Aydın Hüseynov: Qəza baş verən zaman bütün dövlət qurumları operativ və mütəşəkkil şəkildə çalışdılar

Bakı:

19 °C

58 %

6 m/s

AZ RU EN

Ana səhifə / Siyasət / Aydın Hüseynov: Qəza baş verən zaman bütün dövlət qurumları operativ və mütəşəkkil şəkildə çalışdılar

Aydın Hüseynov: Qəza baş verən zaman bütün dövlət qurumları operativ və mütəşəkkil şəkildə çalışdılar

06.07.2018 [09:35]

“İyulun 4-də Azərbaycan Respublikasının Prezidenti İlham Əliyevin yanında ölkənin enerji sistemində vəziyyətlə əlaqədar keçirilən müşavirədə dövlət başçısı qəzanın səbəblərinin araşdırılması və lazımi tədbirlərin görülməsi ilə əlaqədar ciddi tapşırıqlar verdi. Dövlət başçısının qeyd etdiyi kimi, son 15 ildə ölkəmizin enerji təminatı sahəsində böyük işlər görülüb, ölkəmizin bütün bölgələrində yeni elektrik stansiyaları tikilib. Hazırda Azərbaycanın enerji potensialı 6400 meqavata bərabərdir. Buna baxmayaraq, sözügedən qəzanın baş verməsi ilə əlaqədar ciddi araşdırma aparılmalıdır və dövlətimizin başçısı bununla bağlı müvafiq tapşırıqlarını verib. Əminəm ki, Dövlət Komissiyası problemi ciddi şəkildə araşdıracaq”. Bu fikirləri Yeni Azərbaycan Partiyası (YAP) Siyasi Şurasının üzvü, Milli Məclisin deputatı Aydın Hüseynov deyib.
A.Hüseynov bildirib ki, dövlət başçısının yanında keçirilən müşavirədə bir sıra məsələlərə aydınlıq gətirildi. Onun sözlərinə görə, yaradılan Dövlət Komissiyası müəyyən tədbirlərin görülməsi ilə əlaqədar təkliflər verəcək.
“Cənab Prezidentin qeyd etdiyi kimi, gələcəkdə əlavə tədbirlər görülməlidir ki, əgər hər hansı bir qəza baş verərsə, ümumi sistemə bunun təsiri olmasın. Yəqin ki, məsələ ilə bağlı tədbirlər planı hazırlanıb həyata keçiriləcək. Dövlət başçısı tədbirlər planına beynəlxalq auditin cəlb edilməsini də tapşırıb. Bununla da, həm Mingəçevirdəki İstilik Elektrik Stansiyasının tam təftişi və auditi aparılacaq, həm də ölkəmizin bütün enerji sisteminin bu sahədə peşəkarlığı ilə seçilən beynəlxalq qurumlar tərəfindən təhlili təşkil olunacaq. Digər bir vacib məqam ondan ibarətdir ki, qəza baş verən zaman bütün dövlət qurumları operativ və mütəşəkkil şəkildə çalışdılar. Eyni zamanda, bütövlükdə cəmiyyətimiz, ölkə vətəndaşları bu çətin sınaqdan şərəflə çıxdılar. Bildiyiniz kimi, müəyyən dairələr bu hadisədən sui-istifadə edərək insanlarda çaşqınlıq yaratmağa çalışırdılar. Amma onların istəkləri puç oldu. Ölkə vətəndaşları bu məsələdə böyük həmrəylik göstərdilər. Dövlət başçısının vurğuladığı kimi, Azərbaycan cəmiyyəti çox yetkin cəmiyyətdir və Azərbaycanda, sözün əsl mənasında, vətəndaş həmrəyliyi mövcuddur”, - deyə A.Hüseynov qeyd edib.

Paylaş:

Baxılıb: 578 dəfə