Arzuxan Əlizadə: Milli həmrəyliyə və sağlam dialoqa xidmət edən siyasi islahatların aparılması təqdirəlayiqdir

Bakı:

25 °C

57 %

1 m/s

AZ RU EN

Ana səhifə / Müsahibə / Arzuxan Əlizadə: Milli həmrəyliyə və sağlam dialoqa xidmət edən siyasi islahatların aparılması təqdirəlayiqdir

Arzuxan Əlizadə: Milli həmrəyliyə və sağlam dialoqa xidmət edən siyasi islahatların aparılması təqdirəlayiqdir

16.03.2021 [09:27]

Müsahibimiz Milli İstiqlal Partiyasının sədri Arzuxan Əlizadədir:
- Arzuxan müəllim, bir ildən artıqdır ki, ölkəmizdə yaranmış yeni siyasi konfiqurasiya partiyalararası münasibətlərin inkişafında hansı rolu oynayıb?
- Ötən ilin əvvəlindən başlayaraq ölkədə yeni siyasi konfiqurasiyanın yaranması, həqiqətən də, siyasi partiyalar və təşkilatlar arasındakı münasibətlərin inkişafında yeni bir mərhələnin başlanğıcını qoydu. Bu, Azərbaycanda siyasi sistemi möhkəmləndirmək, siyasi münasibətləri sağlam zəmində gücləndirmək üçün vacib şərtə çevrildi. Ölkə başçısının nümayiş etdirdiyi siyasi iradə və Prezident Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin rəhbəri Ədalət Vəliyevin siyasi partiyaların rəhbərləri ilə görüşləri istər iqtidar-müxalifət, istərsə də partiyalararası münasibətlərdə yeni bir zəminin formalaşmasını şərtləndirdi. O cümlədən bir sıra partiyaların qeydiyyata alınması, qərargahla təmin olunması ölkənin siyasi sisteminin inkişafına təkan verir.
- Bu həmrəylik, siyasi birlik 44 günlük Vətən müharibəsi dövründə özünü daha qabarıq göstərdi. Həmin dövrdə siyasi partiyaların birgə bəyanat imzalamasının, birlik nümayiş etdirməsinin əhəmiyyəti barədə nə deyə bilərsiniz?
- Ötən il sentyabrın 27-dən başlayaraq Azərbaycan Ordusunun cəbhədə düşmənlə mübarizə apardığı bir zamanda ölkə daxilində siyasi həmrəyliyin daha da gücləndirilməsi zəruri şərtə çevrilmişdi və bu mənada, Azərbaycanda fəaliyyət göstərən 50 siyasi partiyanın Ermənistan silahlı qüvvələrinin genişmiqyaslı təxribatına dair birgə bəyanatı olduqca mühüm əhəmiyyət daşıdı. Bu, bir daha onu sübut etdi ki, ölkəmizdə siyasi baxışlarından asılı olmayaraq, hər bir siyasi partiya və ya vətəndaş yalnız bir hədəf - Qarabağın azad olunması üçün bütün gücünü səfərbər etməyə hazırdır.
- Həyata keçirilən islahatlar, dialoq mühitinin genişləndirilməsi ölkəmizdə yeni siyasi presedentlərə yol açmaqdadır. Məhz bunların fonunda Yeni Azərbaycan Partiyasının VII qurultayında 6 siyasi partiyanın YAP-a qoşulmasını necə dəyərləndirərdiniz?
- Ölkəmizdəki yeni dialoq mühiti siyasətdə yeni tərəqqi məzmunlu konsolidasiyalara səbəb olmaqdadır. Yeni Azərbaycan Partiyasının VII qurultayında 6 siyasi partiyanın YAP-a qoşulmasına dair qərar qəbul etməsi də belə bir xarakter daşıyır. Ümumiyyətlə, milli həmrəyliyə və sağlam dialoqa xidmət edən siyasi islahatların aparılması təqdirəlayiqdir. Bu, ölkənin siyasi mühitində yeni ab-havanın yaranmasına səbəb olub. Vurğuladığımız kimi, aparılan dialoq nəticəsində əksər siyasi partiyaların həm iqtidarla, həm də öz aralarında sağlam münasibətləri formalaşıb, ümummilli məsələlərdə vahid mövqe yaranıb. Ümumiyyətlə, siyasi rəqabətin əsas aləti olaraq partiyaların güclənməsi vətəndaşların maraqlarının müdafiə olunmasında yeni imkanlar yaradır.
- YAP-ın VII qurultayında çıxış edən Prezident İlham Əliyev bildirdi ki, biz yeni dövrdə siyasi dialoqu daha da dərinləşdirməliyik. Sizcə, siyasi dialoqun dərinləşdirilməsi ölkəmizin inkişafında hansı rolu oynayacaq?
- Siyasi dialoq mühitinin inkişaf etdirilməsi siyasi münasibətlərin inkişafında əsaslı yer tutur. Bir məqama diqqət çəkmək istərdim ki, 44 günlük Vətən müharibəsi dövründə nümayiş etdirilən milli birlik, siyasi həmrəylik cəbhədə düşmənlə üz-üzə dayanmış Azərbaycan əsgərinin daha mübariz olmasını şərtləndirdi. O cümlədən bu birlik və həmrəylik Azərbaycana qarşı ikili standartlardan çıxış edən bəzi xarici qüvvələrə də layiqli cavab oldu. Dialoq mühitinin inkişafı, milli həmrəyliyin gücləndirilməsi bəzi xarici qüvvələrin cəmiyyət içində ayrı-seçkilik yaradabilmə imkanlarını puça çıxarır. Sədri olduğum Milli İstiqlal Partiyası istər müharibədən əvvəlki, istər müharibə, istərsə də postmüharibə dövründə öz mövqeyini açıq şəkildə ortaya qoydu. Siyasi dialoqun inkişaf etdirilməsi, siyasi partiyalar arasındakı münasibətlərin müsbət məcra alması gələcək dinamik inkişafımıza müstəsna xidmət göstərəcək.
Pərviz SADAYOĞLU

Paylaş:

Baxılıb: 1219 dəfə