Prezident İlham Əliyev Müdafiə Sənayesi Nazirliyinin Hesablayan elektron maşınlar zavodunun açılışında iştirak edib

Bakı:

7 °C

93 %

8 m/s

AZ RU EN

Ana səhifə / Gündəm / Prezident İlham Əliyev Müdafiə Sənayesi Nazirliyinin Hesablayan elektron maşınlar zavodunun açılışında iştirak edib

Prezident İlham Əliyev Müdafiə Sənayesi Nazirliyinin Hesablayan elektron maşınlar zavodunun açılışında iştirak edib

17.03.2009 [13:05]

Zavodda yüksək beynəlxalq standartlara cavab verən müdafiə təyinatlı məhsulların seriyalı istehsalı təmin olunub
Azərbaycan Prezidenti İlham Əliyev dünən Müdafiə Sənayesi Nazirliyinin Hesablayan elektron maşınlar (HEM) zavodunun yenidənqurmadan sonra açılış mərasimində iştirak edib.
Dövlət başçısı zavodun yenidənqurmadan əvvəlki vəziyyətini əks etdirən videokadrlara baxıb, müəssisədə yaradılan Heydər Əliyev muzeyi ilə tanış oldu. Muzeydə ulu öndərin Azərbaycana rəhbərlik etdiyi dövrlərdə tikilən müəssisələrin açılışlarını, ümumən, respublikanın inkişafı istiqamətində həyata keçirdiyi tədbirləri əks etdirən fotoşəkillər toplanıb.
Müdafiə sənayesi naziri Yavər Camalov Prezidentə məlumat verib ki, 1972-ci ildə ümummilli lider Heydər Əliyevin təşəbbüsü və səyi nəticəsində əsası qoyulan bu zavod tezliklə o dövrün qabaqcıl müəssisələrindən birinə çevrilib. Həmin illərdə burada müxtəlif növ mülki təyinatlı elektron tipli cihazlar istehsal edilir və ittifaqın 100-dən çox müəssisəsinə göndərilirdi. Zavodun yaradılması respublikamızda elektronikanın inkişafının təməlini qoyub və bu sahədə yüksək ixtisaslı kadrların hazırlanmasına zəmin yaradıb. Sovet İttifaqının dağılmasından sonra isə zavodun tənəzzül dövrü başlayıb və istehsal tamamilə dayanıb. Prezident İlham Əliyevin Müdafiə Sənayesi Nazirliyinin yaradılması haqqında Fərmanının icrası ilə bağlı görülən tədbirlər zavoda ikinci həyat verib.
Dövlətimizin başçısı müəssisədə istehsal olunan məhsulların sərgisinə baxıb. Müdafiə Sənayesi Nazirliyinin digər müəssisələrində olduğu kimi, HEM zavodunda da əsaslı yenidənqurma işləri aparılıb, inkişaf edən ölkələrin ən müasir və dünya standartlarına cavab verən yüksək texnologiyaları quraşdırılıb. Prezident İlham Əliyev zirehli maşınların istehsalı sexində olan “Motodor” maşınının göstəriciləri ilə tanış olub. Cənubi Afrika Respublikasının “Paramaunt qrup” şirkəti ilə müqaviləyə əsasən zavodda yığılan bu maşınlar texniki göstəricilərinə görə dünya standartlarına cavab verir. Azərbaycan MDB məkanında bu zirehli texnikanı buraxan yeganə ölkədir. “Paramaunt qrup”un prezidenti məlumat verib ki, 14 nəfərlik “Matador”un yükgötürmə qabiliyyəti 4500 kiloqramdır. Uzunluğu 6,57 metr, eni 2,47 metr olan “Matador” mailliyi 60 dərəcə olan yoxuşu qalxa bilir.
Dövlətimizin başçısına xatirə hədiyyəsi olaraq “Matador”un maketi təqdim olunub.
Zavod istehsalın həcmini ildən-ilə 25-30 faiz artırmaqla yeni növ məhsulların buraxılmasını qarşıya məqsəd qoyub. Bu məhsulların xaricə ixracı da nəzərdə tutulub. Son iki ildə müəssisə öz məhsullarını beynəlxalq sərgilərdə də uğurla nümayiş etdirir.

Paylaş:

Baxılıb: 1514 dəfə