Aydın Hüseynov: Ermənistanın yeganə xilas yolu işğalçı siyasətdən əl çəkməkdir

Bakı:

19 °C

58 %

6 m/s

Əlaqə

AZ RU EN

Ana səhifə / Siyasət / Aydın Hüseynov: Ermənistanın yeganə xilas yolu işğalçı siyasətdən əl çəkməkdir

Aydın Hüseynov: Ermənistanın yeganə xilas yolu işğalçı siyasətdən əl çəkməkdir

04.05.2018 [10:16]

“Ermənistanda meydana çıxan hakimiyyət böhranının və siyasi, iqtisadi tənəzzülün əsasında duran başlıca amil bu ölkə rəhbərliyinin həyata keçirdiyi yarıtmaz və işğalçı siyasətdir”. Bu sözləri SİA-ya Milli Məclisin deputatı, YAP Siyasi Şurasının üzvü Aydın Hüseynov deyib.
Onun sözlərinə görə, işğalçı və təcavüzkar siyasət Ermənistanın blokada vəziyyətinə düşməsinə səbəb olub, bu ölkədə sosial-iqtisadi və demoqrafik böhran hökm sürür: “Bu gün Azərbaycanda Ermənistan əhalisinin sayı qədər, yəni 2 milyon iş yeri açılıb. Azərbaycanda əhali hər il 100 min nəfər artırsa, Ermənistanda 100 mindən çox insan ölkəni tərk edir. Ermənistan iqtisadiyyatı tamamilə dağılıb, ölkədə yoxsulluq və səfalət pik həddə çatıb”.
“Azərbaycanın həyata keçirdiyi hücum diplomatiyası və uğurlu siyasət nəticəsində Ermənistan dalana dirənib, bütün regional layihələrdən təcrid durumuna düşüb və faktiki olaraq manevr imkanları tükənib. 2016-cı ilin aprel döyüşlərinin nəticəsi isə Ermənistan cəmiyyətində isterikanın yaranmasına səbəb oldu. Ermənistan və onun havadarları anladılar ki, Azərbaycan güclü, qüdrətli dövlətdir və işğal altında olan torpaqlarını azad etməyə qadirdir. Aprel döyüşləri erməni təbliğat maşınının Ermənistan ordusunun gücü haqqında formalaşdırdığı mifi dağıtdı. Erməni mətbuatında mütəmadi olaraq dərc olunan yazılarda bu ölkənin siyasi dairələrinin təşviş içində olduğu, Azərbaycan Ordusunun gücü qarşısında erməni silahlı qüvvələrinin acizliyi diqqətə çatdırıldı. Bütün bu reallıqların fonunda erməni cəmiyyəti anlayır ki, Ermənistanın çıxış yolu işğalçı siyasətdən imtina etməkdir. Bu ölkədə hakimiyyətdə kimin olmasından asılı olmayaraq, Azərbaycan öz torpaqlarını işğaldan azad edəcək”, - deyən A.Hüseynov əlavə edib ki, Ermənistanda hökm sürən böhran və tənəzzülün daha da dərinləşəcəyini proqnozlaşdırmaq çətin deyil.
Millət vəkili onu da qeyd edib ki, mövcud reallıqlar deməyə əsas verir ki, Ermənistan yeni siyasi kataklizmlərə sürüklənir: “Serj Sarkisyan illərdir ki, rəhbərlik etdiyi klan vasitəsilə Ermənistanın bütün resurslarını istismar edib, sistemli korrupsiya maşını yaradaraq xarici diasporun göndərdiyi ianələri belə mənimsəyib. Bu gün isə ölkədə hakimiyyət böhranı, xaos, anarxiya, böhran və tənəzzül hökm sürür. Bütün bunların əsasında, qeyd etdiyimiz kimi, işğalçı siyasət dayanır. Ermənistanın yeganə xilas yolu işğalçı siyasətdən əl çəkmək və qonşu ölkələrlə münasibətləri bərpa etməkdir”.

Paylaş:

Baxılıb: 560 dəfə