Məğlub Ermənistanda daxili siyasi vəziyyət kifayət qədər gərgindir

Bakı:

22 °C

54 %

2 m/s

Əlaqə

AZ RU EN

Ana səhifə / Dünya / Məğlub Ermənistanda daxili siyasi vəziyyət kifayət qədər gərgindir

Məğlub Ermənistanda daxili siyasi vəziyyət kifayət qədər gərgindir

30.07.2021 [08:46]

Məlum olduğu kimi, iyunun 20-də Ermənistanda növbədənkənar parlament seçkiləri baş tutsa da, bəzi müxalifət partiyalarının seçkilərin nəticələri ilə bağlı şikayətləri yeni parlamentin fəaliyyətə başlamasını ləngidib. Erməni mətbuatı yazır ki, avqustun əvvəlində parlamentin ilk iclasının keçirilməsi nəzərdə tutulsa da, məğlub ölkədə daxili siyasi vəziyyət kifayət qədər gərgindir. Müxalif siyasi blokun nümayəndələrinin həbsi, parlament sədri və müavinlərinin seçilməsi məsələsində gözlənilən qarşıdurma, Paşinyanın yeni hökuməti formalaşdırmaq üçün kadr çatışmazlığından əziyyət çəkməsi siyasi böhranın davam etməsini şərtləndirir.
Bəzi ekspertlərin fikrincə, parlamentin elə ilk iclasından qanunverici hakimiyyətdə böhranın dərinləşməsi qaçılmaz olacaq. Belə ki, mövcud qanunvericiliyə görə, parlamentin üç vitse-spikerindən biri müxalifət qanadından olmalıdır. “Hraparak” qəzeti yazır ki, parlamentin ilk iclasına bir neçə gün qalmasına baxmayaraq, parlamentə daxil olan müxalifətçilər üçüncü vitse-spiker məsələsi ilə bağlı razılığa gələ bilmirlər. Qəzet, həmçinin bloklara daxil olan siyasi partiyalar arasında bu vəzifə uğrunda mübarizənin getdiyini də yazır: “Məsələn, “Ermənistan” blokunda daşnaklar “Daşnaksutyun” partiyasının nümayəndəsi İşxan Saqatelyanın namizəd göstərilməsi üçün bütün vasitələrə əl atırlar. Onların arqumenti odur ki, Saqatelyan guya “hərəkatın simvolu” olub, onun obrazı sayəsində küçə mübarizəsi nəticə verib və hakimiyyət seçkilərə getmək məcburiyyətində qalıb”.
Qəzet parlamentdə mandat qazanan “Şərəfim var” blokunda da vitse-spiker postuna namizədlə bağlı fikir ayrılığı olduğu barədə yazıb.
Bu arada, erməni mediasının yazdığına görə, hazırda Paşinyan hakimiyyəti yeni parlamentdə təhlükəsizlik tədbirlərini artırmaqla yanaşı, aparatı yeniləməklə də məşğuldur. “ArmLur.am” yazır ki, Ermənistan parlamentinin aparatında köklü dəyişikliklər baş verir. Sayt öz mənbəsinə istinadən bildirir ki, artıq aparat rəhbəri Arnak Avetisyanı kimin əvəz edəcəyi məlumdur: “Sözügedən vəzifə parlamentin sədri olacağı şübhə doğurmayan Alen Simonyanın dostu Vahan Naribekyana həvalə ediləcək. Bu arada, parlamentin aparat rəhbərinin müavini Samvel Meliksetyan da artıq istefa məktubu yazıb”.
Sayt yazır ki, parlamentin protokol şöbəsinin müdiri Artak Hovannisyan da tutduğu vəzifədən azad ediləcək. Sabiq spiker Ararat Mirzoyan təhlükəsizlik şurasının katibi təyin edildiyi halda, Hovannisyanın onun yanında işə başlayacağı ehtimal edilir.
Göründüyü kimi, məğlub Ermənistanda daxili siyasi durum gərgin olaraq qalır. Yeni parlament işə başlamamış vəzifə uğrunda aparılan mübarizələr, qanunverici orqanda nəzarəti gücləndirmək cəhdləri bu vəziyyəti daha da qəlizləşdirir.
Qaşqay ZİYƏDDİNOĞLU

Paylaş:

Baxılıb: 833 dəfə