Vətəndaş cəmiyyətinin fəaliyyəti üçün zəruri şərait

Bakı:

23 °C

56 %

3 m/s

Əlaqə

AZ RU EN

Ana səhifə / MEDİA / Vətəndaş cəmiyyətinin fəaliyyəti üçün zəruri şərait

Vətəndaş cəmiyyətinin fəaliyyəti üçün zəruri şərait

08.03.2024 [11:30]

İctimai Şura üzvlərinin “Böyük Qayıdış” prosesində aktivliyi artırılacaq

Milli maraqların və xalqa məxsus milli-mənəvi dəyərlərin qorunması hər bir ölkənin inkişafını təmin edən mühüm amillərdən biridir. Əlbəttə ki, bu prosesdə bir sıra subyektlərlə yanaşı, vətəndaş cəmiyyəti institutları da mühüm rola malikdir. Ümumiyyətlə, Azərbaycanda vətəndaş cəmiyyəti institutlarının formalaşdırılması və inkişafı istiqamətində məhz dövlətin iştirakı ilə xeyli işlər görülməkdədir. Çünki bu istiqamətdə fəaliyyət göstərən təsisatlar müxtəlif layihələr vasitəsilə ictimai həmrəyliyin və milli birliyin təmin olunmasında fəal iştirak edir, vətəndaşların və bütövlükdə, cəmiyyətin milli maraqlar ətrafında səfərbər olunmasına töhfə verirlər.

Bu mənada ölkəmiz siyasi sistemin struktur elementlərinin təkmilləşdirilməsi məqsədilə həyata keçirilən siyasi-hüquqi islahatlar, ictimai sektorun inkişafına xidmət edən tədbirlər hüquqi dövlət və vətəndaş cəmiyyətinin mütləq komponentlərinin bərqərar olunması işinə fundamental töhfələr verməkdədir. Buna ictimai-siyasi institutlaşma tendensiyasının əsasının qoyulmasını, intensivləşdirilməsini, təsisatların leqal və legitim fəaliyyətinə əlverişli şəraitin yaradılmasını, dövlətlə vətəndaşların qarşılıqlı məsuliyyətinə əsaslanan leqal münasibətlər sisteminin formalaşdırılmasını və s. aid etmək mümkündür.

Hüquqi dövlətin vətəndaş cəmiyyətindən fərqi onun qanunlar və digər normativ hüquqi aktlar qəbul etmək iqtidarına və dövlət-məcburiyyət tədbirlərini tətbiq etmək imkanlarına malik olmasındadır. Hüquqi dövlətin özü vətəndaş cəmiyyətinin inkişafı və onun gələcəkdə daha da təkmilləşdirilməsi şəraitində mövcud ola bilir. Həm vətəndaş cəmiyyəti, həm də hüquqi dövlət ümumi məqsədi güdürlər: insana xidmət etmək, onun hüquqlarını, maraqlarını qorumaq və təmin etmək; insanın azadlığı və özünü sərbəst şəkildə ifadə etməsi, onun təşəbbüskarlığı üçün, həmçinin sahibkarlıq fəaliyyətinin genişləndirilməsi üçün şərait yaratmaq, sosial həyatda mühüm amil olan orta sinfin mövcudluğunu təmin etmək və onun sıralarının genişləndirilməsinə nail olmaq və s. Əlbəttə ki, hər bir dövlətin, o cümlədən Azərbaycan dövlətinin və onun vətəndaş cəmiyyəti institutlarının nail olmağa çalışdığı ümumi dəyərlər mövcuddur ki, onların da sırasına şəxsiyyət azadlığı, sosial ədalət, insan hüquqları, xalqın rifahı, sülh və təhlükəsizlik, qanunçuluq, demokratiya və bu gün üçün aktual olan “Böyük Qayıdış” prosesində fəal iştirak daxildir.

Yeri gəlmişkən, bu yaxınlarda Qaçqınların və Məcburi Köçkünlərin İşləri üzrə Dövlət Komitəsi yanında İctimai Şuranın növbəti iclası keçirilib. Komitənin Mətbuat xidmətindən bildirilib ki, iclasda “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı” çərçivəsində komitənin əsas icraçısı olduğu tədbirlərə ictimai dəstəyin təşkili və bununla əlaqədar şuranın fəaliyyət imkanları barədə müzakirə aparılıb.

Prezident İlham Əliyevin işğaldan azad edilmiş ərazilərdə gedən bərpa quruculuq işlərini və “Böyük Qayıdış”la bağlı məsələləri şəxsən nəzarətdə saxlamasının, Birinci vitse-prezident Mehriban Əliyeva ilə birlikdə həmin ərazilərə müntəzəm səfərlər etməsinin, doğma yurda geri dönən əhali ilə görüşlər keçirməsinin məcburi köçkünlərdə böyük məmnunluq doğurduğu, onların mütləq əksəriyyətinin qayıdışa hazır olduğu bildirilib.

Müvəqqəti məskunlaşma yerlərində İctimai Şuranın üzvlərinin keçirdiyi görüşlərdə məcburi köçkünlərin qayıdış prosesinə dair bir sıra məsələlərlə maraqlandıqları vurğulanıb. Şuranın sədri, “Sağlam İnkişaf və Maarifləndirmə” İctimai Birliyinin rəhbəri Anar Xəlilov onların məlumatlandırılmasına, maarifləndirilməsinə, qarşılaşdıqları problemlərin həllinə ictimai dəstəyin təmin edilməsi üçün zəruri iş aparıldığını, müraciətlərinin Dövlət Komitəsinin müvafiq strukturları ilə birgə araşdırıldığını və qanunvericiliyə uyğun tədbirlər görüldüyünü diqqətə çatdırıb.

Dövlət Komitəsinin sədri Rövşən Rzayev Qarabağda və Şərqi Zəngəzurda yenidən salınan və bərpası aparılan yaşayış məntəqələrinə sakinlərin köçürülməsi vəziyyəti, onların məşğulluğu məsələlərinin həlli, ümumən, məcburi köçkünlərin sosial müdafiəsinin təşkili barədə ətraflı məlumat verib. İctimai Şura üzvlərinin “Böyük Qayıdış” prosesində aktiv fəaliyyətinin komitə tərəfindən aparılan işə müsbət təsiri olacağı qeyd edilib. Bununla əlaqədar komitənin bütün fəaliyyət istiqamətləri üzrə qərarların qəbul edilməsi prosedurlarında vətəndaş cəmiyyəti nümayəndələrinin fəal iştirakı üçün zəruri şəraitin yaradıldığı diqqətə çatdırılıb.

İclasda müzakirə edilən məsələlərlə bağlı geniş fikir mübadiləsi aparılıb, əməli fəaliyyət üçün təkliflər, tövsiyələr verilib və müvafiq qərarlar qəbul edilib.

Günel ABBASOVA

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Vətəndaş cəmiyyəti, hüquqi dövlət quruculuğu” istiqaməti üzrə hazırlanmışdır

Paylaş:

Baxılıb: 947 dəfə