“Bakı-2015”-in məşəli qədim Gəncədə alovlandırıldı

Bakı:

18 °C

77 %

1 m/s

Əlaqə

AZ RU EN

Ana səhifə / İdman / “Bakı-2015”-in məşəli qədim Gəncədə alovlandırıldı

“Bakı-2015”-in məşəli qədim Gəncədə alovlandırıldı

16.05.2015 [12:06]

Mayın 15-də Gəncədə əsl bayram əhval-ruhiyyəsi yaşanıb. Əllərində gül dəstələri, Azərbaycanın üçrəngli bayraqlarını tutmuş on minlərlə şəhər sakini birinci Avropa Oyunlarının məşəlini qarşılamaq, Alov festivalında iştirak etmək üçün küçələrə çıxmışdılar.
AZƏRTAC xəbər verir ki, mərkəzi meydanda məşəli “Şöhrət” ordenli əməkdar idman ustası Elçin Zeynalov qəbul edib. Sonra 10 idmançı məşəl yürüşünə çıxıb. Dünya və Avropa yarışlarında böyük uğurlar qazanan bu idmançılar növbə ilə məşəli qəbul edərək Nizami Gəncəvinin adını daşıyan prospektlə Heydər Əliyev park kompleksindəki amfiteatra gəliblər. Yol boyu düzülən şəhər sakinlərinin alqış sədalarının müşayiəti ilə səhnədə məşəlin alovlandırılması mərasimi keçirilib. Məşəli sərbəst güləş üzrə Olimpiya çempionu Toğrul Əsgərov alovlandırıb. Meydana toplaşanların sürəkli alqışları altında birinci Avropa Oyunlarının çırağı yandırılaraq yarışlar başa çatana qədər saxlanılması üçün Heydər Əliyev Mərkəzinə təqdim olunub.
Sonra Gəncənin incəsənət ustaları konsert proqramı ilə çıxış ediblər.
Alov festivalında birinci Avropa Oyunları məşəlinin Atəşgah məbədində alovlandırılması mərasiminin əks olunduğu videoçarx nümayiş etdirilib.
Cəmi 24 illik müstəqillik tarixi olan bir respublikada belə bir möhtəşəm tədbirin keçirilməsi onun necə sürətlə inkişaf etməsinin göstəricisidir. İndi Azərbaycan təkcə neft ölkəsi kimi tanınmır. Azərbaycanın idman sahəsində qazandığı uğurlar onu deməyə əsas verir ki, respublikamız həm də idman ölkəsidir. İndi respublikamızda elə bir şəhər, rayon tapılmaz ki, orada ən müasir idman qurğuları fəaliyyət göstərməsin. Yaradılan bu şəraitdən bəhrələnən idmançılarımız yeni-yeni uğurlara imza atırlar. Onların arasında Gəncə idmançıları çoxluq təşkil edir. Təkcə keçən il gəncəli idmançılar dünya və Avropa yarışlarından Vətənə 142 qızıl, 73 gümüş, 104 bürünc medal gətiriblər. Cari ilin ötən üç ayında isə onlar keçən ilin müvafiq dövrü ilə müqayisədə uğurların sayını artıraraq, 38 qızıl, 30 gümüş və 22 bürünc medala sahib olublar. Hazırda bu qədim şəhərdə möhtəşəm bir idman obyektinin inşası da sürətlə davam edir. Azərbaycan Prezidenti İlham Əliyevin xeyir-duası ilə Gəncə Olimpiya Parkının tikintisinə başlanılıb.
Alov festivalının sevincini yaşayan mədəniyyət işçisi Bəxtiyar Muradov AZƏRTAC-ın müxbirinə müsahibəsində deyib: “Birinci Avropa Oyunlarının keçirilməsi həm də ölkəmizə çoxlu sayda turist axını ilə müşayiət olunacaq. Əlbəttə, sürətlə inkişaf edən ölkəmizin kifayət qədər füsunkar mənzərələri, zəngin muzeyləri, tarixi abidələri var. Bu baxımdan qədim Nizami yurdu da xarici turistləri qarşılamağa hazırdır. Onlara göstərməyə həm gözəl və yaraşıqlı şəhərimiz, həm də maddi-mədəni abidələrimiz var”.
AMEA-nın Gəncə bölməsinin əməkdaşı, Prezident təqaüdçüsü Elnur Həsənov: “Gəncədə belə bir möhtəşəm tədbirin keçirilməsi, Avropa Oyunlarının məşəlinin qarşılanması biz gəncəliləri də qürurlandırır. Atəşgah məbədində məşəlin alovlandırılması mərasimini izlədikcə insanın qəlbini sevinc hissi bürüyür. Bu gün Avropa Oyunlarının məşəli ölkəmizi diyar-diyar gəzərək, insanlara sevinc bəxş edir. Bu sevincdən 4 min il yaşı olan Gəncəyə də pay düşüb. Əminik ki, idmançılarımız bu yarışlarda da uğurla çıxış edəcək, Azərbaycan bayrağını dalğalandıracaqlar”.
Azərbaycanın idmanda qazandığı uğurlardan danışan əməkdar idman ustası, “Şöhrət” ordenli məşqçi Elçin Zeynalov isə deyib ki, müstəqillik yaşının az olmasına baxmayaraq, Azərbaycan dövlətimizin başçısının diqqət və qayğısı sayəsində əsl idman ölkəsinə çevrilib: “Mən bütün ömrümü idmana həsr etmişəm. Yetirmələrim dünya və Avropa yarışlarında fəxri kürsünün ən yüksək pillələrinə qalxıblar. Tələbələrim bu qələbələrə imza atanda sevincimin həddi-hüdudu olmayıb. Bu gün isə ilk Avropa Oyunlarının Azərbaycanda keçirilməsi mənim sevincimi ikiqat artırıb. Buna dəstək olanların hamısına minnətdaram”.
Alov festivalının sonunda möhtəşəm atəşfəşanlıq olub.

Paylaş:

Baxılıb: 1184 dəfə