Şuşada ikinci dəfə...

Bakı:

10 °C

87 %

8 m/s

Əlaqə

AZ RU EN

Ana səhifə / Mədəniyyət / Şuşada ikinci dəfə...

Şuşada ikinci dəfə...

13.09.2022 [11:19]

XIV Üzeyir Hacıbəyli Beynəlxalq Musiqi Festivalı keçiriləcək

Günel ABBAS

Azərbaycan professional musiqisinin və milli bəstəkarlıq məktəbinin banisi Üzeyir Hacıbəylinin xatirəsinə həsr olunan Üzeyir Hacıbəyli Beynəlxalq Musiqi Festivalının açılış mərasimi artıq iki ildir Şuşa şəhərində baş tutur. Ümummilli lider Heydər Əliyevin “Üzeyir musiqi gününün keçirilməsi haqqında” müvafiq fərmanına uyğun olaraq, 1995-ci ildən bəri ölkəmizdə hər il ənənəvi şəkildə Üzeyir musiqi günü keçirilir. 2009-cu ildən isə Beynəlxalq Musiqi Festivalı keçirilməsi haqqında yeni qərar qəbul olunub. Festivalın işində azərbaycanlı musiqiçilərlə yanaşı, başqa ölkələrdən olan ifaçılar da iştirak edir. Festival zamanı konsertlərlə yanaşı, Üzeyir Hacıbəylinin əsərləri əsasında teatr tamaşaları səhnəyə qoyulur. Dahi bəstəkarın yaradıcılıq irsini araşdıran elmi konfranslar keçirilir.

2020-ci ilin 44 günlük Vətən müharibəsində Ali Baş Komandanın qətiyyəti, Ordumuzun şücaəti nəticəsində işğal altındakı torpaqlarımız, o cümlədən Üzeyirin doğma şəhəri Şuşa azad edildi. Tarixi ədalət bərqərar oldu və Azərbaycan Respublikası Prezidentinin sərəncamı ilə Şuşa şəhəri Azərbaycanın mədəniyyət paytaxtı elan edildi. Ötən il Üzeyir Hacıbəyli Beynəlxalq Musiqi Festivalının ilk konserti də sentyabrın 18-də - Üzeyir Musiqi Günündə Şuşada keçirildi. Konsert proqramı açıq havada - Xalq artisti Ağaverdi Paşayevin rəhbərliyi altında F.Əmirov adına Azərbaycan Dövlət Mahnı və Rəqs Ansamblı və tanınmış solistlərin iştirakı ilə təqdim olundu.

Mədəniyyət Nazirliyindən “Yeni Azərbaycan”a bildirilib ki, cari ildə də Üzeyir Hacıbəyli XIV Beynəlxalq Musiqi Festivalı digər bölgələrlə yanaşı Şuşada da keçiriləcək: “18-26 sentyabr tarixlərini əhatə edəcək festival üçün xüsusi konsepsiya işlənib hazırlanıb. Builki festival bir neçə xətt üzrə musiqisevərlərin könlünü oxşayacaq. “Üzeyir ənənəsinin sönməyən ulduzları” adı altında bu il yubileyləri olan musiqi xadimlərinə həsr olunan və “Üzeyir sənətinin gənclik sədaları” adı altında proqramlar baş tutacaq.

Eyni zamanda xüsusilə vurğulamaq lazımdır ki, bu il Azərbaycan Respublikası Prezidentinin müvafiq sərəncamlarına əsasən “Şuşa ili”, habelə “Fikrət Əmirovun 100 illiyi” dövlət səviyyəsində qeyd olunur. Bu münasibətlə festival çərçivəsində Şuşa şəhərində bir neçə tədbirin təşkili, eyni zamanda ölkəmizin digər şəhər və bölgələrində - Gəncə, Bərdə, Ağcabədidə konsert və tamaşaların nümayişi planlaşdırılıb. Builki festivala dünyanın müxtəlif ölkələrindən solistlər, dirijorlar, kollektivlər dəvət olunub. Buna misal olaraq ABŞ, Norveç, Fransa, Avstriya, Almaniya, Türkiyə, Yunanıstan, Qazaxıstan, Tatarıstan, Bolqarıstan, Macarıstan, Rusiya, Yaponiya, Cənubi Koreya, Almaniya, Gürcüstandan səfər edəcək musiqiçiləri qeyd etmək olar”.

Qeyd edək ki, Festivalın təşkilatçıları Mədəniyyət Nazirliyi və Heydər Əliyev Fondudur.

Paylaş:

Baxılıb: 1139 dəfə