Tanınmış müğənni İlhamə Quliyevə son mənzilə yola salınıb

Bakı:

18°C

72%

12m/s

Əlaqə

AZ RU EN

Ana səhifə / Mədəniyyət / Tanınmış müğənni İlhamə Quliyevə son mənzilə yola salınıb

Tanınmış müğənni İlhamə Quliyevə son mənzilə yola salınıb

27.02.2016 [11:36]

Müasir Azərbaycan estrada sənətinin tanınmış nümayəndələrindən biri, Xalq artisti, “Şöhrət” və “Şərəf” ordenli, Azərbaycan Respublikası Prezidentinin fərdi təqaüdçüsü İlhamə Quliyeva fevralın 26-da son mənzilə yola salınıb.
AZƏRTAC xəbər verir ki, vida mərasimində hökumət rəsmiləri, Milli Məclisin deputatları, elm və mədəniyyət xadimləri, ziyalılar, ictimaiyyət nümayəndələri iştirak ediblər.
Mərhumun cənazəsi Rəşid Behbudov adına Dövlət Mahnı Teatrının səhnəsində qoyulmuşdu. Salonda sənətkarın vaxtı ilə ifa etdiyi unudulmaz xalq və bəstəkar mahnıları səslənirdi.
Mərhumun tabutu önünə Azərbaycan Respublikasının Prezidenti adından əklil qoyulmuşdu.
Cənazənin ətrafına hökumət qurumları və müxtəlif kollektivlər adından da əklillər düzülmüşdü.
İlhamə Quliyevanın həmkarları, dostları, tanışları, tanınmış mədəniyyət və incəsənət xadimləri, mərhumun bənzərsiz ifalarının pərəstişkarları axın-axın teatrın binasına gəlir, görkəmli sənətkara və gözəl insana son borclarını verirdilər.
Matəm mərasimini giriş sözü ilə açan mədəniyyət və turizm naziri Əbülfəs Qarayev İlhamə Quliyevanın yaradıcılıq yolundan və sənət dünyasından danışıb.
Bildirib ki, milli musiqimizin inkişafında böyük xidmətlər göstərmiş bir ailənin nümayəndəsi olan İlhamə Quliyeva, bütün fəaliyyəti dövründə müasir musiqi mədəniyyəti xəzinəmizin zənginləşməsinə böyük əmək sərf edib. O, görkəmli Azərbaycan bəstəkarlarının bir çox mahnılarının ilk və mahir ifaçısı kimi tanınıb.
Diqqətə çatdırılıb ki, İlhamə Quliyeva milli musiqimizi nəinki Azərbaycanda, hətta ölkəmizin hüdudlarından kənarda təşkil olunan konsert proqramlarında uğurla təmsil edib.
Vurğulanıb ki, İlhamə Quliyevanın müasir Azərbaycan musiqi mədəniyyətinin inkişaf etdirilməsi sahəsində xidmətləri hər zaman dövlətimiz tərəfindən yüksək qiymətləndirilib.
Mərasimdə çıxış edən Xalq artistləri Canəli Əkbərov, Natəvan Şeyxova və Yalçın Rzazadə İ.Quliyevanın sənət dünyasından, insani keyfiyyətlərindən danışaraq, onunla bağlı xatirələrini bölüşüblər.
Bildirilib ki, İlhamə Quliyeva səhnəyə qədəm qoyduğu ilk vaxtlardan milli ifaçılıq məktəbinin zəngin ənənələrini davam etdirməklə yanaşı, həm də Azərbaycan estrada sənətinə yeni nəfəs bəxş edib.
Mərhumun ailəsi adından çıxış edən Orxan Nadirov anasının xatirəsinə göstərilən hörmət və ehtirama görə dövlətimizin başçısı İlham Əliyevə və vida mərasiminə toplaşanlara dərin minnətdarlığını bildirib.
Sonra tanınmış müğənni İlhamə Quliyevanın cənazəsi son mənzilə yola salınıb.
Mərhum İkinci Fəxri xiyabanda torpağa tapşırılıb.
Allah rəhmət eləsin!