Akademik Ramiz Mehdiyevin “İkili standartların dünya nizamı və müasir Azərbaycan” məqaləsi bəzi QHT və donorlara ciddi xəbərdarlıqdır

Bakı:

26 °C

44 %

4 m/s

AZ RU EN

Ana səhifə / Siyasət / Akademik Ramiz Mehdiyevin “İkili standartların dünya nizamı və müasir Azərbaycan” məqaləsi bəzi QHT və donorlara ciddi xəbərdarlıqdır

Akademik Ramiz Mehdiyevin “İkili standartların dünya nizamı və müasir Azərbaycan” məqaləsi bəzi QHT və donorlara ciddi xəbərdarlıqdır

06.12.2014 [12:08]

Prezident Administrasiyasının rəhbəri, akademik Ramiz Mehdiyevin “İkili standartların dünya nizamı və müasir Azərbaycan” adlı məqaləsində dünyanın geosiyasi güclərinin vətəndaş cəmiyyəti institutları vasitəsilə müxtəlif dövlətlərin “mədəni” işğalı məqsədi ilə həyata keçirdiyi çoxşaxəli siyasəti mükəmməl təhlil edilib.
Bu sözləri Azərbaycan Respublikasının Prezidenti yanında Qeyri- Hökumət Təşkilatlarına Dövlət Dəstəyi Şurasının sədri, Milli Məclisin deputatı Azay Quliyev deyib. A.Quliyev bildirib ki, Azərbaycanda vətəndaş cəmiyyəti institutlarına dövlət qayğısının, bu sahəyə ayrılan maliyyənin həcminin hər il artırılmasına baxmayaraq, hələ də bir sıra xarici dövlətlərin maraqlarının ifadəçisi missiyasından əl çəkməyən, milli təhlükəsizliyimizə təhdidlər törədə bilən QHT-lər var.
Prezident Administrasiyasının rəhbəri haqlı olaraq məqalədə qeyd edir ki, Azərbaycan hökuməti ölkəmizdə vətəndaş cəmiyyəti quruculuğu sahəsində davamlı siyasət həyata keçirir. 2007-ci ildə Prezident İlham Əliyevin Sərəncamı ilə Azərbaycan Respublikasının Prezidenti yanında QHT-lərə Dövlət Dəstəyi Şurası yaradılıb. Şuranın yerli QHT-lərə müxtəlif istiqamətlər üzrə ayırdığı maliyyənin həcminin ötən illər ərzində artım dinamikası da bu siyasətin göstəricisidir. Belə ki, 2008-ci ildə Şura tərəfindən yerli QHT-lərin layihələrinə 1,2 milyon manat vəsait ayrılmışdısa, 2014-cü ildə bu rəqəm 4 milyon manat olub. Məqalədə göstərildiyi kimi, Şura 2008-ci ildə insan hüquqları və demokratiya sahəsində 20 layihəyə 166 min manat məbləğində maliyyə ayırmışdısa, artıq 2013-cü ildə belə layihələrin sayı 46-ya, onların büdcəsinin ümumi həcmi isə 543 min manata çatıb. Bütün bunlar Azərbaycan dövlətinin demokratik dəyərlərin, insan hüquqlarının təminatı, xüsusilə vətəndaş sektorunun inkişafı sahəsində nümayiş etdirdiyi siyasi iradənin nəticəsidir.
Şura sədri qeyd edib ki, hələ də xarici donorların bir sıra QHT-lərə nağd pul verməsi, onları Azərbaycanın beynəlxalq imicini ləkələməyə xidmət edən hesabatlar hazırlamağa, dövlətin konstitusion quruluşunu zorakılıqla dəyişmək istiqamətində fəaliyyətə sövq etməsi kimi çoxsaylı hüquqazidd halların mövcudluğu təəssüf doğurur. Heç kimə sirr deyil ki, “beşinci kolon”a çevrilən bu cür qurumlar Qərb dairələrinin siyasi maraqlarının ifadəçiləridir.
Akademik Ramiz Mehdiyevin məqalədə qeyd etdiyi çoxsaylı faktlar bu durumu tam çılpaqlığı ilə göstərir.
Azay Quliyev qeyd edib ki, Prezident Administrasiyasının rəhbəri, akademik Ramiz Mehdiyevin məqaləsi bəzi QHT və donorlara nəticə çıxarmaları üçün ciddi xəbərdarlıqdır.

Paylaş:

Baxılıb: 731 dəfə