Ermənistanda proseslər əks istiqamət alır

Bakı:

19 °C

82 %

0 m/s

Əlaqə

AZ RU EN

Ana səhifə / Siyasət / Ermənistanda proseslər əks istiqamət alır

Ermənistanda proseslər əks istiqamət alır

25.05.2024 [10:40]

Kilsənin siyasi böhran yaratmaq istəyi ifşa edilir

Ermənistanla Azərbaycan arasında münasibətlərin normallaşması istiqamətində davam edən proses ötən ilin dekabrından yeni yön alıb. İki ölkənin müvafiq delimitasiya və demarkasiya komissiyalarının iştirakı ilə keçirilən görüşlər nəticə etibarı ilə bir sıra razılaşmalar üçün münbit zəmin formalaşdırdı - beləliklə, dövlət strukturlarının birgə açıqlamasının, eyni zamanda, bir sıra məsələlərdə razılaşmaların şahidi olduq. Xüsusilə, Qazax rayonu istiqamətində işğal altındakı Azərbaycan kəndlərinin qaytarılması, delimitasiya ilə bağlı ilkin addımların atılması gələcək üçün də bir sıra mühüm ümidlər formalaşdırır.

Təbii ki, bu razılaşmaların əldə edilməsi, qarşılıqlı anlaşma mühitinin formalaşdırılması, ən əsası sülhlə bağlı ümidlərin yaranması bölgədə destruktiv maraqları olan bəzi xarici güclərin “hesabları” ilə uyğun gəlmir. Nəticə etibarı ilə illərlə Ermənistanı qeyri-konstruktiv mövqe sərgiləməyə “həvəsləndirən” Fransa kimi ölkələr hazırki şəraitdən narahatlıq keçirir - yeni mərhələdə ikili təmasların uğurla nəticələnməsi Fransanın bölgədə Ermənistan üzərindən “yürütməyə çalışdığı” bütün siyasi addımları bloklayacaq. Beləliklə də, Cənubi Qafqazda yeni inkişaf perspektivləri formalaşacaq. Bunun qarşısını almaq üçün isə xarici maraqların təsiri altında olan siyasi qüvvələr yenidən qızışdırılır, onların əli ilə ölkədə siyasi böhran, hətta qarşıdurmalar yaradılmasına çalışılır.

Müxalifətin destruktiv fəaliyyəti...

Təsadüfi deyil ki, bu fakt elə erməni parlamentarilər tərəfindən də təsdiqlənir. Məsələn, mayın 23-də Ermənistan parlamentində keçirilən ənənəvi brifinqdə hakim “Vətəndaş sazişi” partiyasının parlament fraksiyasının katibi Artur Ovannisyan bildirib ki, bəzi müxalifət deputatlarının açıqlamaları sərhəddə yeni eskalasiya riskləri yaradır. Onun sözlərinə görə, söhbət Seyran Ohanyan, Qarnik Danielyan və Hayk Mamicanyandan gedir. Onlar delimitasiya və demarkasiya prosesini yanlış və vaxtından əvvəl hesab edərək onu aktiv şəkildə tənqid edirlər.

“Bu, Ermənistan üçün ciddi eskalasiya riskləri yaradır. Nə baş verə bilər? Bunu özünüz də bilirsiniz”, - deyə Ovannisyan qeyd edib.

Ermənistan parlamentinin sədri də müxalifət deputatları ilə bağlı narazılıqlarını səsləndirib. Alen Simonyan Ermənistanda yerli müxalifətin niyə qanunların az qala 90 faizinin baxılmasında iştirak etmədiyi və vaxtaşırı parlamentdə hökumət saatını boykot etməsini belə şərh edib: “Müxalifət parlamentin əksər iclaslarında iştirak etmir, daimi komissiyaların sədr və müavinləri vəzifələrinə namizədlər irəli sürmür, bu komissiyalarda fəaliyyət göstərmir. Amma parlamentə gəlir, qeydiyyatdan keçir və qanunlara səs verir, əleyhinə çıxırlar və ya bitərəf qalırlar. Təxmin edin niyə? Cavab sadədir: çünki parlamentdə bir iclasda iştirak etmədiyin halda, maaşdan 24 min dram tutulur. Bu, həqiqətən də mövcud olmayan müxalifətin ən yaxşı nümunəsidir”.

Kilsə oğurluqla məşğuldur...

Hazırda daha çox diqqəti cəlb edən “cinah” isə Erməni Apostol Kilsəsidir. Baqrat Qalstanyanın “başçılığı” ilə başladılan və sülhə qarşı olan “etirazların” arxasında “xarici əl”in olması faktı artıq bəlli fakta çevrilib - xüsusilə, bu etirazlarla bağlı Avropanın, konkret olaraq Fransanın mövqeyi onu deməyə əsas verir ki, Paris bölgədəki qeyri-kosntruktiv planlarından əl çəkməyib. Beləliklə də, hər zaman siyasi oyunların əsasında yer alan, hətta bu oyunların “qurucusu” olan erməni kilsəsi yenidən “aktivləşdirilib”. Bir müddət öncə hətta “siyasi qüvvələri birləşdirmə” funksiyasını üzərinə götürməyə “hazır olduğunu” dilə gətirən kilsə və onun başçısı II Qaregin baş nazir Nikol Paşinyana qarşı ədavətini həm də sərhədlərin delimitasiyası üzərindən manipulyasiya etməyə çalışır. Bu isə onu göstərir ki, erməni kilsəsi hər zaman olduğu kimi terror və təhdid yaratmaq üçün hazır vəziyyətdədir. Kilsənin qarşıdurmaları alovlandırmağa istiqamətlənən kursu isə artıq ifşa olunur - erməni deputatlar açıq şəkildə kilsəni siyasi böhrana yol açmaq üçün çalışdığını deyirlər. Belə ki, “Mülki müqavilə” fraksiyasının katibi Artur Ovannisyan bildirib ki, Erməni Apostol Kilsəsinin dövlət üçün faydalı ola biləcək istifadəsiz sahələri var, kilsə bununla məşğul olmalı, maliyyə vəsaitlərinin kölgədən çıxarılmasına şərait yaratmalıdır. Ovannisyan kilsəni oğurluqda ittiham edib: “Bizim anlayışımıza görə xristianlıq oğurluq etməmək, korrupsiyada iştirak etməməkdir. Kilsə bu məntiqi rəhbər tutmalı və korrupsiyanın mümkün olduğu bir vəziyyəti yaratmamalıdır”,-deyə o bildirib.

Qeyd edək ki, Ermənistanda artıq proses əks istiqamətdə cərəyan etməyə başlayıb. Kilsə bütün cəhdlərinə, aksiyalarına, çağırışlarına baxmayaraq Paşinyanı devirə bilmədi - bu isə kilsənin böyük və açıq fiaskosu ola bilər. Zaman keçdikcə, əsl reallıqlar cəmiyyətə aşılandıqca isə insanların bu “etirazlara” marağı da azaldı - beləliklə, Ermənistanda aksiyalar da səngidi, keşiş Baqrat Qalstanyanın ətrafında toplaşanlar dağıldılar. İndi isə Paşinyan və tərəfdarları kilsənin iç üzünü cəmiyyətə göstərmək üçün fəal ifşaetmə kampaniyasına başlayıblar.

SADİQ

Paylaş:

Baxılıb: 1191 dəfə