Qalibiyyətə gedən yol

Bakı:

24 °C

88 %

2 m/s

Əlaqə

AZ RU EN

Ana səhifə / İdman / Qalibiyyətə gedən yol

Qalibiyyətə gedən yol

29.10.2022 [12:20]

Günel ABBAS

Oktyabrın 27-də “Qarabağ” UEFA Avropa Liqasının qrup mərhələsində növbəti oyununu keçirib. Qurban Qurbanovun baş məşqçi olduğu komanda V turda Fransada “Nant” klubu ilə qarşılaşıb. “Bojuar” stadionundakı görüş meydan sahiblərinin 2:1 hesablı qələbəsi ilə başa çatıb. Matça fəal başlayan Ağdam klubu bu nəticədən 7 xalla 2-ci pillədəki mövqeyini qoruyub. 6 xalı olan “Nant” isə 3-cü sırada qərarlaşıb.

Rəqib tribunalarda təxribat

Əslində oyunun gedişinə təsir edən amillər çox idi. Onlardan biri də rəqib azarkeşlərin tribunada Ermənistan bayrağını açması olub. Məhz bu məsələlərə görə “Qarabağ” azarkeşləri üçün qalibiyyət önəmli olsa da, komandamızın oyunçuları üçün bir o qədər çətin idi. Meydanda yaradılan şəraitin özü də komandanı ruhdan salmaq və fikirlərini yayındırmaq məqsədi daşıyırdı. Oyunda kapitanın zədələnməsi də gedişata tısir edən mənfi amillərdən biri idi.

Qalibiyyətə gedən yol...

Ancaq unutmaq olmaz ki, qalibiyyətə gedən yol bəzən büdrəməkdən keçir. “Qarabağ”ın “Nant”la oyundakı nəticəsini büdrəmək adlandırmağı daha düzgün hesab edərdim. Ölkəmizə ard-arda qalibiyyətlərlə geri qayıdan komandamızın uğurlarını heçə saymaq olmaz. Hər dəfə vurğuladığımız kimi, axı “Qarabağ” Azərbaycan futbolunun üzünü ağ edən komandadır. Bu baxımdan uğura gedən yolda bu cür büdrəyişlərin olması normal qəbul edilməlidir. Xüsusilə komanda oyunçularına qarşı yönələn ərkyana sitəmləri dayandırmaq lazımdır. Çünki özləri də oyunun nəticələrinə görə kədərli olduqlarını dilə gətirirlər və bu onların növbəti oyuna hazırlıq mərhələlərinə mənfi təsir edə bilər.

Ümumiyyətlə idmançının yüksək uğuru onun içində olduğu psixoloji atmosferdən asılıdır. Daxili atmosfer uyğun olarsa, təzyiq altında olmazsa, nəticə də müsbət olacaq. Əks halda idmançı öz bacarığını ortaya qoya bilməz. Matçda uduzmaq həm də az öncə sadaladığımız xarici amillərlə bağlıdır. Həm komanda, həm də azarkeşlər bilməlidirlər ki, oyuna zəif başlamaq zəif bitirmək anlamına gəlmir. Oyuna yaxşı başlamamaq çox vaxt kifayət qədər zehni hazırlığın nəticəsidir. Pis başlanğıc isə son deyil, başlanğıcdır. Əhəmiyyətli olan, bunu dərk etmək, mənfi şərtlənmədən azad olmaq və hadisənin ciddiliyini dərk etməkdir. İdmançı qaydaları və nəticəni meydanda müəyyən edir. Hər şey onun ətrafında fırlanır. Özünü saxlaya bilməyib ipləri əlinə ala bilmədikdə başqaları oyunu ələ alacaq. Bunun üçün qərar vermək lazımdır.

Ən nəhayətində isə matçı uduzduğumuz zaman heç nə sona çatmır. Uduzmaq bəzən son kimi görünə bilər, amma bu son deyil. Elə komandalar var ki, çoxlu görüşlərdə məğlub olub, qalib gəlib çempion olurlar. Bir matç itirildikdə səhvləri öyrənmək və tanımaq vacibdir. Bəzən qalib gəlmək belə xoşbəxtlik gətirmir. Bir müddət sonra müxtəlif səbəblərdən təbii eniş başlayır. Hətta arabir məğlubiyyət komandaya müsbət təsir edə bilər. Bir sözlə, heç kim həmişə uduzmur və həmişə qalib gələ bilməz.Əks halda hər şey mənasız olur.

Nəzərə almaq lazımdır ki, “Barselona” kimi klub evdə 0:3 uduzur və ÇL-dən kənarda qalır. Azarkeşlər isə onların ruhdan düşməyinə imkan yaratmır, daim dəstək və təşəkkürünü bildirir. “Qarabağ” isə hələ də qrupda 2-ci yerdə olarkən azarkeşlərin bir hissəsi yenə narazıdır. İstənilən halda “Qarabağ” Avropada Azərbaycanın yeganə təmsilçisidir. Bu mənada “Qarabağ”ın səfər oyunundakı hesabı gələcək uğurlara qapı açacaq. Komandamız bundan sonra daha güclü, daha qətiyyətli irəliləyəcək. Azarkeşlərin də dəstəyi ilə növbəti oyunlarda öz performansını tam şəkildə nümayiş etdirəcək. Biz buna inanır, “Qarabağ”a güvənirik!

Paylaş:

Baxılıb: 1218 dəfə