaqpərvər ölkənin nümayəndələri kimi ona “Jara-2018” beynəlxalq festivalına gəlmək imkanı yaratdıq”.
Ümumiyyətlə, erməni mənşəli şəxslərin ölkəmizə səfəri ilk dəfə deyil. Belə ki, bir neçə il öncə “xalq diplomatiyası” çərçivəsində bir qrup erməninin Bakıya gəlişi, Ermənistanın rəsmi şəxslərinin beynəlxalq tədbirlər çərçivəsində paytaxtımıza səfəri, eləcə də “Avroviziya-2012” mahnı müsabiqəsində iştirakları da buna sübutdur. Rusiyalı Zara da incəsənət adamı olaraq festivalda iştirak edəcək. Şübhə etmirik ki, Zara Bakıya səfəri çərçivəsində əsl həqiqətlərin şahidi olub ölkəmizin inkişafını, xalqımızın zəngin mədəniyyətini öz gözləri ilə görəcək. “Jara” musiqi festivalı da məhz bu məqsədə xidmət edən çox uğurlu addımdır. Ona görə də bu gün bəzi maraqlı dairələrin festival ətrafında lüzumsuz müzakirələr açması, festivalın gözdən salınmasına xidmət edən “qara piar” kampaniyası həyata keçirmələri heç bir nəticə verməyəcək.
Nardar BAYRAMLI

Paylaş:

Baxılıb: 556 dəfə