Əkrəm Əylislinin “Daş yuxular”ı “dəfn olundu”

Bakı:

17 °C

57 %

9 m/s

Əlaqə

AZ RU EN

Ana səhifə / Siyasət / Əkrəm Əylislinin “Daş yuxular”ı “dəfn olundu”

Əkrəm Əylislinin “Daş yuxular”ı “dəfn olundu”

02.02.2013 [02:24]

Vətənpərvər gənclər yazıçı Əkrəm Əylislinin “Daş yuxular” əsərinə etiraz olaraq növbəti aksiya keçiriblər
Dünən ölkəmizin vətənpərvər gənclərinin bir qrupu yazıçı Əkrəm Əylislinin “Daş yuxular” əsərinə etiraz olaraq növbəti aksiya keçiriblər. Belə ki, gənclər Xocalı abidəsinin yaxınlığında toplaşaraq növbəti tədbirlərini reallaşdırıblar. Aksiyaçılar üzərinə “Daş yuxular” yazılmış simvolik kitabları üzərinə xaç işarəsi çəkilmiş tabuta qoyaraq, rəmzi dəfn mərasimi keçiriblər. Dəfn mərasimi klarnetdə ifa olunan musiqinin sədaları altında baş tutub.
Qeyd edək ki, tədbirdə daha çox qaçqın və məcburi köçkün gənclər təmsil olunublar. “Bizim torpaqlarımızı ermənilər işğal edib. Belə olan halda Əkrəm Əylislinin azərbaycanlıları ermənilər qarşısında alçaltması bizi çox hiddətləndirir. Ona görə də, biz bu aksiyanı keçirərək onun kitabını dəfn edirik. Amma inanmırıq ki, torpaq onu qəbul etsin”, - deyə gənclər vurğulayıblar.
Aksiya iştirakçısı Sahil Hacıyev deyib ki, gənclərin bu gün toplaşmasının əsas səbəbi Ə.Əylislinin xalqına, torpağına, şəhidlərin ruhuna hörmətsizlik edərək ərsəyə gətirdiyi xəyanət toplusu olan yazıya etiraz bildirməkdir: “Bu cür xəyanətlər və xəyanətkarlar yalnız ölümə məhkumdurlar. Əkrəm həqiqətən erməni olduğunu bir daha sübut etdi”.
Həbib Misirov isə Kəlbəcər rayonundan məcburi köçkündür. H.Misirov qaçqın və məcburi köçkün gənclərin mövqeyini ifadə edərək deyib ki, Əkrəm Əylisli ölkəmizin işğal olunmuş ərazilərində, Xocalıda, Kəlbəcərdə və digər yerlərdə baş verən faciələri unudub: “Ə.Əylisli əsərində dövlətimizin suverenliyi və ərazi bütövlüyü uğrunda canlarından keçən şəhidlərimizin ruhuna toxunur. Qaçqın və məcburi köçkün gənclərin adından deyirəm ki, onun nə xalq yazıçısı adını, nə də “İstiqlal” ordenini daşımağa haqqı yoxdur”.
Bakı Dövlət Universitetinin tələbəsi Nurlan Hacıyevin fikrincə, hər kəs açıq-aşkar erməni işğalına və separatizminə haqq qazandıran, erməniləri təbliğ edən insanın bu ölkədə yaşamasına etirazını bildirməlidir: “Bu gün burada iştirak etməyi gənc olaraq özümə borc bilirəm. Ona görə ki, Əkrəmin etdiyi alçaqyana hərəkətlərinə etirazımı bildirirəm. Əkrəmin erməni sevgisinə gənclərlə yanaşı ziyalılar, o cümlədən, ölkədə yaşayan hər kəs etirazını bildirməlidir”.
Digər bir gənc Tərlan Səfərov isə hesab edir ki, Ə.Əylislinin romanı Azərbaycanın milli-mədəni dəyərlərini aşağılayan, təhqir edən bir “əsər”dir: “Ə.Əylisli faktiki olaraq Naxçıvan və Qarabağı “erməni torpağı” kimi təqdim edir. İşğalçı dövlətə belə bir yazını yazan lazımdır ki, onu mükafatlandırsın. Ə.Əylisli ermənilərin saxtakarlığını həqiqət kimi təqdim etməyə çalışır. Düşmənlə əlbir olaraq xalqımıza qarşı fəaliyyət göstərən Əkrəm Əylisliyə “ar olsun” deyirik! Biz onun kitabını dəfn edirik, amma bilmirik torpağımız onu qəbul edəcək, ya etməyəcək”.
Nardar

Paylaş:

Baxılıb: 1129 dəfə