Azərbaycan və Böyük Britaniya arasındakı münasibətlər inkişaf edir

Bakı:

26 °C

65 %

7 m/s

Əlaqə

AZ RU EN

Ana səhifə / Siyasət / Azərbaycan və Böyük Britaniya arasındakı münasibətlər inkişaf edir

Azərbaycan və Böyük Britaniya arasındakı münasibətlər inkişaf edir

27.09.2025 [10:17]

Birinci Azərbaycan-Birləşmiş Krallıq Siyasət Dialoqu regional əməkdaşlığa təkan verəcək

Sentyabrın 25-də ADA Universitetində İnkişaf və Diplomatiya İnstitutunun (Institute for Development and Diplomacy - IDD) təşkilatçılığı ilə Birinci Azərbaycan-Birləşmiş Krallıq Siyasət Dialoqunun açılış mərasimi keçirilib. Britaniya-Azərbaycan Ticarət Palatası və bp şirkətinin tərəfdaşlığı ilə həyata keçirilən tədbirdə 50-dən çox ekspert iştirak edib. Tədbirdə parlament üzvləri, yüksəkvəzifəli hökumət rəsmiləri, universitetlərin və beyin mərkəzlərinin tədqiqatçıları və media nümayəndələri də təmsil olunub. İki gün davam edən tədbirdə dəyişən qlobal nizamda Azərbaycan-Birləşmiş Krallıq ikitərəfli münasibətləri və strateji tərəfdaşlıq, Cənubi Qafqazda regional təhlükəsizlik, əməkdaşlıq, xarici siyasət prioritetləri, enerji əməkdaşlığı, təhsil, elm və innovasiya yolu ilə ictimai diplomatiya məsələləri müzakirə olunub.

ADA Universitetinin prorektoru və Milli Məclisin deputatı Fariz İsmayılzadə bildirib ki, Azərbaycan-Birləşmiş Krallıq tərəfdaşlığı yüksək səviyyədədir və mövcud iqtisadi-siyasi proqramlarda fəal əməkdaşlıqlar münasibətləri daha da inkişaf etdirəcək. Böyük Britaniyanın Azərbaycandakı səfiri Fergus Auld isə vurğulayıb ki, Azərbaycan və Birləşmiş Krallıq arasındakı münasibətlər yüksələn xətlə inkişaf edir. Son illərdə isə Azərbaycanın təşəbbüskarlığı sayəsində bölgədə mühüm dəyişikliklər baş verib, enerji-nəqliyyat sektorlarında müsbət səmtdə əsaslı fraqmentasiyalar geocoğrafi mühiti canlandırıb. Azərbaycan və Ermənistan arasında sülh sazişinin paraflanması isə əhəmiyyətli tarixi hadisə olmaqla, bölgədə yeni münbit əməkdaşlıq ruhu yaradır. Qarabağda həyata keçirilən sürətli quruculuq, şəhərlərdə bərpa işlərinin aparılması, ən müasir nəqliyyat qovşaqlarının yaradılması qlobal əhəmiyyətli iqtisadi inteqrasiyaya keçidi gücləndirir.

Böyük Britaniya Parlamentinin Lordlar Palatasının üzvü Lord Aamer Sarfraz isə Azərbaycan və Böyük Britaniyanın özəl sahibkarlar, investorlar arasında əlaqələrin inkişaf etdirilməsinin vacibliyinə diqqət çəkərək müasir rəqəmsal mübadilələr, o cümlədən süni intellekt sahəsində uğurlu layihələrin qurulacağına inamını ifadə edib.

bp şirkətinin Xəzər regionu üzrə vitse-prezidenti Bəxtiyar Aslanbəyli Azərbaycan-Birləşmiş Krallıq Siyasət Dialoqunun ikitərəfli münasibətlərin inkişafı baxımından zəruri addım olduğunu qeyd edib. İki ölkə arasında neft və qaz sahəsində möhkəm tərəfdaşlıq təməlləri üzərində inkişaf edən mühüm layihələr ticarət və mühəndislik, bərpaolunan enerji, innovasiya və rəqəmsal texnologiyalar, “yaşıl enerji” infrastrukturlarının qurulması üzrə bir çox sahələri əhatə etməklə uzunmüddətli əməkdaşlığı daha da dərinləşdirir.

Milli Məclisin deputatı Sevinc Fətəliyeva bildirib ki, ekoloji problemlərin həlli bütün dünya üçün eyni dərəcədə vacibdir və Azərbaycan bu sahəyə xüsusi diqqət edir. Azərbaycan azad edilmiş əraziləri “yaşıl enerji” zonası elan edib, hazırda Qarabağda və Şərqi Zəngəzurda Günəş, su elektrik stansiyalarının tikintisi üzrə layihələr icra edilir. Bu prosesdə Birləşmiş Krallıq da fəal çalışır və bp şirkəti bərpaolunan enerji sektorunda mühüm layihələrə sərmayə qoymaqdadır.

Digər çıxış edən natiqlər vurğulayıblar ki, Birinci Azərbaycan-Birləşmiş Krallıq Siyasət Dialoqu tərəflər arasında mövcud əməkdaşlıq proqramları əsasında yeni imkanları səfərbər etmək və yeni imkanları motivasiya etmək baxımından unikal platformadır.

Beləliklə, Birinci Azərbaycan-Birləşmiş Krallıq Siyasət Dialoqu regional və qlobal çağırışlar üzrə qarşılıqlı anlaşma və praktiki əməkdaşlığa təkan verəcək.

E.CƏFƏRLİ

Paylaş:

Baxılıb: 590 dəfə