Azərbaycan Respublikasının Avropa İttifaqı yanında daimi nümayəndəliyinin başçısı etimadnaməsini Avropa İttifaqı Şurasının prezidentinə təqdim edib

Bakı:

17 °C

57 %

7 m/s

AZ RU EN

Ana səhifə / Siyasət / Azərbaycan Respublikasının Avropa İttifaqı yanında daimi nümayəndəliyinin başçısı etimadnaməsini Avropa İttifaqı Şurasının prezidentinə təqdim edib

Azərbaycan Respublikasının Avropa İttifaqı yanında daimi nümayəndəliyinin başçısı etimadnaməsini Avropa İttifaqı Şurasının prezidentinə təqdim edib

10.01.2013 [01:28]

Azərbaycan Respublikasının Belçika Krallığındakı səfiri və Avropa İttifaqı yanında daimi nümayəndəliyinin başçısı Fuad İsgəndərov yanvarın 8-də etimadnaməsini Avropa İttifaqı Şurasının prezidenti Herman van Rompuya təqdim edib.
Səfir Azərbaycan Prezidenti İlham Əliyevin salamlarını Avropa İttifaqı Şurasının prezidentinə çatdırıb, Azərbaycanın Avropa İttifaqı ilə əməkdaşlığın inkişafında prinsipial, bərabərhüquqlu və hər iki tərəfin maraqlarına əsaslanan mövqedən çıxış etdiyini, etibarlı tərəfdaşlardan biri olduğunu bildirib. Azərbaycanda həyata keçirilən siyasi, iqtisadi, infrastruktur və sosial-iqtisadi inkişaf layihələri barədə Herman van Rompuya ətraflı məlumat verən F.İsgəndərov Ermənistanın Azərbaycana qarşı təcavüzü ilə bağlı hazırkı vəziyyətin çox təhlükəli olduğunu və onun bütün region üçün daşıdığı təhdid amillərini xüsusi vurğulayıb. Diplomat, həmçinin mədəniyyətlərarası və dinlərarası dialoqun davamlı inkişafında və Şərq Tərəfdaşlığından da geniş coğrafi məkanda Avropa dəyərlərinin tədricən yayılmasında ölkəmizin müstəsna rolu barədə fikirlərini bölüşmüşdür.
Avropa İttifaqı Şurasının prezidenti Herman van Rompuy Prezident İlham Əliyevin həm onunla, həm də Aİ-nin digər yüksək vəzifəli rəsmiləri ilə keçirdiyi bütün görüşlər barədə xoş təəssüratlarını qeyd edib, dövlətimizin başçısının ölkəsinin Avropa İttifaqı nümunəsində müasirləşməsinə və inkişaf etməsinə böyük önəm verdiyinin şahidi olduğunu deyib. Herman Van Rompuy Azərbaycanın dostu olaraq bu məqsədə töhfə verməkdən məmnunluğunu bildirib, Azərbaycan Prezidenti İlham Əliyevə salamlarının və ən xoş arzularının çatdırılmasını xahiş edib.
Herman van Rompuy Aİ-Azərbaycan münasibətlərinin ildən-ilə inkişaf etdiyini, ölkəmizin Şərq Tərəfdaşlığı çərçivəsində fəal iştirakının vacib olduğunu və bir sıra əməkdaşlıq sahələrində tərəqqinin əldə edildiyini xüsusi vurğulayıb. Aİ Şurasının prezidenti Azərbaycanın Avropada formalaşan müsbət imicinin siyasi və iqtisadi islahatların davam etdirilməsi ilə daha da güclənəcəyinə əmin olduğunu bildirib və bundan sonra ölkəmizlə güclü tərəfdaş münasibətlərinin formalaşması üçün lazımi zəminin artıq yaradıldığını qeyd edib. Herman Van Rompuy cari ildə Azərbaycanda növbəti prezident seçkilərinin də ədalətli və şəffaf keçiriləcəyinə və gənc müstəqil ölkəmizdə demokratiya dəyərlərinin getdikcə təkmilləşdiriləcəyinə əminliyini bildirib. Avropa İttifaqının rəsmisi Azərbaycan Prezidenti İlham Əliyevin 2012-ci il 26 dekabr tarixli Sərəncamı ilə 87 məhbusun əfv olunmasının Aİ tərəfindən rəğbətlə qarşıladığını da qeyd edib. Bundan başqa, Avropa İttifaqı Şurasının prezidenti Aİ-nin Azərbaycan ilə əməkdaşlıq dialoqunda enerji təhlükəsizliyi sahəsində strateji tərəfdaşlığının getdikcə gücləndirilməsində ölkəmizin oynadığı mühüm rolu qeyd edərək, “Cənub” qaz dəhlizinin məhz Azərbaycanın səylərinə görə tezliklə reallığa çevriləcəyindən məmnun olduğunu söyləyib.
Herman Van Rompuy Ermənistan-Azərbaycan, Dağlıq Qarabağ münaqişəsində mövcud status-kvonun qəbuledilməz olduğunu bildirib, bu mövzuya son Aİ-Rusiya sammitində Rusiya Prezidenti Vladimir Putin ilə görüşündə də toxunduğunu və münaqişənin həlli prosesinə Aİ-nin töhfə vermək niyyətində olduğunu qeyd edib.
Sonda Avropa İttifaqı Şurasının prezidenti F.İsgəndərova yeni vəzifəsində uğurlar arzulayıb, Avropa İttifaqı ilə Azərbaycan arasında əməkdaşlıq dinamikasının inkişaf edəcəyinə əmin olduğunu vurğulayıb.

Paylaş:

Baxılıb: 1159 dəfə