Siyasi qarşıdurma məğlub Ermənistanı fəlakətə sürükləyir

Bakı:

26 °C

46 %

3 m/s

Əlaqə

AZ RU EN

Ana səhifə / Dünya / Siyasi qarşıdurma məğlub Ermənistanı fəlakətə sürükləyir

Siyasi qarşıdurma məğlub Ermənistanı fəlakətə sürükləyir

16.12.2020 [09:22]

Etiraz aksiyalarını davam etdirən müxalifət mövcud hakimiyyətin devrilməsi üçün sona qədər gedəcəyini nümayiş etdirir
Məlum olduğu kimi, təcavüzkar siyasətinin qurbanı olan işğalçı Ermənistanın Azərbaycan qarşısında ağır məğlubiyyəti noyabrın 10-dan bu ölkədə sabitliyin pozulmasına gətirib çıxarıb. 1 aydan çoxdur ki, ölkənin hər yerində baş nazir Nikol Paşinyanın istefasını tələb edən vətəndaşlar müxalifətin təşkil etdiyi aksiyalara qoşularaq hakimiyyətə öz etirazlarını bildirirlər. Ermənistanın prezidentindən tutmuş sıravi vətəndaşına qədər bütün ölkə N.Paşinyanı istefaya çağırsa da, baş nazir son açıqlamaları ilə göstərib ki, hakimiyyətdən əl çəkmək fikri yoxdur. Belə ki, baş nazir funksiyalarını yerinə yetirməyə davam edəcəyini vurğulayan Paşinyan yalnız seçkilər yolu ilə hakimiyyətdən gedəcəyini deyib. Buna baxmayaraq, Ermənistan mətbuatının yazdığına görə, “Vətənin xilası naminə hərəkat”ın çağırışına qoşulan çoxsaylı vətəndaşlar Ermənistanın bütün vilayətlərində Paşinyanın istefası tələbi ilə vətəndaş itaətsizliyi aksiyalarını davam etdirirlər. “News.am” yazır ki, ölkənin ikinci şəhəri olan Gümrüdə narazı kütlə baş nazirin istefası tələbi ilə yürüş keçirib və şəhərin mərkəzində yolları bağlayıb. Paytaxtda da vətəndaşlar Alagöz-Artik kəsişməsinin yaxınlığında Vanadzor-Yerevan magistral yolunu bağlayıblar.
Qeyd edək ki, “Vətənin xilası naminə hərəkat” Yerevanın mərkəzində “Ləyaqət yürüşü” təşkil edib. “Aysor.am” saytı yazır ki, yürüş zamanı jurnalistlərin suallarını cavablandıran müxalifətin vahid namizədi Vazgen Manukyan baş nazirin başqa çıxış yolu qalmadığını, dərhal istefa verməli olduğunu deyib. V.Manukyan deyib ki, 5-6 ay sonra Paşinyan seçki keçirsə, ciddi pozuntular və saxtalaşdırmalar olacaq: “Paşinyan hakimiyyətdə qalmaq üçün hər vasitəyə əl atır. Ona görə də müxalifət indi seçki tələb etmir. Çünki müxalifət bu növbədənkənar seçkilərin saxtalaşdırılacağını bilir. Vətən xaini ya intihar edir, ya da vəzifədən gedir”.
“News.am”ın yazdığına görə, keçmiş ədliyyə naziri Arpine Ovannesyan hüquq-mühafizə orqanlarının əməkdaşlarını N.Paşinyanın göstərişlərini yerinə yetirməməyə çağırıb. “Daşnaksutyun” partiyasının idarə heyətinin üzvü İşxan Saqatelyan isə deyib ki, bu gün xalqın dəstəyindən istifadə etdiyini deyənlər xalqın ləyaqətini təhqir edirlər: “Bu ölkədə ilk dezinformasiya yayan da Nikoldur. Nikol artıq siyasi cəhətdən mövcud deyil. Getməsə, vəzifə ondan azad ediləcək”.
Onun sözlərinə görə, Paşinyan hakimiyyətdə qalmaq üçün bütün vasitələrə əl atır və onun 19 dekabrda elan etdiyi üç günlük matəmin məqsədi də kütləvi etiraz aksiyalarının qarşısını almaqdır.
Onu da vurğulayaq ki, N.Paşinyan xalqın iradəsi ilə seçildiyini bəhanə edərək istefa verməsə də, xalqdan qorxduğunu nümayiş etdirib. “Panorama.am” yazır ki, Yerevanda müxalifət tərəfindən təşkil edilən yürüşün iştirakçıları Ərəbkir inzibati ərazisindən şəhərin mərkəzi küçələri ilə Respublika meydanındakı Ermənistan hökumətinin binasına doğru yaxınlaşarkən 10-dan çox maşının, polis və təhlükəsizlik xidmətinin silahlı zabitlərinin müşayiəti ilə Paşinyan hökumət binasından qaçıb.
Beləliklə, müxtəlif bəhanələrlə öz hakimiyyətinin ömrünü uzatmaq istəyən baş nazirin ciddi müqavimətini dəyərləndirən yerli ekspertlərin qənaətlərinə görə, Paşinyanın inadkarlığı məğlub Ermənistanı fəlakətə sürükləyir. Çünki vətəndaş itaətsizliyi aksiyalarını davam etdirən müxalifət ritorikasını daha da sərtləşdirir və mövcud hakimiyyətin devrilməsi üçün sona qədər gedəcəyini nümayiş etdirir.
Qaşqay

Paylaş:

Baxılıb: 806 dəfə