XİN: Etnik təmizləməni öz müqəddəratını təyinetmə kimi təqdim etmək beynəlxalq ictimaiyyətə hörmətsizlikdir

Bakı:

24 °C

88 %

2 m/s

AZ RU EN

Ana səhifə / Siyasət / XİN: Etnik təmizləməni öz müqəddəratını təyinetmə kimi təqdim etmək beynəlxalq ictimaiyyətə hörmətsizlikdir

XİN: Etnik təmizləməni öz müqəddəratını təyinetmə kimi təqdim etmək beynəlxalq ictimaiyyətə hörmətsizlikdir

02.03.2016 [09:28]

Xocalı soyqırımı və 2008-ci il martın 1-də Yerevanda törədilmiş siyasi terrorun növbəti ildönümü günlərində BMT-nin İnsan Hüquqları Şurasında çıxış edən Ermənistanın xarici işlər naziri hər hansı xəcalət və ya utanc hissi keçirmədən soyqırımı əməllərinin qarşısının alınması, insan hüquqlarının müdafiəsi və xalqların öz müqəddəratını təyin etməsi prinsipi barədə yalan dolu və təhrif olunmuş fikirlərlə çıxış edib.
Azərbaycan Xarici İşlər Nazirliyinin mətbuat xidmətinin rəhbəri Hikmət Hacıyevin bununla bağlı açıqlamasında deyilir: “Ermənistan xarici işlər nazirinin yaddaşını təzələmək istərdik ki, 1975-ci il Helsinki Yekun Aktında öz təsbitini tapmış prinsiplərin üzvi şəkildə bir-biri ilə bağlı olduğu, onların bərabər və ümumilikdə tətbiq olunmasının vacibliyi qeyd edilərək, ilk növbədə bir dövlətin digər dövlətin ərazi bütövlüyü və ya siyasi suverenliyinə qarşı güc tətbiq etmək və ya güc tətbiq edərək hədələməkdən çəkinməsi kimi öhdəliyinin olduğu bildirilir.
Sənəddə dövlətlərin sərhədlərinin toxunulmazlığı və ərazi bütövlüyü prinsipləri bir daha təsdiq edilərək, güc vasitəsilə ərazi əldə olunmasının qəbuledilməzliyi vurğulanır. Bununla bərabər, dövlətlərin ərazi bütövlüyü və ya siyasi suverenliyinə qarşı gücdən istifadənin nəticəsində yaranmış vəziyyətin hüquqi qəbul edilməməsinə dair dövlətlərin öhdəliyi var. Həmçinin xalqların öz müqəddəratını təyin etməsi hüququnun ifadəsi hər hansı dövlətin ərazi bütövlüyü və ya siyasi müstəqilliyinə qarşı fəaliyyətin həyata keçirilməsinə imkan verən hal kimi təfsir oluna bilməz. Helsinki Yekun Aktının 8-ci bəndində deyilir: “İştirakçı dövlətlər xalqların bərabər hüquqları və öz müqəddəratını təyin etmək hüququna hörmət edərək, bütün hallarda BMT Nizamnaməsinin məqsəd və prinsipləri və beynəlxalq hüququn müvafiq normaları, eləcə də dövlətlərin ərazi bütövlüyünə uyğun şəkildə fəaliyyət göstərəcəklər.
Ermənistan güc tətbiq edərək Azərbaycan ərazilərinin işğalı və zəbt olunmuş torpaqlarda törədilmiş etnik təmizləmənin nəticələrini pərdələmək üçün “öz müqəddəratını təyinetmə” prinsipindən sui-istifadə edir”.
Açıqlamada bildirilir ki, Ermənistan xarici işlər naziri əslində zaman və məkan baxımından BMT-nin İnsan Hüquqları Şurasında Xocalı və ölkəmizin işğal olunmuş digər ərazilərində Azərbaycan xalqına qarşı törədilmiş soyqırımı, insanlıq əleyhinə cinayət və hərbi cinayət əməllərinin etiraf edilməsi, Ermənistanda insan hüquqlarının acınacaqlı vəziyyətinə və 2008-ci il martın 1-də Yerevan hadisələrinə qiymət verilməsi və həll yollarının təklif edilməsi üçün əlverişli imkanlara malik olsa da, bundan istifadə etməyib.
BMT-nin İnsan Hüquqları Şurasında çıxış edərək, digər dövlətə qarşı törədilmiş işğal, təcavüz, terror və qanlı etnik təmizləməni öz müqəddəratını təyinetmə kimi təqdim etmək və digər ali dəyərlərdən danışmaq BMT təsisatlarına və beynəlxalq ictimaiyyətə qarşı hörmətsizlikdən başqa bir şey deyil.

Paylaş:

Baxılıb: 850 dəfə