İKT-də bərabərlik...

Bakı:

26 °C

73 %

7 m/s

Əlaqə

AZ RU EN

Ana səhifə / Maraqlı / İKT-də bərabərlik...

İKT-də bərabərlik...

24.04.2026 [08:59]

Qızların texnoloji biliklərinin artırılması vacibdir

Qızların informasiya-kommunikasiya texnologiyaları (İKT) sahəsində rolu yalnız texniki biliklərlə məhdudlaşmır. Onların gətirdiyi müxtəlif baxış bucaqları və yaradıcı yanaşmalar bu sahənin daha inklüziv, innovativ və cəmiyyətə faydalı şəkildə inkişaf etməsinə mühüm töhfə verir. Çünki texnologiya artıq sadəcə alət deyil, gündəlik həyatın ayrılmaz hissəsi və gələcəyin qurulmasında əsas qüvvədir. Bir sözlə, rəqəmsal dünyanın sürətlə dəyişdiyi bir dövrdə qızların texnologiyaya marağını artırmaq, onlara bərabər imkanlar yaratmaq və öz potensiallarını kəşf etmələri üçün ilham vermək cəmiyyətin gələcəyinə qoyulan ən dəyərli investisiyalardan biridir.

Bütün dünya ictimaiyyəti kimi Azərbaycanda da aprelin sonuncu həftəsi İKT-də Qızlar Günü (“Girls in ICT Day”) kimi qeyd edilir. Bu gün Birləşmiş Millətlər Təşkilatının (BMT) İKT sahəsində ixtisaslaşmış qurumu olan Beynəlxalq Telekommunikasiya İttifaqı (BTİ) tərəfindən təsis edilib.

Ümumi İKT əmək bazarının 26 faizi...

Hazırda İKT sektorunun həmişəkindən daha çox qız və qadınlara ehtiyacı var. Gələcəyin işləri texnologiya və innovasiya ilə idarə olunacaq. Bu gün ibtidai məktəbə daxil olan uşaqların 65 faizi gələcəkdə bugünkü gündə mövcud olmayan işlərdə çalışacaq. Dünyada daha çox qadının İKT sektoruna cəlb edilməsi üçün ciddi səylər göstərilsə də, hətta ən sivil ölkələrdə belə bu yolda bir sıra problemlər və maneələr mövcuddur. Bu sahədə çalışan qadınlar ümumi İKT əmək bazarının cəmi 26 faizini təşkil edir.

Bu gün ölkəmizdə də ənənəvi olaraq geniş qeyd olunur. Rəqəmsal İnkişaf və Nəqliyyat Nazirliyi tərəfindən gənc qızların texnologiya sahəsində maarifləndirilməsi, təhsilin əhəmiyyəti və bu sahədə geniş imkanlar barədə məlumatlandırılması, rəqəmsal dünyada fəal iştiraka cəlb edilməsi məqsədi ilə hər il Beynəlxalq İKT-də Qızlar Gününə həsr olunmuş tədbirlər təşkil olunur. Azərbaycanın İKT sektorunda əldə etdiyi nailiyyətlər beynəlxalq təşkilatlar səviyyəsindədir.

Bacarıq və istedadın cinsiyyəti yoxdur...

Qadınların İKT sektorunda fəal iştirakı həm də stereotiplərin qırılmasına xidmət edir. Çünki uzun illər bu sahə “kişilərə aid peşə” kimi təqdim olunsa da, bu gün uğurlu qadın mühəndislər, startap qurucuları və texnologiya liderləri göstərirlər ki, bacarıq və istedadın cinsiyyəti yoxdur. Hər bir fərd lazımi dəstək və imkan əldə etdikdə böyük nailiyyətlər qazana bilər.

Eyni zamanda, qadınların texnologiya sahəsində təmsil olunması cəmiyyət üçün daha ədalətli və balanslı rəqəmsal məhsulların yaradılmasına da təsir edir. Müxtəlif istifadəçi qruplarının ehtiyaclarını anlayan komandalar daha funksional və əlçatan həllər ortaya qoyur. Bu isə texnologiyanın insan həyatına müsbət təsirini maksimuma çatdırır.

Bütün bunları nəzərə alaraq, qızların və qadınların İKT sahəsinə cəlb olunması yalnız fərdi inkişaf məsələsi deyil, həm də sosial ədalət, iqtisadi tərəqqi və texnoloji innovasiyanın gələcəyi üçün strateji əhəmiyyət daşıyan bir məsələdir. Bu istiqamətdə atılan hər bir addım daha güclü və bərabər bir cəmiyyətin qurulmasına doğru aparır.

Yeganə BAYRAMOVA

Paylaş:

Baxılıb: 766 dəfə