Azərbaycan inkişaf meyarlarına görə, Avropa dövlətlərinin standartlarına çatmaqdadır

Bakı:

17 °C

88 %

2 m/s

Əlaqə

AZ RU EN

Ana səhifə / Gündəm / Azərbaycan inkişaf meyarlarına görə, Avropa dövlətlərinin standartlarına çatmaqdadır

Azərbaycan inkişaf meyarlarına görə, Avropa dövlətlərinin standartlarına çatmaqdadır

05.10.2011 [22:53]

Prezident İlham Əliyev: Bu gün biz zəngin və yoxsul təbəqə arasında fərqi azaltmağa müvəffəq olmuşuq. Zənnimcə, biz yoxsulluğun tamamilə aradan qaldırılmasına nail olacağıq
Azərbaycan ötən 20 illik müstəqillik tarixi dövründə çoxsistemli və təmkinli islahatlar strategiyasını uğurla həyata keçirərək bir çox inkişaf etmiş dövlətlərin meyarlarına yaxınlaşıb. Respublikamız enerji sektorunun yüksək inkişafına nail olmaqla, eyni zamanda, neft-qaz gəlirlərinin digər iqtisadi bölmələrə transformasiyasını reallaşdırmaqla, həm ümumi iqtisadi inkişafı təmin edib, həm də güclü sosialyönümlü iqtisadi platforma yaradıb. Bu gün Azərbaycan Cənubi Qafqaz regionunun ən sürətlə inkişaf edən, qlobal enerji-kommunikasiya layihələrinin lokomotivinə çevrilən, bütün sahələrdə sürətlə modernləşən dövlət kimi tanınır. Azərbaycanın müstəqillik tarixinin ən mühüm uğuru isə respublikamızın heç bir dövlət və beynəlxalq təşkilatdan asılı olmadan müstəqil siyasət yeritməsi, milli maraq və mənafeyini qətiyyətlə müdafiə etməsidir.
Prezident İlham Əliyev “Gülüstan” sarayında keçirilən dövlət müstəqilliyinin iyirminci ildönümünə həsr olunmuş beynəlxalq tədbirdə bildirib ki, respublikamız hazırda özünün uzunmüddətli inkişaf strategiyasının istiqamətlərini müəyyən edən ölkə kimi tanınır. Azərbaycan dünya miqyasında iqtisadi artım sürətinə görə ön sıralarda gedən islahatçı ölkədir: “Azərbaycan iqtisadiyyatı Cənubi Qafqaz iqtisadiyyatının 75 faizini təşkil edir. Bu rəqəm bundan sonra da artacaqdır. Bilirsiniz ki, bizim ölkələr Sovet İttifaqının süqutundan sonra yaranmış dövlətlərdir. Təbii ki, qonşuluq məsələləri ilə bağlı müəyyən statistika böyük maraq doğurur. Lakin dəfələrlə ictimaiyyətə bildirilmişdir və mən şəxsən bunu bir neçə dəfə qeyd etmişəm ki, Azərbaycan müasir dövlətə çevrilib. Güclü siyasi, iqtisadi və sosial islahatlar həyata keçirilir. Dünya İqtisadi Forumunun rəyinə görə Azərbaycan rəqabətlilik baxımından dünyada 55-ci, MDB məkanında isə birinci yerdə olan dövlətdir. Bu da həyata keçirdiyimiz islahatların göstəricisidir. Bizim başlıca məqsədimiz müasir dövlətin yaradılmasıdır. Biz Avropa institutları ilə bütün sahələr üzrə əməkdaşlığa müstəsna əhəmiyyət veririk”.
ölkəmizin sürətli inkişafının əsas meyarları kimi liberal bazar iqtisadiyyatının bütün prinsiplərinin həyata keçirilməsi, azad sahibkarlığın və rəqabət mühitinin təmin olunması, cəmiyyətdə sosial bərabərliyə və orta təbəqənin formalaşmasına impuls verən mükəmməl proqramların reallaşması, həmçinin, düşünülmüş çevik iqtisadi islahatların aparılması mühüm rol oynayıb. Hazırda ölkəmizdə bazar iqtisadiyyatının bütün formaları və əlamətləri mövcuddur. ölkə dövlət mülkiyyətinin inhisarı ilə çoxdan vidalaşıb və hazırda iqtisadi vahidlərin, təsərrüfatçılıqla məşğul olan subyektlərin mütləq çoxluğu iqtisadiyyatın qeyri-dövlət sektorunu gücləndirir.
Dövlət başçısı qeyd edib ki, liberal iqtisadiyyatın inkişafı ölkə iqtisadiyyatında özəl sektorun payının artımını sürətləndirib və özəl bölmənin çəkisi 75 faizi ötüb. Liberal iqtisadi siyasət və siyasi islahatlar, ölkədə mövcud olan problemlərin həllinə səbəb olub və cəmiyyətdə çox münbit sosial bərabərlik mühiti yaradıb. Eyni zamanda, liberal iqtisadiyyatın hökmranlığı sabit və dayanıqlı orta təbəqə institutunun formalaşmasına əlverişli zəmin yaradıb. Keçid iqtisadiyyatının sona çatması və modernləşmə xətti güclü sahibkarlıq sinfinin formalaşması fonunda ölkəmizdə orta təbəqənin statusunun da möhkəmlənməsinə səbəb olub. Hər hansı bir ölkənin orta sinfinin real mənzərəsini bu ölkənin ümumi makroiqtisadi inkişaf indiqatorlarında, onun vətəndaşlarının sosial rifahını xarakterizə edən göstəricilərdə, insan inkişafı ilə bağlı qiymətləndirmələrdə də görmək olar. Bu mənada Azərbaycanın mühüm makrososial pozitiv nəticələrə nail olmasını tam təfsilatı və detalları ilə görmək mümkündür. Respublikamızda əhalinin məşğulluq potensialı çox güclənib, yoxsulluğun səviyyəsi 49 faizdən 9 faizə endirilib, ölkədə insanların gəlir əldə etmək imkanları genişlənib. Dövlət başçısının bəyan etdiyi kimi, bu gün respublikamız zəngin və yoxsul təbəqə arasında fərqi azaltmağa müvəffəq olub.
Hazırda Azərbaycan strateji planları dünyada ən zəngin ölkələrdən birinə çevrilmək üçün innovativ iqtisadiyyatın və kibertexnologiyaların tətbiqi dairəsinin genişləndirilməsindən ibarətdir. Prezident İlham Əliyevin bildirdiyi kimi, ölkəmiz ən modern texnologiyaları, yüksək inkişaf indiqatorlarına səbəb olan meyarları tətbiq etməyi hədəf seçib: “Biz ölkənin inkişaf meyarlarını Avropa dövlətlərinin standartlarına çatdırmağa çalışırıq. Zənnimcə, biz buna nail olacağıq. Eyni zamanda, biz Avropaya, belə demək olarsa, əliboş gəlmirik. Biz Avropanın enerji təhlükəsizliyinin təmin edilməsi, terrorçuluqla mübarizə, nəqliyyat məsələlərində bir çox işlər təklif edə bilərik. ötən illər ərzində bir çox məsələləri müzakirə etmişik. Neft, qaz və yanacaqla bağlı məsələlər danışıqlarımızda başlıca rol oynayırdı. Bu gün isə mən çox şadam ki, biz getdikcə neft və qaz haqqında daha az danışırıq. Mən çox şadam ki, bu gün Azərbaycana təkcə enerji resurslarını nəql edə bilən tərəfdaş deyil, müasir bir ölkə kimi baxırlar”.
ELBRUS CƏFƏRLİ

Paylaş:

Baxılıb: 1180 dəfə