“20 Yanvar faciəsinin Azərbaycan xalqının milli azadlıq hərəkatında yeri və rolu”

Bakı:

21 °C

60 %

0 m/s

Əlaqə

AZ RU EN

Ana səhifə / Siyasət / “20 Yanvar faciəsinin Azərbaycan xalqının milli azadlıq hərəkatında yeri və rolu”

“20 Yanvar faciəsinin Azərbaycan xalqının milli azadlıq hərəkatında yeri və rolu”

22.01.2014 [11:35]

Bişkekdə bu mövzuda elmi-nəzəri konfrans keçirilib
Türkdilli Dövlətlərin Siyasətinə Dəstək Fondu Bişkek şəhər kitabxanalar sistemi ilə birgə “20 Yanvar faciəsinin Azərbaycan xalqının milli azadlıq hərəkatında yeri və rolu” adlı elmi-nəzəri konfrans keçirib.
Konfransdan əvvəl təşkilatçılar Bişkek şəhər kitabxanalar sisteminə daxil olan 30 kitabxananın hər birinə Azərbaycan Respublikası Prezidenti Administrasiyasının rəhbəri, akademik Ramiz Mehdiyevin Bişkekdə fond tərəfindən qırğız və rus dillərində nəşr edilmiş “Azərbaycanlılara qarşı soyqırım gerçəkliyi” adlı kitabından 30 nüsxə verib. Məlumat üçün bildirək ki, bu kitabda 20 Yanvar faciəsindən bəhs olunur.
Elmi- nəzəri konfransı Bişkek şəhər kitabxanalar sisteminin direktoru Gülsayra Dandıbayeva açaraq 1990-cı ilin yanvar ayında Azərbaycan xalqının başına gətirilən faciədən danışıb.
Sonra çıxış edən Türkdilli Dövlətlərin Siyasətinə Dəstək Fondunun prezidenti Nüsrət Məmmədov deyib ki, 24 il əvvəl baş vermiş 20 Yanvar faciəsi insanlığa qarşı törədilmiş cinayətdir: “Xalqımızın yaddaşına Qara Yanvar gecəsi kimi həkk olunmuş bu tarix həm şəhidlərin anım günü, həm də Azərbaycanın ərazi bütövlüyü uğrunda mübarizə aparan xalqımızın birliyi, həmrəyliyi günüdür. Bütün cinayət hadisələri kimi, bu qanlı aksiyanın da sifarişçiləri və icraçıları vardı. 1988-ci ildən başlayaraq keçmiş Dağlıq Qarabağ Muxtar Vilayətində güclənən erməni separatizminə keçmiş sovet hökuməti tərəfindən rəvac verilməsi, Azərbaycana qarşı qərəzli mövqe nəticəsində bu vilayətin idarə və təşkilatlarının tədricən respublikamızın tabeliyindən çıxarılması, azərbaycanlıların Ermənistandakı tarixi-etnik torpaqlarından deportasiya edilməsi xalqımızın səbrini tükəndirmişdi. Məhz xalqın etirazına cavab olaraq, sovet hökuməti Azərbaycanı cəzalandırmaq üçün bu qırğını törətdi. 1990-cı il yanvarın 19-dan 20-nə keçən gecə sovet ordusunun hərbi hissələri və zirehli texnikası heç bir xəbərdarlıq etmədən Bakı və Sumqayıt şəhərlərinə, habelə ölkəmizin bir çox şəhər və rayonlarına yeridildi. Hərbi gəmilərdən çıxarılan desant qrupları da şəhər üzərinə hücuma keçdi”.
Nüsrət Məmmədov əlavə edib ki, həmin vaxt Stavropol, Rostov və Krasnodardan erməni əsilli zabit və əsgərlər hərbi əməliyyatlara cəlb edilmişdi. “Nəticədə beynəlxalq hüquq normaları, keçmiş SSRİ-nin və Azərbaycan SSR-nin konstitusiyalarının müvafiq müddəaları kobudcasına pozulmuş, öz torpaqlarının, milli mənliyinin müdafiəsinə qalxmış çoxmillətli xalqımıza vəhşicəsinə divan tutulmuşdur. Bakıya daxil olan silahlı qoşunlar milliyyətindən, yaşından və cinsindən asılı olmayaraq, 147 silahsız mülki şəxsi amansızcasına öldürmüş, paytaxtda, şəhərətrafı qəsəbələrdə və rayonlarda 744 dinc, günahsız insan yaralanmış, yüzlərlə adam itkin düşmüş, 841 nəfər qanunsuz həbs edilmişdi”.
O çıxışının sonunda, ümid etdiyini bildirib ki, bu qanlı aksiya insanlıq əleyhinə cinayət kimi tezliklə beynəlxalq hüquqi qiymətini alacaq.
Daha sonra çıxış edənlər Osman Səfərov, Süleyman Bayramov və başqaları 20 Yanvar faciəsi barədə geniş məlumat veriblər.
Tədbirin sonunda Azərbaycanın başına gətirilən faciələrdən bəhs edən film göstərilib və iştirakçılara, həmçinin, kitabxananın oxucularına Azərbaycan Respublikası Prezidenti Administrasiyasının rəhbəri, akademik Ramiz Mehdiyevin Bişkekdə fond tərəfindən qırğız və rus dillərində nəşr edilmiş “Azərbaycanlılara qarşı soyqırım gerkçəkliyi” kitabı hədiyyə edilib.

Paylaş:

Baxılıb: 1082 dəfə