Azad sahibkarlıq və KOB-lar...

Bakı:

24 °C

58 %

1 m/s

Əlaqə

AZ RU EN

Ana səhifə / MEDİA / Azad sahibkarlıq və KOB-lar...

Azad sahibkarlıq və KOB-lar...

25.09.2025 [08:17]

İqtisadi inkişafın əsas faktorlarından biri

Müasir dövrdə iqtisadi inkişafın ən mühüm amillərindən biri azad sahibkarlığın və liberal iqtisadiyyatın mövcudluğudur. Hər iki anlayış iqtisadiyyatın təməlini təşkil edir və ölkələrin rifah səviyyəsini yüksəltməkdə əsas rol oynayır. Azad sahibkarlıq iqtisadi fəaliyyətin sərbəst aparılması və bazar iqtisadiyyatının prinsipial şəkildə təşviq edilməsidir. Liberal iqtisadiyyat isə bu prinsipləri dövlət səviyyəsində dəstəkləyən və bazar mexanizmlərinin sərbəst işləməsinə şərait yaradan sistemdir.

Azad sahibkarlıq iqtisadiyyatın dinamikliyini artırır, yeni iş yerlərinin yaranmasına səbəb olur və insanların iqtisadi azadlığını təmin edir. Sahibkarlar öz biznes ideyalarını həyata keçirərək həm özlərini, həm də cəmiyyətin rifahını artırırlar. Liberal iqtisadiyyat isə bazar iqtisadiyyatının səmərəliliyini təmin edən qanunvericilik və iqtisadi siyasəti formalaşdırır.

Azad sahibkarlığın təməl daşı

Məlumdur ki, Kiçik və Orta Bizneslər (KOB-lar) iqtisadiyyatın müxtəlif sahələrində fəaliyyət göstərir. KOB-lar iqtisadiyyatda elastiklik və çeviklik təmin edir, daha sürətli qərar qəbul edir və dəyişən bazar şərtlərinə adaptasiya oluna bilir. Azad sahibkarlıq da KOB-ların inkişafının əsas təməllərindən biri sayılır. Bir sözlə, KOB-lar müxtəlif sahələrdə fəaliyyət göstərərək iqtisadiyyatın balanslaşdırılmış və davamlı inkişafına kömək edir. Azad sahibkarlıq mühiti KOB-lara innovativ məhsullar və xidmətlər təklif etməyə, həmçinin bazarda rəqabət aparmağa şərait yaradır.

Eyni zamanda, KOB-lar şəhər və kənd yerlərində iqtisadi aktivliyin artmasına səbəb olur, bölgələrdə sosial-iqtisadi inkişafı dəstəkləyir. Bu baxımdan KOB-lar azad sahibkarlığın təməl daşıdır və iqtisadiyyatın dinamikliyini, innovasiyasını və sosial sabitliyini təmin edən vacib amildir.

KOB-ların rəqəmsal və “yaşıl keçid”inə dəstək artırılır

Bu günlərdə 1-ci Azərbaycan Beynəlxalq İnvestisiya Forumu keçirilib. Forumda çıxış edən Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov bildirib ki, gündəlikdə iki əsas istiqamət mühüm yer tutur. Bunlar KOB-ların rəqəmsallaşması və yaşıl keçididir.

Onun sözlərinə görə, rəqəmsallaşma və “yaşıl keçid” istiqamətləri KOB-ların davamlı inkişafına xidmət edir: “Bu istiqamətlər sahibkarların daha dayanıqlı iş yerləri yaratmasına və iqtisadi dəyişikliklərə hazır olmasına imkan verəcək. KOBİA COP29 çərçivəsində KOB-lar üçün qlobal iqlim hərəkatının yaradılması təşəbbüsü ilə çıxış edib və “KOB-ların yaşıl keçid üçün Bakı İqlim Koalisiyası haqqında Birgə Bəyannamə”yə start verib. Artıq 20-dən çox yerli və xarici təşkilat bəyannaməni dəstəkləyir. Qoşulma prosesi açıqdır və təbliğat işləri davam etdirilir”.

KOB-lara yönəlmiş dəstək mexanizmləri

KOB-larla bağlı 3 vacib məsələyə xüsusi diqqət yetirilməsinin vacib olduğunu qeyd edən O.Məmmədov bunların - KOB-ların ehtiyaclarının daim nəzərdən keçirilməsi, bu ehtiyaclar əsasında xüsusi dəstək alətləri və xidmətlərin yaradılması və həmin mexanizmlərə, xidmətlərə əlçatanlıq təmin edilməsi olduğunu bildirib: “KOBİA KOB-larla ünsiyyət qurmaq üçün effektiv və müxtəlif kommunikasiya kanalları yaradıb. Mütəmadi olaraq sektorlar üzrə görüşlər təşkil edir, sorğular keçirir və KOB-ların müraciətlərini təhlil edirik. Dövlət-özəl sektor əməkdaşlığı çərçivəsində tematik məsləhətləşmələr də təşkil olunur. Sözügedən kommunikasiya kanalları vasitəsilə əldə etdiyimiz məlumatlar əsasında xüsusilə KOB-lara yönəlmiş müxtəlif dəstək mexanizmləri hazırladıq - daxili bazar araşdırması, ticarət mərkəzlərinə çıxış, qrant proqramı, “Startap” şəhadətnaməsi, KOB klaster mexanizmi, daxili və xarici sərgilərdə iştiraka dəstək və s”.

O.Məmmədov onu da əlavə edib ki, KOB-ların potensialının artırılmasına xüsusi diqqət yetirilir: “Bu məqsədlə KOB inkişaf mərkəzləri və KOB Model Müəssisə yaradılıb. Bu mexanizmlər gələcək iqtisadi tendensiyalara daha uyğun xidmətlər göstərməkdədir. Bizneslərin dövlətin dəstək alətlərinə, eləcə də “G2B” və “B2B” xidmətlərinə çıxışını asanlaşdırmaq üçün bir pəncərə xidmət modeli - KOB evləri fəaliyyət göstərir. Yeri gəlmişkən, ötən il Azərbaycanın “KOB evi” modeli beynəlxalq səviyyədə tanınaraq, innovativ təcrübə kimi qiymətləndirilib”.

Yeganə

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Azad sahibkarlığın və liberal iqtisadiyyatın təşviqi” istiqaməti üzrə hazırlanmışdır.

Paylaş:

Baxılıb: 530 dəfə