Cenevrədə Azərbaycanın qaçqın və məcburi köçkün problemindən bəhs olunub

Bakı:

25 °C

69 %

3 m/s

Əlaqə

AZ RU EN

Ana səhifə / Siyasət / Cenevrədə Azərbaycanın qaçqın və məcburi köçkün problemindən bəhs olunub

Cenevrədə Azərbaycanın qaçqın və məcburi köçkün problemindən bəhs olunub

24.03.2018 [10:05]

Cenevrədə davam edən BMT-nin İnsan Hüquqları Şurasının 37-ci sessiyası çərçivəsində İnsan Hüquqlarının Təşviqi və Qlobal Dialoq üzrə Cenevrə Mərkəzi və həmin şəhərdə yerləşən Daxili Köçürülmələr üzrə Monitorinq Mərkəzinin birgə təşkilatçılığı ilə “Hərəkətdə olan insanların müdafiəsi: Qaçqın və miqrant böhranı kontekstində məcburi köçkünlər” mövzusunda panel müzakirələr təşkil edilib.
Panel iclası dünyanın müxtəlif regionlarında münaqişə və zorakılıq nəticəsində doğma yurdlarından didərgin düşmüş məcburi köçkünlərin hüquqlarının qorunması və onlara yardım göstərilməsi istiqamətində səylərin gücləndirilməsi ətrafında müzakirələrin aparılması məqsədini daşıyıb.
Beynəlxalq gündəmdə əsas yer tutan Suriya və İraqda məcburi köçkün problemi ilə bir sırada Azərbaycanda mövcud olan eyni problemin tədbirdə müzakirə edilməsi ölkəmizdəki məcburi köçkün məsələlərinə daha geniş beynəlxalq diqqətin cəlb edilməsi üçün münbit şərait yaradıb.
Panel müzakirələrinin açılışında çıxış etmiş Azərbaycan Respublikasının Cenevrədəki BMT bölməsi və digər beynəlxalq təşkilatlar yanında daimi nümayəndəsi, səfir Vaqif Sadıqov dünyada məcburi köçkünlərin sayının rekord göstəriciyə - 41 milyon nəfərə çatmasına və əksər hallarda münaqişə vəziyyətlərinin siyasi həllini tapmaması səbəbindən onillər boyu insanların hüquq və azadlıqlarının tapdanılmış vəziyyətdə qalmasına baxmayaraq, problemin beynəlxalq ictimaiyyətin və medianın diqqətindən kənar qaldığını vurğulayıb. Azərbaycanda məcburi köçürülmə problemindən və onun köklərindən danışan daimi nümayəndə V.Sadıqov son 20 il ərzində ölkə hökuməti tərəfindən köçkünlərin yaşayış şəraitinin yaxşılaşdırılması üçün 6 milyard ABŞ dolları məbləğində vəsaitin xərcləndiyini qeyd edib. Azərbaycanda məcburi köçkün probleminin davamlı həllinin Ermənistanın silahlı qüvvələrinin ölkəmizin işğal olunmuş ərazilərindən çıxarılması və məcburi köçkünlərin təhlükəsiz və könüllü şəkildə öz evlərinə qayıtmasının təmin edilməsindən ibarət olduğu bildirilib.
Panelist qismində tədbirdə çıxış etmiş ADA Universitetinin prorektoru Fariz İsmayılzadə məcburi köçkünlərə münasibətdə Azərbaycan hökuməti tərəfindən həyata keçirilən siyasətə dair ətraflı məlumat verib. Qaçqın və məcburi köçkünlərin vəziyyətinin yaxşılaşdırılmasının Azərbaycan hökumətinin başlıca prioriteti olduğunu bildirən F.İsmayılzadə bu siyasətin inkişaf mərhələləri, məcburi köçkünlərin yaşayış şəraiti və sosial rifahının yaxşılaşdırılması istiqamətində görülmüş işlərdən danışıb. O, məcburi köçkünlərin probleminin davamlı həllinin onların doğma yurdlarına qayıdışının təmin edilməsindən ibarət olmasını xüsusi vurğulayaraq ötən il 50 məcburi köçkün ailəsinin Cəbrayıl rayonunun işğaldan azad edilmiş Cocuq Mərcanlı kəndinə qayıtdığını qeyd edib.
Tədbirə sədrlik edən İnsan Hüquqlarının Təşviqi və Qlobal Dialoq üzrə Cenevrə Mərkəzinin icraçı direktoru səfir İdris Cəzairi Azərbaycan hökumətinin siyasətini alqışlayaraq, ölkəmizin təcrübəsinin əsasında ölkə rəhbərliyinin güclü siyasi iradəsinin durduğunu və bu təcrübənin digər dövlətlər üçün yaxşı nümunə olduğunu bildirib. Azərbaycanın bu sahədə siyasəti, həmçinin panelist qismində çıxış etmiş Daxili Köçürülmələr üzrə Monitorinq Mərkəzinin direktoru xanım Aleksandra Bilak tərəfindən yüksək qiymətləndirilib.
Tədbirdə Cenevrədə akkreditə olunmuş diplomatik korpusun nümayəndələri, BMT qurumlarının təmsilçiləri və beynəlxalq QHT-lər iştirak ediblər.

Paylaş:

Baxılıb: 542 dəfə