Bakıdakı Rus evində Alfred Şnitkeyə həsr edilmiş tədbir olub

Bakı:

19 °C

88 %

0 m/s

Əlaqə

AZ RU EN

Ana səhifə / Mədəniyyət / Bakıdakı Rus evində Alfred Şnitkeyə həsr edilmiş tədbir olub

Bakıdakı Rus evində Alfred Şnitkeyə həsr edilmiş tədbir olub

28.11.2024 [15:33]

Bakıdakı Rus evində görkəmli sovet və rus bəstəkarı, musiqişünas və pedaqoq Alfred Şnitkenin 90 illik yubileyinə həsr olunmuş “Alfred Şnitkenin səs labirintləri” adlı sərgi və konsert keçirilib.

Rusiya İnformasiya və Mədəniyyət Mərkəzindən (RİMM) AZƏRTAC-a bildirilib ki, tədbir Bakıdakı Rus evi, Rusiya Milli Musiqi Muzeyi, A.Şnitke adına Moskva Dövlət Musiqi İnstitutu və Üzeyir Hacıbəyli adına Bakı Musiqi Akademiyasının (BMA) birgə təşkilatçılığı ilə baş tutub.

Tədbirin açılışında Bakıdakı Rus evinin rəhbəri İrek Zinnurov ictimaiyyət qarşısında çıxış edib.

Rusiya Milli Musiqi Muzeyinin direktoru Mixail Brızqalov nadir kolleksiyaları dünyanın ən yaxşı məkanlarında nümayiş etdirilən muzeyin çoxşaxəli fəaliyyətindən, həmçinin A.Şnitkenin yaradıcılığına həsr olunmuş silsilə tədbirlərdən bəhs edib.

Tədbirə gələn qonaqlar görkəmli musiqiçinin 90 illik yubileyi üçün Rusiya Milli Musiqi Muzeyi tərəfindən xüsusi olaraq Rus evinin dəstəyi ilə hazırlanmış sərginin eksponatları ilə tanış olublar. Eksponatlar arasında Şnitkenin musiqi əlyazmaları, unikal şəxsi əşyalar, arxiv fotoşəkilləri, həmçinin məşhur filmlərdən kadrlar var.

Tədbirin aparıcısı və kuratoru, sənətşünaslıq üzrə fəlsəfə doktoru, BMA-nın baş müəllimi Alyona İnyakina iştirakçılara A.Şnitkenin yaradıcılığının tarixi əhəmiyyətindən, görkəmli musiqiçinin həyatındakı mühüm faktlardan və dönüş nöqtələrindən danışıb.

Konsert proqramı tədbirə gələnlərə A.Şnitkenin əsərlərinin iki Bakı premyerasını təqdim edib. Azərbaycanın Xalq artisti, BMA-nın professoru Ülviyyə Hacıbəyova, Azərbaycan Dövlət Akademik Musiqili Teatrının solisti Yuliya Heydərovanın ifasında A.Şnitkenin parlaq və rəngarəng üslublu əsərləri, eləcə də görkəmli Azərbaycan və rus bəstəkarı Fərəc Qarayevin musiqisi səsləndirilib. Üzeyir Hacıbəyli adına Azərbaycan Dövlət Simfonik Orkestrinin solisti Səbinə Quliyeva, BMA-nın dosenti Nərgiz Salmanlı, BMA-nın müəllimi Nərgiz Kəngərli, eləcə də Kristina Əfəndiyevanın rəhbərliyi ilə Bakıdakı Müqəddəs Mikayıl Arxangel kilsəsinin xoru da konsertdə çıxış ediblər.

Tədbirdə Rusiyanın Azərbaycandakı fövqəladə və səlahiyyətli səfiri Mixail Yevdokimov, Azərbaycan Musiqi Mədəniyyəti Dövlət Muzeyinin direktoru Alla Bayramova, diplomatik korpusun, işgüzar dairələrin, elmi və yaradıcı ziyalıların nümayəndələri, eləcə də həmvətənlərimiz iştirak ediblər.

Paylaş:

Baxılıb: 822 dəfə

Xəbər lenti

Hamısına bax