III “Şərq tərəfdaşlığı” sammiti Avropa İttifaqının Azərbaycanla əməkdaşlıqda maraqlı olduğunu növbəti dəfə göstərdi

Bakı:

24 °C

70 %

4 m/s

AZ RU EN

Ana səhifə / Siyasət / III “Şərq tərəfdaşlığı” sammiti Avropa İttifaqının Azərbaycanla əməkdaşlıqda maraqlı olduğunu növbəti dəfə göstərdi

III “Şərq tərəfdaşlığı” sammiti Avropa İttifaqının Azərbaycanla əməkdaşlıqda maraqlı olduğunu növbəti dəfə göstərdi

05.12.2013 [09:28]

Azərbaycanla Avropa İttifaqı arasında geniş sahəni əhatə edən dərin tərəfdaşlıq münasibətləri mövcuddur və əməkdaşlığın inkişaf etdirilməsi hər iki tərəf üçün mühüm əhəmiyyət kəsb etməkdədir
Müasir beynəlxalq münasibətlər sisteminin suveren və nüfuzlu aktoru olan Azərbaycan Respublikasının xarici siyasət strategiyasının mühüm istiqamətlərindən birini Avroatlantik məkana inteqrasiya təşkil edir. Dövlətimiz məhz bu cür paritet inteqrasiyanın fonunda Avroatlantik məkanın başlıca təsisatları ilə özünün milli maraqları əsasında qarşılıqlı faydalı əməkdaşlıq münasibətlərinin inkişafına xüsusi əhəmiyyət verir. Məhz bu cür münasibətlərdən birini də Azərbaycan-Avropa İttifaqı (Aİ) əlaqələri təşkil edir.
Ümumiyyətlə, Azərbaycanla Aİ arasındakı münasibətlər miqyasına görə regional, əhəmiyyətinə görə qlobal xarakter daşıyır. Müxtəlif proqramlar çərçivəsində davam etdirilən tərəfdaşlıq münasibətlərinin inkişafı tərəflərin strateji maraqlarına xidmət edir. Məhz bu kontekstdə son olaraq 28-29 noyabr tarixlərində Litvanın paytaxtı Vilnüsdə baş tutan Avropa İttifaqının III “Şərq tərəfdaşlığı” sammiti deyilənləri təsdiq edir. Xatırladaq ki, sammit çərçivəsində ölkəmiz ilə Aİ arasında viza rejiminin sadələşdirilməsi barədə saziş imzalanıb. Sazişi Azərbaycan tərəfdən xarici işlər naziri Elmar Məmmədyarov, qarşı tərəfdən isə Avropa komissarı Ştefan Füle və Litvanın xarici işlər naziri Linas Linkyeviçyus imzalayıblar. Gələn il qüvvəyə minəcək saziş Azərbaycanla Avropa İttifaqı arasındakı əlaqələrin inkişafı və dərinləşdirilməsi baxımından mühüm əhəmiyyət kəsb edir. Təsadüfi deyil ki, Avropa İttifaqı Şurasının prezidenti Herman Van Rompuy Avropa İttifaqı ilə Azərbaycan arasında viza rejiminin sadələşdirilməsini nəzərdə tutan Sazişin imzalanmasını Azərbaycanı Avropa İttifaqına daha da yaxınlaşdıran mühüm addım kimi qiymətləndirib. Bildirilib ki, “Şərq tərəfdaşlığı”na üzv ölkələr ilə imzalanacaq digər sənədlər də bu prosesə töhfəsini verəcək.
Xüsusi olaraq qeyd etmək lazımdır ki, Avropa İttifaqının Azərbaycanla əməkdaşlığa xüsusi diqqət yetirməsi təsadüfi xarakter daşımır. Ümumiyyətlə, Azərbaycanla Avropa İttifaqı arasında geniş sahəni əhatə edən dərin tərəfdaşlıq münasibətləri mövcuddur və əməkdaşlığın inkişaf etdirilməsi hər iki tərəf üçün mühüm əhəmiyyət kəsb etməkdədir. Məhz bu cür qarşılıqlı etimad mühiti və dərin əməkdaşlığın fonunda İttifaq Azərbaycanda həyata keçirilən daxili və xarici siyasət kursunu təqdir etməkdədir.
Əminliklə qeyd etmək olar ki, müstəqil daxili və xarici siyasət kursuna malik olan, regional təhlükəsizliyin qarantı kimi çıxış edən, iqtisadi inkişaf tempinə görə dünya dövlətləri sırasında avanqard yerlərdən birini tutan, heç bir qurumdan, dövlətdən və beynəlxalq təşkilatdan asılı olmayan, ali demokratik dəyərlərin təşəkkül tapdığı bir dövlətlə-Azərbaycan Respublikası ilə əməkdaşlıq münasibətlərinin dərinləşdirilməsi Avropa İttifaqı üçün, sözün əsl mənasında, strateji prioritet qismində çıxış edir. Məhz bunun qanunauyğun nəticəsidir ki, tərəflər arasındakı əməkdaşlığa əsaslanan tərəfdaşlıq münasibətləri mütəmadi surətdə inkişaf etməkdə və yeni keyfiyyət çalarları ilə zənginləşməkdədir. Nəticə etibarilə, ekspertlər Azərbaycan Respublikası ilə Avropa İttifaqı arasındakı münasibətlərin perspektiv inkişafına dair optimist proqnozlar səsləndirməkdədirlər. Proqnoz vermək mümkündür ki, perspektivdə yeni əməkdaşlıq platformaları müəyyənləşdiriləcək və münasibətlərin əhatə dairəsi daha da genişlənəcək.
Nurlan QƏLƏNDƏRLİ

Paylaş:

Baxılıb: 1078 dəfə