"Torpaqların dövlət ehtiyacları üçün alınması haqqında" qanun layihəsi Milli Məclisin müzakirəsinə çıxarılacaq

Bakı:

26 °C

73 %

9 m/s

AZ RU EN

Ana səhifə / Siyasət / "Torpaqların dövlət ehtiyacları üçün alınması haqqında" qanun layihəsi Milli Məclisin müzakirəsinə çıxarılacaq

"Torpaqların dövlət ehtiyacları üçün alınması haqqında" qanun layihəsi Milli Məclisin müzakirəsinə çıxarılacaq

23.05.2009 [11:15]

Dünən Milli Məclisin Aqrar siyasət komitəsinin iclası keçirilib. Komitənin sədri Eldar İbrahimov gündəlikdəki məsələ - “Torpaqların dövlət ehtiyacları üçün alınması haqqında” qanun layihəsini müzakirəyə təqdim edib. Bildirilib ki, qanun layihəsi parlamentə qanunvericilik təşəbbüsü qaydasında Azərbaycan Prezidenti tərəfindən təqdim olunub. Dövlət və milli mənafelər nöqteyi-nəzərindən vacib olan bu sənəd, konseptual baxımdan çox böyük əhəmiyyət kəsb edən məsələlər nəzərə alınmaqla tərtib olunub.
Qanun layihəsi 10 fəsil, 83 maddədən ibarətdir və Azərbaycan Respublikasında torpaqların dövlət ehtiyacları üçün alınması, bununla bağlı kompensasiyanın müəyyən edilməsi, ödənilməsi və digər məsələlərlə əlaqədar münasibətləri tənzimləyir. Qanuna uyğun olaraq, xüsusi, bələdiyyə və dövlət mülkiyyətində olan torpaqlar üç məqsədlə - yolların və digər kommunikasiya xətlərinin çəkilməsi, sərhəd zolağının müəyyən edilməsi, müdafiə əhəmiyyətli obyektlərin tikilməsi üçün dövlət tərəfindən alına bilər. Dövlət bu qanunla nəzərdə tutulmuş qaydada öz ehtiyacları üçün tələb olunan hər hansı torpaq sahəsini məcburi qaydada ala bilər. Layihədə torpaqların alınmasına nəzarət edən orqan və onun funksiyaları, torpaqların alınması haqqında rəsmi elanın verilməsi və orada əks olunan məlumatlar, torpaqların alınması təklifi ilə bağlı alan orqan tərəfindən ictimai iclasların keçirilməsi, onların məqsədi və orada müzakirə olunan məsələlərlə əlaqədar hesabatın hazırlanıb nəzarət orqanına təhvil verilməsi barədə maddələr öz əksini tapıb.
Sənəddə, həmçinin torpağın alınmasının məqsədləri və zəruriliyi, alınan torpağın qiymətləndirilməsi, qiymətləndirilmənin nəzarət orqanı tərəfindən yoxlanılması, alınmadan imtina, alınan torpağın satın alınması səlahiyyəti, torpağın satın alınması təklifi və bununla bağlı danışıqlar, həmçinin sahibliyin əldə edilməsi, kompensasiya ilə bağlı iddialar, kompensasiyanın qiymətləndirilməsində nəzərə alınması tələb olunan amillər, ödənilən kompensasiyanın mahiyyəti və növü, kompensasiyanın ödənilməsi ilə bağlı prosedur qaydalar, mübahisələrin həlli və digər məsələlər geniş şəkildə əhatə olunub.
İclasda iştirak edən komitə üzvləri, parlament aparatının əməkdaşları, aidiyyəti qurumların nümayəndələri layihə ilə bağlı öz fikirlərini söyləyiblər.
Sonda qanun layihəsinin birinci oxunuşda Milli Məclisin müzakirəsinə təqdim edilməsi qərara alınıb.

Paylaş:

Baxılıb: 1552 dəfə