Hardo Aasməe: Azərbaycanın bu gün Aİ ilə yaxınlaşma sazişlərinə ehtiyacı yoxdur, çünki Azərbaycan bunsuz da güclü dövlətlərdən birinə çevrilir

Bakı:

21 °C

55 %

5 m/s

AZ RU EN

Ana səhifə / Siyasət / Hardo Aasməe: Azərbaycanın bu gün Aİ ilə yaxınlaşma sazişlərinə ehtiyacı yoxdur, çünki Azərbaycan bunsuz da güclü dövlətlərdən birinə çevrilir

Hardo Aasməe: Azərbaycanın bu gün Aİ ilə yaxınlaşma sazişlərinə ehtiyacı yoxdur, çünki Azərbaycan bunsuz da güclü dövlətlərdən birinə çevrilir

19.12.2013 [09:20]

“Delfi” xəbər portalında Estoniya Milli Ensiklopediyasının baş redaktoru Hardo Aasməenin “Azərbaycan Avropa İttifaqına yaxınlaşır” sərlövhəli məqaləsi yerləşdirilib. Məqalədə bu yaxınlarda Vilnüsdə Aİ ilə Ukrayna arasında sazişin imzalanmaması, Moldova və Gürcüstan müqavilələri haqqında Avropada gedən müzakirələr fonunda Avropa İttifaqının III “Şərq tərəfdaşlığı” Sammitində iştirak edən daha bir dövlətin - Azərbaycanın diqqətdən kənarda qalmasından söhbət açılır.
H.Aasməe qeyd edir ki, məhz Azərbaycan Vilnüsdə Aİ ilə viza rejiminin sadələşdirilməsi sazişini imzalayıb. Bu, ilk baxışdan o qədər də vacib olmayan saziş kimi görünsə də, məhz bu gün Azərbaycan ən güclü inkişaf etmiş dövlətlərlə iqtisadi əlaqələr yaradıb. Azərbaycan özü MDB-nin üzvü olsa da, onun əsas iqtisadi və ticarət əlaqələri Qərb dövlətləri ilədir.
Müəllif yazır ki, adətən Aİ ilə əməkdaşlıq etmək istəyən dövlətlər üçün əsas məqsəd bu qurumun üzvü olan ölkələrlə ticarət əlaqələrinin yaradılmasıdır. Məhz Azərbaycanın bu gün buna ehtiyacı yoxdur. Bu dövlət Cənubi Qafqazda “yerli iqtisadiyyat liqasında” birinciliyi çoxdan əldə edib. Cənubi Qafqaz iqtisadiyyatında Azərbaycanın 75 faiz, Gürcüstanın 15 faiz, Ermənistanın isə 10 faiz payı var.
Azərbaycanın Aİ ilə azad ticarət müqaviləsinə və ya Qərb kapitalının ölkəyə cəlb olunması sazişlərinə ehtiyacı yoxdur. Çünki artıq investorlar çoxdandır ki, Azərbaycanda fəaliyyət göstərirlər.
Bugünkü Azərbaycan özü xarici ölkələrə investisiya yatıran dövlətə çevrilib və bunun ilk bəhrələrini Gürcüstan iqtisadiyyatı görür. Hətta Azərbaycanda zarafatla deyirlər ki, Ermənistanda özgələrinin pulu, Gürcüstanda bizim pulumuz, Azərbaycanın isə öz pulu var.
Bakı-Tbilisi-Qars dəmir yolu Azərbaycanın vəsaiti ilə tikilir, çünki Ermənistan lobbisinin təsiri ilə bu layihə xarici investisiya ala bilməyib.
Azərbaycanın öz vəsaiti hesabına maliyyələşdirdiyi layihələrin sayı çoxdur və belə nəticəyə gəlmək olar ki, Azərbaycanın bu gün Aİ ilə yaxınlaşma sazişlərinə ehtiyacı yoxdur. Çünki Azərbaycan bunsuz da güclü dövlətlərdən birinə çevrilir.
Aİ-nin üzvü olmaq istəyini Azərbaycan heç vaxt bildirməyib. Amma unutmaq lazım deyil ki, Azərbaycan hazırda müharibə vəziyyətində olan dövlətdir. Azərbaycan torpaqlarının 20 faizini Ermənistan işğal edib.
Aİ-yə üzv olan dövlətlər Azərbaycan ilə məhdudlaşmayan mədəni, iqtisadi əlaqələr yaratmalıdırlar. Estoniya da Azərbaycan ilə münasibətdə məhz bu istiqaməti əsas götürməlidir.

Paylaş:

Baxılıb: 983 dəfə