Milli Məclisdə bəzi qanunlara dəyişikliklər edilib

Bakı:

22 °C

52 %

1 m/s

Əlaqə

AZ RU EN

Ana səhifə / Siyasət / Milli Məclisdə bəzi qanunlara dəyişikliklər edilib

Milli Məclisdə bəzi qanunlara dəyişikliklər edilib

16.05.2015 [12:09]

Parlamentin iclasında “Vətəndaşların müraciəti haqqında” qanun layihəsi qəbul olunub
Dünən Milli Məclisin növbəti iclası keçirilib. İclasda bir sıra qanunlar müzakirə olunub. İlk olaraq “Reklam haqqında” qanun layihəsi üçüncü oxunuşda müzakirəyə çıxarılıb. Layihə haqqında parlamentin İqtisadi siyasət komitəsinin üzvü Vahid Əhmədov bildirib ki, qanun layihəsinin üçüncü oxunuşda müzakirəyə təqdim olunan mətnində birinci və ikinci oxunuş zamanı deputatların irəli sürdükləri təkliflər nəzərə alınıb. Qanun layihəsində Azərbaycan dilinin normalarına uyğunluq tələbi əsas götürülən məsələlərdən biridir. Eyni zamanda, layihədə “sosial reklam” anlayışına, onun hazırlanması və yayımlanması qaydalarına aydınlıq gətirilib. Belə ki, Azərbaycanda bütün reklam yayımçıları ümumi reklam vaxtının, nəşrlərdəki reklam yerlərinin, reklam qurğularının ən azı 8 faizini sosial reklamlar üçün ayırmağa məcbur ediləcək. Qanun layihəsinə əsasən, teleradioda sosial reklamların vaxtı saat 9:00-dan saat 24:00-a qədər müəyyən edilib. Həmçinin, tərkibində 5 faizdən yuxarı alkoqol olan içkilərin reklamının yayımlanma vaxtına da məhdudiyyət qoyulub və dövri nəşrlərin üz, arxa qapağında belə reklamların yerləşdirilməsi qadağan edilib. Müzakirələrdən sonra sənəd qəbul edilib.
Daha sonra “Azərbaycan Respublikasının Mərkəzi Bankı haqqında” qanuna dəyişikliklər edilib.
İkinci oxunuşda müzakirəyə təqdim olunan “Vətəndaşların müraciətləri haqqında” qanun layihəsi barədə isə Milli Məclisin Hüquq siyasəti və dövlət quruculuğu komitəsinin sədri Əli Hüseynli məlumat verib. Ə.Hüseynli bildirib ki, bu qanun Azərbaycan Konstitusiyasına uyğun olaraq vətəndaşların müraciət etmək hüququnun həyata keçirilməsi ilə bağlı hüquqi münasibətləri tənzimləyir. Onun sözlərinə görə, sənəd, həmçinin, vəzifəli şəxslər tərəfindən müraciətlərə baxılması qaydasını müəyyən edir.
“Demokratik cəmiyyətdə bu məsələ vətəndaş-dövlət münasibətləri baxımından çox vacibdir. Hesab edirəm ki, bu qanun vətəndaşların müraciətlərinə daha effektiv baxılması üçün müsbət təsir göstərəcək. Ümumilikdə, bu sahədə müvafiq addımlar atılıb. Amma Milli Məclis tərəfindən belə bir qanunun qəbul olunması vətəndaş-dövlət münasibətlərinə əhəmiyyətli töhfədir”, - deyə komitə sədri vurğulayıb.
Milli Məclisin Sosial siyasət komitəsinin sədr müavini Musa Quliyev bildirib ki, bu qanun vətəndaş-dövlət münasibətlərinin sivil formada qurulması baxımından çox əhəmiyyətlidir. Onun sözlərinə görə, dövlət qurumları vətəndaşların müraciətlərinə həssaslıqla yanaşır. Bununla belə, millət vəkili qanun layihəsi ilə bağlı müəyyən təkliflər verib: “Hesab edirəm ki, qanunun adında dəyişikliklər edilməlidir. Çünki müvafiq maddələrdə vətəndaşlığı olmayan əcnəbilərin də müraciətlərinə baxılması məsələləri əksini tapır. Eyni zamanda, sənəddə müraciətlərin dövlət dilində cavablandırılması da çox düzgün əks olunub. Amma edilən müraciətlər də mütləq dövlət dilində olmalıdır və bu məqam qanunda əksini tapmalıdır”.
“Azərbaycan dövləti ölkədə şəffaflığın təmin olunması, vətəndaş-məmur münasibətlərinin yüksək səviyyədə təmin edilməsi ilə bağlı güclü siyasi iradə nümayiş etdirir. İdarəçilik sahəsində həyata keçirilən tədbirlərin davamlılığının təmin edilməsi, dövlət orqanlarının fəaliyyətində şəffaflığın artırılması, idarəçiliyin müasir standartlara uyğun qurulması, açıq hökumət prinsiplərinin təşviq edilməsi, vətəndaşların müraciətlərinin qəbul olunması və araşdırılması qaydalarının təkmilləşdirilməsi istiqamətində mühüm işlər görülüb”. Bu fikirləri isə Milli Məclisin deputatı Sahibə Qafarova çıxışı zamanı ifadə edib.
S.Qafarova bildirib ki, Prezident İlham Əliyev ölkəmizdə yüksək məmur-vətəndaş münasibətlərinin qurulması ilə bağlı daim öz fikirlərini bildirir. Onun sözlərinə görə, dövlət başçısı həmişə vurğulayıb ki, vətəndaş-məmur münasibətlərində siyasi mədəniyyət olmalıdır və insanlara hörmətlə yanaşmaq lazımdır.
“Azərbaycanın müasir reallıqlarında bu qanunun əhəmiyyəti olduqca vacibdir. Çünki Azərbaycan demokratik inkişaf yolunda irəliləyir. İnkişaf isə davamlı prosesdir, hər mərhələdə günün tələblərinə uyğun olaraq müvafiq addımların atılması vacibdir”, - deyə S.Qafarova qeyd edib.
Müzakirələrdən sonra qanun layihəsi qəbul olunub.
İclasda, həmçinin, “Qiymətli kağızlar bazarı haqqında” qanun qəbul olunub, Mülki Məcəlləyə isə dəyişikliklər edilib.
Nardar BAYRAMLI

Paylaş:

Baxılıb: 645 dəfə