“Kaspi” Təhsil Mərkəzi üç yeni layihəsini təqdim edib

Bakı:

22 °C

78 %

10 m/s

Əlaqə

AZ RU EN

Ana səhifə / Elm / “Kaspi” Təhsil Mərkəzi üç yeni layihəsini təqdim edib

“Kaspi” Təhsil Mərkəzi üç yeni layihəsini təqdim edib

12.04.2014 [09:56]

Aprelin 11-də Beynəlxalq Mətbuat Mərkəzində “Kaspi” Təhsil Mərkəzinin “Təhsildə müasir texnologiyalar-perspektivlər” mövzusunda tədbiri keçirilib.
AzərTAc xəbər verir ki, bir sıra nazirlik və qurumların, ali məktəb nümayəndələrinin, Milli Məclisin deputatlarının və KİV təmsilçilərinin iştirak etdikləri tədbirdə təhsildə innovativ texnologiyalardan səmərəli istifadə ilə bağlı yeni layihələr təqdim olunub.
“Kaspi” Təhsil Mərkəzinin təsisçisi Sona Vəliyeva tədbirdə 3 böyük layihənin təqdim olunduğunu bildirib. O, bu layihələrin təhsildə keyfiyyətin yüksəldilməsi üçün müasir üsullardan biri olduğunu diqqətə çatdırıb. Sona Vəliyeva bu layihələr üzərində uzun illərdir iş aparıldığını və böyük bir kollektivin əməyinin bəhrəsi olduğunu deyib.
Sona Vəliyev qeyd edib ki, son 3 ildə elektron təhsil sahəsində bir sıra layihələr həyata keçirmiş “Kaspi” Təhsil Mərkəzi bu layihələrin davamı kimi Azərbaycan Respublikasının Diasporla İş üzrə Dövlət Komitəsi ilə birgə Azərbaycanda və ölkədən kənarda yaşayan 5-10 yaşlı uşaqlara əlifba və Ana dilindəki ilkin anlayışları öyrənmələri üçün “Əlifbanı öyrənirəm” layihəsini hazırlayıb. anadili.az saytı vasitəsilə interaktiv oyun şəklində hazırlanan bu layihə uşaqların əlifbanı səsli və şəkilli öyrənmələrini nəzərdə tutur. Həmçinin, bu layihə onların ana dilini öyrənmələrini daha asan və əyləncəli edir. İstifadəsi sadə və rahat olan bu oyun valideynlərə uşaqlarının öyrənmə prosesini izləmək imkanı da verir. Bundan əlavə, balacalar saytın şeirlər bölməsində bir sıra uşaq şeirlərini səsli də dinləyə bilərlər.
Mərkəzin təsisçisi bundan əlavə, onlayn imtahan sistemi olan “Kaspi Test” və “Kaspi” Təhsil Mərkəzindəki öyrənmə proseslərini idarə etmək üçün “Öyrənmənin İdarəolunması Sistemi”nin təqdim edildiyini də deyib.
Sona Vəliyeva təsisçisi olduğu təhsil mərkəzinin yarandığı gündən indiyədək gördüyü işlərdən də danışaraq deyib: “Biz atdığımız addımlarla dövlətin təhsil siyasətinə dəstək veririk. “Kaspi” Təhsil Mərkəzini bitirən 1120 abituriyentimiz ali məktəblərdə təhsil alır. 2015-ci ilə qədər xaricdə təhsil alması nəzərdə tutulan 5 min tələbənin uğurunda “Kaspi” Təhsil Mərkəzinin də rolu vardır”.
Mərkəzin təsisçisi gələcəkdə rəhbərlik etdiyi qurum tərəfindən təhsilimizin inkişafı istiqamətində daha bir neçə layihənin həyata keçiriləcəyini də diqqətə çatdırıb. Bildirib ki, nağılların təfəkkürün formalaşmasındakı böyük rolunu nəzərə alaraq, Mərkəz gələcəkdə uşaqların milli ruhda böyümələrinə kömək edəcək Azərbaycan nağılları əsasında cizgi filmlərini də hazırlamağı planlaşdırır.
Sonra innovativ texnologiyaların səmərəli istifadəsi ilə əlaqədar yeni layihələrin təqdimatı olub.
“Kaspi” Təhsil Mərkəzinin direktoru Elnur Əliyev bildirib ki, bu gün təqdim edilən hər üç layihə Mərkəz tərəfindən son 3 ildə həyata keçirilmiş elektron təhsil sahəsindəki layihələrin davamıdır. E.Əliyev qeyd edib ki, “Əlifbanı öyrənirəm” layihəsinin tədrisi anadili.az saytı vasitəsilə interaktiv şəkildə aparılacaq. “Kaspi” Təhsil Mərkəzi abituriyent hazırlığında da yenilik edərək onlayn imtahan sistemi olan “Kaspi Test”i (www.kaspitest.com) istifadəyə verib. E.Əliyev bildirib ki, bu sistemin məqsədi Mərkəzin təşkil etdiyi sınaq imtahanlarının onlayn qaydada keçirilməsi, istifadəçilərin yer və məkandan asılı olmayaraq həmin imtahanlarda iştirak etməsidir: “Bu sistem istifadəçilər üçün çox rahat olub imtahana müxtəlif cihazlardan (personal kompyuter, noutbuk və ya planşetdən) daxil olma imkanı verir. İstifadəçilər imtahandan dərhal sonra nəticələrini görə və təhlil edə, eləcə də keçmiş imtahan nəticələrinə baxa bilərlər. İstifadəyə verildiyi qısa müddət ərzində böyük marağa səbəb olan “Kaspi Test” imtahan sistemində respublikamızın 45 şəhərindən olan istifadəçilər qeydiyyatdan keçib”.
Mərkəzin direktoru qeyd edib ki, “Kaspi” Təhsil Mərkəzindəki öyrənmə proseslərini idarə etmək üçün “Öyrənmənin İdarəolunması Sistemi” - “Kaspi LMS (Learning Management System)” yaradılıb. Bu sistemin məqsədi müasir texnologiyalardan səmərəli istifadə edərək təhsil müəssisəsindəki öyrənmə, dəyərləndirmə və qiymətləndirmə, mesajlaşma, hesabat, nəzarət və digər prosesləri çevik və mərkəzləşdirilmiş qaydada idarə etməkdir.
Daha sonra çıxış edən Diasporla İş üzrə Dövlət Komitəsi sədrinin birinci müavini Valeh Hacıyev, Milli Məclisin deputatı Gövhər Baxşəliyeva və başqaları təqdim olunan layihələrin əhəmiyyətini vurğulayıblar. Bu layihələrin təhsil sahəsində fəaliyyət göstərən təşkilatlara və geniş ictimaiyyətə çatdırılmasının önəmi qeyd edilib. Natiqlər, həmçinin Azərbaycan təhsilində Mərkəzin rolunu da yüksək qiymətləndiriblər.
Tədbir müzakirələrlə davam edib.

Paylaş:

Baxılıb: 2476 dəfə