91,2% - “tam etibar edirəm”

Bakı:

31 °C

43 %

5 m/s

Əlaqə

AZ RU EN

Ana səhifə / Gündəm / 91,2% - “tam etibar edirəm”

91,2% - “tam etibar edirəm”

25.12.2021 [00:57]

İlham Əliyev xalqımızın inam və etimad ünvanıdır

Nurlan

Azərbaycan beynəlxalq müstəvidə Cənubi Qafqzazın lideri - regional güc mərkəzi, qüdrətli, nüfuzlu və qalib ölkə kimi tanınır. Prezident İlham Əliyevin milli maraqlara əsaslanan və müasir çağırışlara cavab verən praqmatik siyasəti qarşıda duran strateji hədəflərə çatmağa imkan verib. Ötən illər ərzində ölkə iqtisadiyyatı dayanıqlı inkişaf tempi qazanıb, müxtəlif sahələri əhatə edən layihələr uğurla reallaşdırılıb, islahatlar müvəffəqiyyətlə davam etdirilib. Digər tərəfdən, həyata keçirilən çoxvektorlu xarici siyasətin məntiqi nəticəsi kimi, Azərbaycanın beynəlxalq mövqeyi mütəmadi olaraq güclənir. Ölkəmizin təşəbbüsü və liderliyi ilə çox mühüm layihələr reallaşdırılır. Ən əsası, beynəlxalq hüquq normalarına əsaslanaraq əks-hücum əməliyyatlarını uğurla həyata keçirən müasir və qüdrətli Azərbaycan Ordusu Prezident, Müzəffər Ali Baş Komandan cənab İlham Əliyevin rəhbərliyi ilə ölkəmizin ərazi bütövlüyünü, tarixi ədaləti bərpa edib. Postmünaqişə dövründə görülən işlər isə milli və regional inkişafa xidmət edir, Azərbaycanın gücünün daha da artmasını şərtləndirir.

Bütövlükdə, ötən 18 ilin mənzərəsinə, reallıqlara nəzər saldıqda görünür ki, Ulu Öndərimizin siyasi kursunu uğurla davam etdirən Prezident İlham Əliyev Vətənə, dövlətə və xalqa sədaqət andını - bütün vədlərini gerçəkləşdirən böyük dövlət xadimi, qətiyyətli lider və müzəffər sərkərdədir. Əlbəttə, bütün bu müsbət reallıqlar, qazanılan nailiyyətlər Azərbaycan xalqı tərəfindən yüksək qiymətləndirilir, xalqımız Prezident İlham Əliyevin rəhbərliyi ilə həyata keçirilən siyasəti tam və qətiyyətlə dəstəkləyir, bu siyasətə alternativ görmür. Təsadüfi deyil ki, ictimai rəyin öyrənilməsi üzrə müxtəlif sosioloji tədqiqat mərkəzlərinin Azərbaycan əhalisi arasında keçirdiyi sorğular da ölkəmizdə vətəndaşların Prezident İlham Əliyevin rəhbərliyi ilə həyata keçirilən siyasətə mütləq inam və etimad bəslədiklərini, xalq-iqtidar birliyinin sarsılmaz təməllərə söykəndiyini göstərir. Yeri gəlmişkən, Sosial Tədqiqatlar Mərkəzinin “İnam İndeksi” jurnalının VI buraxılışında Prezidentin fəaliyyəti ictimai rəydə qiymətləndirilib. Keçirilən sorğu Naxçıvan Muxtar Respublikası və azad olunan ərazilər istisna olmaqla bütün regionları əhatə edib. Sorğuda iştirak edən vətəndaşların Prezidentə inam etimadı 91,2% “tam etibar edirəm”, 6,9% “əsasən etibar edirəm” olmaqla yüksək səciyyələnir. Sorğunun nəticələrinə görə, Prezident Qələbənin memarı kimi qlobal platformalarda intensiv çıxışları ilə Zəfər tariximizi uğurla beynəlxalq aləmə tanıdır (93,6%), Zəfərin tarixiləşdirilməsində vətəndaş iştirakçılığını və ümummilli həmrəyliyi stimullaşdırır (85,7%), Azərbaycanın informasiya siyasətində üstünlüyünü təmin edir və bu yöndə fəaliyyətə dair yeni imkanlar açır (85,7%), milli maraqlarımıza zidd cəhdlərə və xarici təsirlərə qarşı müqaviməti gücləndirir (81,9%), qalibiyyəti milli birliyin və uğurlu siyasətin təminatında əsas resursa çevirməyin vacibliyini şərtləndirir (79,8%).

Göründüyü kimi, cənab İlham Əliyev xalqımızın inam və etimad ünvanıdır. O, Prezident, Müzəffər Ali Baş Komandan, nümunəvi siyasətçi və alternativsiz Lider kimi Azərbaycanı yeni zirvələrə yüksəldir - hər an və hər məqamda xalqın etimadını yenidən doğruldur!

Paylaş:

Baxılıb: 977 dəfə