Prezident İlham Əliyevin Sərəncamı ilə yaradılmış Hökumət Komissiyası fasiləsiz iş rejimində çalışır

Bakı:

13 °C

58 %

13 m/s

AZ RU EN

Ana səhifə / Gündəm / Prezident İlham Əliyevin Sərəncamı ilə yaradılmış Hökumət Komissiyası fasiləsiz iş rejimində çalışır

Prezident İlham Əliyevin Sərəncamı ilə yaradılmış Hökumət Komissiyası fasiləsiz iş rejimində çalışır

22.05.2010 [09:39]

Bölgələrdə baş vermiş təbii fəlakətin miqyasının genişlənməsinin qarşısını almaq üçün kompleks tədbirlər həyata keçirilir
Kür çayında suyun səviyyəsinin artması ilə başlanan daşqın və sel təhlükəsi davam edir. Aprel ayının sonlarında yağan leysan yağışlar nəticəsində çayda suyun səviyyəsi birdən-birə artıb və nəticədə Sabirabad, Kürdəmir, Zərdab, Salyan, Neftçala, Hacıqabul, Saatlı rayonlarında, o cümlədən, Şirvan şəhərində təhlükəli vəziyyət yaranıb. Bəzi kəndləri su basıb. Baş verən təbii fəlakətin nəticələrinin aradan qaldırılması istiqamətində ölkə rəhbərliyi operativ olaraq tədbirlər həyata keçirib. Azərbaycan Prezidenti İlham Əliyevin sədrliyi ilə Kür çayında suyun səviyyəsinin qalxması ilə bağlı baş verən təbii fəlakətlərin nəticələrinin aradan qaldırılması məsələləri ilə bağlı müşavirə keçirilib və dövlət başçısı görülən tədbirlərlə yerində tanış olmaq üçün fəlakət zonasına baş çəkib. Bütün müvafiq strukturlar məsələnin həllinə cəlb edilib və qısa müddət ərzində təhlükəli vəziyyət aradan qaldırılıb. Hazırda bəndbərkitmə işləri davam etdirilir.
Girdman çayında suyun səviyyəsinin artması Kürdəmirdə nəqliyyatın işinə problem yaradıb
Kür çayında suyun səviyyəsinin artması ilə bağlı yaranan problemlər öz həllini tapmaqdadır. Bunu, qəzetimizə açıqlamasında Kürdəmir rayon İcra Hakimiyyəti başçısının birinci müavini, rayon fövqəladə hallar komissiyasının sədri Vasif Məmmədov deyib. Onun sözlərinə görə, son günlərdə çayda suyun səviyyəsi minimal-1-2 sm artıb. Artıq bəndbərkitmə işləri də yekunlaşmaq üzrədir: “Hazırda bütün diqqət Girdman çayı ilə Kürün birləşdiyi ərazidədir. Girdman çayında da suyun səviyyəsinin artması nəqliyyatın hərəkətində müəyyən problemlər yaradıb. Hələlik gözləmə mövqeyindəyik. Bütün qabaqlayıcı tədbirlər görülüb. Rayonda həyat öz axarına düşür. Sadəcə, hələlik Saatlı-İmişli rayonları ərazisindəki Sarısu gölünün suyu Baş Mil-Muğan kollektoruna axıdılsa, Kürdəmir üçün də müəyyən problemlər yaranacaq”.
Vəziyyət stabilləşsə də rayon rəhbərliyi hələ də Kürqırağı kəndləri nəzarətdə saxlayır. V.Məmmədov qrunt sularının da evlərdən çəkilməsi prosesinin də davam etdirildiyini bildirib. Xatırladaq ki, Kür çayında suyun səviyyəsinin artması və çayın öz məcrasından çıxması səbəbilə Kürdəmir rayonunda 700 evi su basıb. Onlardan 150-i qəzalı vəziyyətə düşüb, 50 ev isə tamamilə uçub. 30-a yaxın ailə öz evlərindən köçürülüb. ümumilikdə rayon üzrə 16 kənddə təbii fəlakət hadisəsi baş verib.
Hacıqabul rayonu ərazisində Kür çayında bəndlərdə sızmalar aradan qaldırılıb
Hacıqabul rayonunda da vəziyyət normallaşıb. İki gün ərzində Talış kəndində bəndin sızması ilə bağlı narahatlıqlar aradan qaldırılıb. Bu barədə qəzetimizə məlumat verən rayon İcra Hakimiyyəti başçısının birinci müavini, fövqəladə hallar komissiyasının sədri Sahib Aslanov bəndbərkitmə işlərinin intensivləşdirildiyini diqqətə çatdırıb: “Son iki gündə suyun səviyyəsində yenidən artma müşahidə olunurdu. Bəndlərdə də müəyyən sızmalar vardı. Artıq bütün problemlər həll olunub, sızmalar aradan qaldırılıb, yenidən bəndlər möhkəmləndirilib. Aidiyyəti strukturlar, dövlət orqanları və yerli əhali tam şəkildə səfərbər olunaqar məsələlərin həllində əhəmiyyətli rol oynayırlar. Bütün texnikanı səfərbər halda saxlayırıq. Baş verə biləcək hər hansı bir problemin aradan qaldırılması üçün vasitələrimiz var. Bu məsələdə “Meliorasiya və Su Təsərrüfatı” ASC, Suvarma Sistemləri İdarəsi də öz köməyini əsirgəmir. Yerli əhali bəndlərin möhkəmləndirilməsinə kömək edirlər”.
Xatırladaq ki, daşqın nəticəsində Hacıqabulda 400 evin həyətini qrunt suyu basıb, 150-yə yaxın ev qəzalı vəziyyətə düşüb. 2 ailə isə evindən köçürülüb.
Neftçala rayonunda Xəzər dənizindən Kürün qoluna tərəf liltəmizləmə işləri davam etdirilir
Neftçala rayonunda da Kürdə suyun səviyyəsi artıq enməyə başlayıb. Rayon fövqəladə hallar komissiyasının sədri, İcra Hakimiyyəti başçısının birinci müavini Dilvər Əliyevin verdiyi məlumata görə, suyun səviyyəsi 12 sm azalıb. Kürboyu ərazilərdə bəndlərin bərkidilməsi işlərinin davam etdirildiyini önə çəkən komissiya sədri bildirib ki, ərazilərdə torpaqla doldurulmuş kisələr tədarük edilərək bəndbərkitmə işlərində istifadə olunur: “Suyun səviyyəsinin enməsinə baxmayaraq, texnika və əhali əraziyə cəlb olunub. Xəzər dənizindən Kürün qoluna tərəf liltəmizləmə işləri də davam etdirilir. Bu məqsədlə ərazidə 8 gəmi işləyir”.
Komissiya sədri bildirib ki, ərazidə yüzlərlə texnika hazır vəziyyətdə saxlanılır, əraziyə 160 min kisə qum vurulub. Xatırladaq ki, Kür çayında suyun səviyyəsinin artması zamanı baş verən daşqında Neftçala rayonu ərazisində 300-ə yaxın evin həyətinə qrunt suları daxil olub. 4 ev uçub, 36 ev qəza vəziyyətindədir. 5 ailə yaşadığı evdən evakuasiya olunub.
Zərdab rayonunda suyun səviyyəsi enir
Kürdə suyun səviyyəsinin artması səbəbilə Zərdab rayonunda yaranan təhlükəli vəziyyət aradan qaldırılıb. Artıq çayda suyun səviyyəsi enməyə başlayıb. Rayon fövqəladə hallar komissiyasının sədri, İcra Hakimiyyəti başçısının birinci müavini Allahverdi Səfərov bildirib ki, hazırda Kürün Zərdab rayonundan keçən hissəsində bəndbərkitmə və bəndvurma işləri davam etdirilir: “Hazırda suyun daşması ilə bağlı hər hansı bir təhlükə gözlənilmir. Vəziyyət stabil olsa da, 120 texnika və 3500 nəfər canlı qüvvə Kürətrafı ərazilərdədir. Azərbaycan “Meliorasiya və Su Təsərrüfatı” ASC-nin yerli qurumları, Suvarma Sistemləri İdarəsinin və Kür-bənd İdarəsinin texnikası bəndvurma işlərini davam etdirir. Bundan başqa, artıq Zərdab rayonundan Saatlıya da yardım göndərilib. çayda bəndbərkitmə işlərini intensivləşdirmək üçün Saatlıya 9 maşın həcmində 93 ədəd beton bloklar göndərilib”.
Komissiya sədri bildirib ki, Kürqırağı kəndlərdə bəndin üstündə 24 saat növbətçilik rejimi davam etdirilir.
Pərviz SADAYOÄžLU

Paylaş:

Baxılıb: 1120 dəfə