Gəncədə Azərbaycan Dövlət Aqrar Universitetinin 85 illiyinə həsr edilmiş beynəlxalq elmi-praktik konfrans işə başlayıb

Bakı:

27 °C

59 %

9 m/s

AZ RU EN

Ana səhifə / Elm / Gəncədə Azərbaycan Dövlət Aqrar Universitetinin 85 illiyinə həsr edilmiş beynəlxalq elmi-praktik konfrans işə başlayıb

Gəncədə Azərbaycan Dövlət Aqrar Universitetinin 85 illiyinə həsr edilmiş beynəlxalq elmi-praktik konfrans işə başlayıb

23.09.2014 [09:35]

Sentyabrın 22-də Gəncə şəhərindəki Heydər Əliyev Mərkəzində Azərbaycan Dövlət Aqrar Universitetin 85 illiyinə həsr olunmuş “Müasir aqrar elm: Qloballaşma şəraitində əsrin aktual problemləri və inkişaf perspektivləri” mövzusunda Beynəlxalq elmi-praktik konfrans öz işinə başlayıb.
AzərTAc xəbər verir ki, Azərbaycan Respublikası Kənd Təsərrüfatı Nazirliyinin, Gəncə şəhər İcra Hakimiyyətinin və Azərbaycan Dövlət Aqrar Universitetinin birgə təşkil etdikləri konfransda 11 xarici dövlətdən 34 nümayəndə olmaqla, ümumilikdə, 300 nəfər iştirak edir.
İştirakçılar əvvəlcə Ulu öndərin Heydər Əliyev Mərkəzinin qarşısındakı abidəsini ziyarət edərək xatirəsinə ehtiramlarını bildiriblər. Sonra tədbir iştirakçıları Mərkəzdə dahi şəxsiyyətin həyat və siyasi fəaliyyətinin müxtəlif anlarını əks etdirən fotoşəkillərə baxıblar.
Konfransı giriş sözü ilə açan Gəncə şəhər İcra Hakimiyyətinin başçısı Elmar Vəliyev Türkiyə, Amerika Birləşmiş Ştatları, Rusiya, Macarıstan, Sloveniya, Gürcüstan, Norveç, Portuqaliya, Fransa, eləcə də respublikamızın müvafiq ali təhsil və elmi-tədqiqat müəssisələrini təmsil edən nümayəndələri salamlayıb, Azərbaycanda son illər aqrar sahədə aparılan islahatların uğurlu nəticələrindən danışıb. Qeyd edib ki, dahi rəhbər Heydər Əliyev 1969-cu ildə respublikamızda birinci dəfə hakimiyyətə gəldikdən sonra aqrar sahənin inkişafına göstərilən diqqət və qayğı nəticəsində Azərbaycan kənd təsərrüfatı məhsulları idxal edən ölkədən ixrac edən ölkəyə çevrilib. Ulu öndər elə o vaxtdan başlayaraq bu sahənin ixtisaslı kadrlarla təmin olunması üçün Azərbaycan Dövlət Aqrar Universitetinin maddi-texniki bazasının gücləndirilməsinə xüsusi diqqət yetirib. Nəticədə ölkənin aqrar elminin inkişafı dünya səviyyəsinə yüksəlib.
Kənd Təsərrüfatı Nazirliyinin məsul işçisi Rəsul Balayev konfrans iştirakçılarını təmsil etdiyi qurumun rəhbərliyi adından təbrik edib və beynəlxalq tədbirin işinə uğurlar arzulayıb.
Azərbaycan Dövlət Aqrar Universitetinin tədris işləri üzrə prorektoru Anar Hətəmovun universitetin 85 ildə keçdiyi şərəfli yoldan bəhs edən məruzəsi dinlənilib.
Konfransda ABŞ-ın İllinoys Universitetinin professoru Mohammad Babadust, AMEA-nın Gəncə Bölməsinin akademik katibi Fuad Əliyev, Türkiyənin Kastamonu Universitetinin rektoru, professor Aydın Seyit, K.A.Timiryazev adına Rusiya Kənd Təsərrüfatı Akademiyasının rektoru Vladimir Neçayev və başqaları çıxış edərək Azərbaycan Dövlət Aqrar Universitetinin 85 illik yubileyi münasibətilə kollektivi təbrik ediblər. Onlar bu ali təhsil ocağının təkcə Azərbaycanın deyil, bütövlükdə dünya aqrar elminin inkişafına verdiyi töhfələrdən danışıblar.
Sentyabrın 24-dək davam edəcək konfrans çərçivəsində iştirakçılar universitetin qapalı balıqçılıq və quşçuluq mərkəzləri, müasir informasiya texnologiyaları ilə təchiz edilmiş tədris korpusları, eləcə də Gəncənin tarix-memarlıq abidələri və bu şəhərdə aparılan abadlıq-quruculuq işləri ilə yaxından tanış olacaqlar.

Paylaş:

Baxılıb: 2097 dəfə