Rüstəm İbrahimbəyovun əsassız fikirləri özünə qarşı çevrilir

Bakı:

24 °C

63 %

7 m/s

Əlaqə

AZ RU EN

Ana səhifə / Siyasət / Rüstəm İbrahimbəyovun əsassız fikirləri özünə qarşı çevrilir

Rüstəm İbrahimbəyovun əsassız fikirləri özünə qarşı çevrilir

22.11.2012 [00:24]

Onun ziyalı adından danışmağa mənəvi haqqı yoxdur
Bu bir həqiqətdir ki, Azərbaycan ziyalıları dövlətçiliyin inkişafı proseslərində hər zaman öndə gediblər. Ziyalılar Azərbaycanı, onun zəngin mədəni irsini, milli məfkurəsini yaşadıb, gələcək nəsillərə ötürüb, tarixi inkişafımızın hər bir mərhələsində öz elmi, ədəbi, mədəni yaradıcılıqları ilə bəşəriyyətin nailiyyətlərini zənginləşdirib, onun misilsiz irsinin inkişafına xalqımız adından öz töhfələrini veriblər. Amma bəzi insanlar da tapılır ki, özünü “ziyalı” adlandıraraq şəxsi mənafeyi, marağı üçün bu ada ləkə gətirirlər. Belələri ifşa olunduğu təqdirdə isə şəxsi marağını siyasiləşdirməyə cəhd göstərərək xalqın, dövlətin marağını satanlarla birgə xəyanətkar mövqe seçirlər.
Ümumiyyətlə, ölkəmizdə zaman-zaman “ziyalı” adı ilə alver etməyə cəhdlər göstərilsə də, buna cəhd göstərənlər xalqın kəskin etirazı və iradəsi ilə geri çəkilməyə məcbur olublar. Bu gün də bəzilərinin qrup marağı ətrafında cəmləşərək öz fəaliyyətlərini “ziyalılıqla” əlaqələndirməyə cəhd göstərməsi uğursuzluqla müşayiət olunur. Daha doğrusu, dəstə yaradaraq adını ziyalılığa bağlamaq istəyənlərin məqsədləri açıldıqca onların hansı cılız dəyərlərə malik olduğunun, belələrinin “ziyalılığının” sadəcə “ali təhsil” sərhəddindən kənara çıxmadığının şahidi oluruq.
Hələ 2008-ci ildə Rusiya mətbuatına verdiyi açıqlamada xalqını aşağılayan, sanki bundan zövq alan və özünü “elita” sayaraq millətinə yuxarıdan aşağı baxan Rüstəm İbrahimbəyov da belələrindəndir. Amma əsl vətənpərvər insanlar onun çıxışlarına qarşı lazımi cavab veriblər və verməkdə davam edirlər. Hələ həmin vaxt milli dəyərləri təhqir etməyə cəhd göstərən İbrahimbəyov açıq şəkildə Azərbaycandan, azərbaycançılıqdan uzaq olduğunu ortaya qoymuşdu. Onun bəhs edilən dövrdə və sonra verdiyi açıqlamalar göstərdi ki, bu şəxsin siyasi təfəkkürü nə qədər cılızdır. Hələ o dövrdə Azərbaycan ziyalıları uzun illər ərzində Rusiyada yaşayan R.İbrahimbəyovun bir dəfə də olsun erməniləri, Ermənistanın işğalçılıq siyasətini ifşa edən fikirlərlə çıxış etməməsinin səbəblərini soruşmuşdu. Təəssüf ki, bu suallar cavabsız qalmış və İbrahimbəyov yalnız fikirlərini sağa-sola yozmaqla özünü “müdafiə” etməyə çalışmışdı...
İndi isə bəlli olur ki, ötən 3 il ərzində İbrahimbəyov Azərbaycana, milli dəyərlərimizə, xalqımızın maraqlarına qarşı yeni kampaniya başlatmaq üçün sadəcə fürsət gözləyirmiş. Özünə “ziyalı” adını qoyan, əslində isə dövlətin, xalqın maraqlarını tapdamaqla, xalqın iradəsini heçə sayan və xarici maraqlı qrupların əlində yeni oyuncağa çevrilən bir qrupun tərkibində yer almaqla, həmçinin, son açıqlamaları ilə öz kimliyini bir daha ortaya qoyan R.İbrahimbəyov yeni bir məşğuliyyət tapıb. Bu məşğuliyyət isə müxalifət mətbuatına müsahibələr vermək və özünü gündəmdə saxlamaqdır.
Yeri gəlmişkən, R.İbrahimbəyov bir müddət idi ki, paytaxt Bakının mərkəzində “Kino evi” açmaq niyyətində idi. Sonradan bəlli oldu ki, onun əsl məqsədi Şəhidlər xiyabanının ətrafındakı meşə massivini əlinə keçirərək orada özünün biznes marağına xidmət göstərəcək obyektlər tikmək və yaxınları üçün müəyyən şərait yaratmaqdır. Hətta Rusiyada bəzi dairələrlə də bu istiqamətdə danışıqlar aparan, özünə “sponsorlar” tapan, həmin ərazidə biznes və restoran şəbəkəsi yaratmağa çalışan İbrahimbəyov növbəti dəfə Azərbaycanın milli-mənəvi dəyərlərini heçə saydığını nümayiş etdirdi.
Lakin onun bu niyyəti puç oldu. Belə ki, ARDNŞ bu torpaq məsələsi ilə bağlı açıqlama yaydı və “ziyalı” R.İbrahimbəyov bir daha ifşa olundu. Həmin açıqlamada qeyd olunur ki, ARDNŞ tərəfindən son illərdə mədən ərazilərində və neft sənayesi infrastrukturlarının mühafizə zonalarında zəbt edilmiş torpaqlarda qanunsuz tikililərə qarşı qətiyyətli hüquqi tədbirlər həyata keçirilir: “Bu tədbirlər tam hüquqi əsaslarla və ayrı-ayrı insanların şəxsiyyətinə fərq qoyulmadan aparıldığından, təəssüf ki, özünə xüsusi yanaşma tələb edən bəzi şəxslərin etirazları ilə qarşılaşır. R.İbrahimbəyovla əlaqəli torpaq mübahisələri də, bütün digər hallarda olduğu kimi, məhkəmə qərarları ilə tamamlanıb və ARDNŞ-nin qanuni mənafeyi təmin edilib”.
ARDNŞ-in açıqlamalarında bildirilir ki, R.İbrahimbəyov müsahibələrində “əldə etdiyi” torpaq sahələrinin “kino sahəsinin inkişafına yönəlmiş böyük bir layihə üçün” nəzərdə tutulduğunu iddia edib. Lakin məhkəmə araşdırmaları nəticəsində müəyyən edilib ki, həmin torpaq sahələri müxtəlif şəxslərin, daha dəqiq desək, onun ailə üzvlərinin və yaxın qohumlarının adına fərdi yaşayış evlərinin tikilməsi üçün heç bir hüquqi əsası olmayan bələdiyyə qərarları ilə ayrılıb.
Bir sözlə, həmin meşə massivini ələ keçirə bilməyən İbrahimbəyov bundan sonra “demokrat” olmağa başlayıb. Daha doğrusu, bu qədər cılız niyyətin uğrunda “ziyalı” adına ləkə vurmağa çalışan İbrahimbəyov niyyətinin puç olduğunu gördükdən sonra yenidən radikal müxalifət KİV-inə üz tutub. Amma bütün bunlar onun öz əməllərinə haqq qazandırmaq cəhdindən başqa bir şey deyil. Bu “ziyalı” nəzərə almalıdır ki, müsahibələrində səsləndirdiyi əsassız fikirlər elə onun özünə qarşı çevrilir, onu ifşa edir. Ona görə də, R.İbrahimbəyovun danışmağa heç bir mənəvi haqqı yoxdur.
Nardar BAYRAMLI

Paylaş:

Baxılıb: 1078 dəfə