Vaqif Mustafayev: Azərbaycan-Rusiya humanitar əməkdaşlığı xalqlarımızı bir-birinə daha da yaxınlaşdırır

Bakı:

30 °C

51 %

6 m/s

AZ RU EN

Ana səhifə / Mədəniyyət / Vaqif Mustafayev: Azərbaycan-Rusiya humanitar əməkdaşlığı xalqlarımızı bir-birinə daha da yaxınlaşdırır

Vaqif Mustafayev: Azərbaycan-Rusiya humanitar əməkdaşlığı xalqlarımızı bir-birinə daha da yaxınlaşdırır

04.09.2018 [08:52]

Azərbaycan Respublikasının Prezidenti İlham Əliyevin sentyabrın 1-də Rusiya Federasiyasına rəsmi səfəri ölkələrimiz arasında müxtəlif sahələrdə, o cümlədən humanitar sahədə münasibətlərin inkişafı baxımından mühüm əhəmiyyət kəsb edir.
Bu sözləri “Space” telekanalının rəhbəri, görkəmli kinorejissor, Xalq artisti, Azərbaycan Dövlət mükafatı laureatı, “Şərəf” ordenli Vaqif Mustafayev AZƏRTAC-a açıqlamasında deyib.
Vaqif Mustafayev bildirib ki, Azərbaycan və Rusiya prezidentlərinin Soçi görüşündə humanitar sahədə əlaqələrin genişləndirilməsi məsələsi əsas müzakirə mövzularından biri olub. Dövlətimizin başçısının mətbuata bəyanatında bildirdiyi kimi, Azərbaycanda rus mədəniyyətinə, rus dilinə, əsrlər boyu xalqlarımızı birləşdirmiş və bu gün də birləşdirən nə varsa, hamısına çox qayğı ilə yanaşılır.
Xalq artisti əminliklə bildirib ki, mədəniyyət sahəsində qurulan və genişləndirilən əməkdaşlıq əlaqələri xalqlarımızı bir-birinə daha da yaxınlaşdırır. Bu yaxınlarda “Oskar” mükafatı laureatı, Rusiya Kinematoqrafçılar İttifaqının sədri, kinorejissor Nikita Mixalkovun ona ünvanlandığı məktubu xatırladan Vaqif Mustafayev həmin məktubun qonşu ölkələrimiz arasındakı dostluq əlaqələrinin bariz nümunəsi olduğunu vurğulayıb. Nikita Mixalkovun Vaqif Mustafayeva ünvanlandığı məktubda deyilir: “Siz hələ Moskvada Ali Ssenaristlər və Rejissorlar kurslarının müdavimi olarkən özünəməxsus kinematoqrafik dəstxətiniz və həyata orijinal ironik baxışınızla hamını heyrətləndirirdiniz. Sonra film ardınca film, uğur ardınca uğur... Beləcə, Sizin sənədli, komik və ciddi kinoəsərlərinizin dünya ekranlarına zəfər yürüşü başlandı. Hər biri istedadlı müəllifin yüksək ustalığı ilə seçilən “Yaramaz”, “Hər şey yaxşılığa doğru”, “Milli bomba”, “Bir həsədin tarixi” filmləri keçmiş SSRİ-də, Rusiya Federasiyasında, yaxın və uzaq xarici ölkələrdə keçirilən kinofestivallarda ali mükafatlara layiq görüldü. Azərbaycanın görkəmli dövlət xadimi Heydər Əliyev haqqında sonuncu bədii film isə bu ekran əsərinə tamaşa etmiş kinematoqrafçıların ümumi rəyinə görə, heç şübhəsiz, kinematoqrafın yaradıcılığında mühüm hadisədir.
Rusiya kinematoqrafçıları Sizi yubileyiniz münasibətilə səmimi qəlbdən təbrik edir, Sizə bütün təşəbbüslərinizdə yeni-yeni uğurlar, cansağlığı və firavanlıq arzulayırlar”.
Vaqif Mustafayev qeyd edib ki, bu məktubda ifadə olunan fikirlər Azərbaycan kino sənətinə verilən yüksək qiymətdir.

Paylaş:

Baxılıb: 1195 dəfə