Ermənistanın bugünkü rəhbərliyi Xocalı soyqırımına görə birbaşa cinayət məsuliyyəti daşıyır

Bakı:

22 °C

58 %

1 m/s

Əlaqə

AZ RU EN

Ana səhifə / Siyasət / Ermənistanın bugünkü rəhbərliyi Xocalı soyqırımına görə birbaşa cinayət məsuliyyəti daşıyır

Ermənistanın bugünkü rəhbərliyi Xocalı soyqırımına görə birbaşa cinayət məsuliyyəti daşıyır

26.02.2013 [03:02]

Dünən Beynəlxalq Mətbuat Mərkəzində Ailə, Qadın və Uşaq Problemləri üzrə Dövlət Komitəsi (AQUPDK) Xocalı faciəsinin 21-ci ildönümünə həsr edilmiş tədbir keçirib.
AzərTAc xəbər verir ki, orta məktəb şagirdlərinin iştirakı ilə keçirilən tədbirdə Xocalı faciəsi qurbanlarının əziz xatirəsi bir dəqiqəlik sükutla yad edilib.
Xocalı faciəsindən 21 il keçdiyini vurğulayan AQUPDK-nın sədri Hicran Hüseynova insan hüquqlarının kütləvi və kobud şəkildə pozulması ilə nəticələnmiş XX əsrin ən dəhşətli faciəsinə beynəlxalq miqyasda hələ də yetərincə hüquqi qiymət verilmədiyini bildirib.
Qeyd olunub ki, bu gün Xocalı soyqırımının səbəblərini araşdırarkən aydın şəkildə bəlli olur ki, Azərbaycan həmin dövrdə tamamilə tək qalıb, informasiya blokadasına salınıb. Yalnız Azərbaycan xalqının Ümummilli lideri Heydər Əliyevin ölkə rəhbərliyinə qayıdışından sonra bu informasiya blokadası yarılıb, Xocalı soyqırımı dünya ictimaiyyətinə çatdırılıb.
Hazırda Prezident İlham Əliyevin rəhbərliyi ilə dövlət qurumları, vətəndaşlarımız, xaricdəki soydaşlarımız tərəfindən Xocalı həqiqətlərinin dünya ictimaiyyətinə çatdırılması, onun əsl soyqırımı aktı kimi tanıdılması istiqamətində mühüm addımlar atılır. Bu baxımdan Heydər Əliyev Fondunun fəaliyyətini xüsusi vurğulayan Hicran Hüseynova, Fondun prezidenti Azərbaycanın birinci xanımı, UNESCO-nun və ISESCO-nun xoşməramlı səfiri, Milli Məclisin deputatı Mehriban Əliyevanın həyata keçirdiyi işlərdən danışıb.
Heydər Əliyev Fondunun vitse-prezidenti Leyla Əliyevanın təşəbbüsü ilə həyata keçirilən “Xocalıya ədalət!” beynəlxalq kampaniyasının böyük rolu və əhəmiyyəti xüsusi vurğulanıb.
Milli Məclisin deputatı Bəxtiyar Əliyev isə qanlı faciədən danışaraq ermənilərin yerli əhaliyə verdikləri işgəncələri diqqətə çatdırıb. Ermənistan rəhbərliyinin Xocalı soyqırımına görə birbaşa cinayət məsuliyyəti daşıdığını deyən Bəxtiyar Əliyev həmin şəxslərin hərbi cinayətkar olduğunu vurğulayıb.
Milli Televiziya və Radio Şurasının üzvü Sona Vəliyeva XX əsrin bu dəhşətli faciəsi və onun başvermə səbəblərindən danışıb, şəhərin işğalı zamanı dinc əhaliyə qarşı törədilmiş genişmiqyaslı qanlı hərbi cinayət barədə ətraflı məlumat verib. Qeyd edib ki, Xocalıda yüzlərlə əliyalın insan-qoca, cavan, uşaq, qadın görünməmiş amansızlıqla qətlə yetirilib, evlər yandırılıb, şəhər yerlə-yeksan edilib.
Qaçqınların və Məcburi Köçkünlərin İşləri üzrə Dövlət Komitəsi sədrinin müavini Gəray Fərhadov, Əsir və itkin düşmüş, girov götürülmüş vətəndaşlarla əlaqədar Dövlət Komissiyasının sədr müavini Eldar Səmədov 21 il əvvəl erməni silahlılarının Xocalıda dinc əhaliyə qarşı törətdikləri soyqırımı və etnik təmizləmə siyasətindən danışıb, tarixi faktların ermənilərin xalqımıza qarşı daim xəyanətkar mövqedə olmasından xəbər verdiyini bildiriblər.
Tədbirdə Xocalıdan olan yazıçı-publisist Səriyyə Müslümqızının “Xocalı uşaqları - Qan içində qar çiçəyi” kitabının təqdimatı keçirilib.
Tədbirin sonunda orta məktəb şagirdləri tərəfindən Xocalı soyqırımı ilə bağlı 15 ölkəyə məlumat göndərilib.

Paylaş:

Baxılıb: 1098 dəfə