Paşinyan hakimiyyətdən uzaqlaşdırıla bilər

Bakı:

27 °C

46 %

3 m/s

Əlaqə

AZ RU EN

Ana səhifə / Dünya / Paşinyan hakimiyyətdən uzaqlaşdırıla bilər

Paşinyan hakimiyyətdən uzaqlaşdırıla bilər

23.05.2020 [13:43]

Erməni ekspertlərin fikrincə, yüz minlərlə vətəndaşın narazılığını görən baş nazir koronavirusa qarşı mübarizə aparmaq əvəzinə, avtoritar idarəetmə sisteminə keçidlə məşğul olur

Son dövrlərdə işğalçı Ermənistanda daxili gərginlik pik həddə çatıb. Belə ki, ölkədə fövqəladə vəziyyət rejiminin mövcud olmasına baxmayaraq, hər gün Yerevanın mərkəzində və digər şəhərlərdə etiraz aksiyaları keçirilir. Əvvəllər bu aksiyalar sosial xarakterli idisə, artıq siyasi mahiyyət daşımağa başlayıb. Çıxılmaz vəziyyətə düşən baş nazir Nikol Paşinyan isə fövqəladə vəziyyət müddətinin vaxtını uzatmaqla, etiraz dalğasının qarşısını almağa çalışır. Aksiyaların güc tətbiqi ilə dağıdılması, iştirakçıların həbs edilməsi daxildəki siyasi gərginliyi daha da artırıb. Digər tərəfdən, hakim “Mənim addımım” blokunun üzvlərinin baş nazirdən narazı olması N.Paşinyanın vəzifədən uzaqlaşdırılması ehtimalını gündəmə gətirib.

Hakim partiya artıq Paşinyana etimad göstərmir

Erməni mətbuatının iddiasına görə, nüfuzunu itirən N. Paşinyanın yerinə namizəd də artıq bəllidir. “İrates” qəzeti yazır ki, parlamentdəki sonuncu “əlbəyaxa döyüş”dən sonra “Mənim addımım” blokundan olan deputatlar da artıq N.Paşinyana etimad göstərmirlər. Qəzet yazır ki, məyus olanlar olduqca çoxdur və baş nazir N.Paşinyanın ölkədə yaranmış mövcud vəziyyətin öhdəsindən gələ biləcəyinə də şübhə edirlər: “Parlamentin kuluarlarında gəzən söz-söhbətlərə görə, blokdan olan deputatların bir çoxu Nikolun yerində baş nazirin müavini Tiqran Avinyanı görürlər”.

Bu xəbərlərin fonunda Ermənistanın Vatikandakı keçmiş səfiri, sabiq prezident Serj Sarkisyanın kürəkəni Mikael Minasyan “Mənim addımım” blokuna N.Paşinyanın vəzifədən kənarlaşdırılmasını və yeni baş nazirin seçilməsini tövsiyə edib. “Sputnik-Ermənistan”ın yazdığına görə, hazırda İtaliyada yaşayan və axtarışda olan M.Minasyan qeyd edib ki, Paşinyanın rəhbərlik etdiyi hökumət koronavirus pandemiyasının yaratdığı iqtisadi böhranın nəticələrini aradan qaldırmaq iqtidarında deyil. Keçmiş səfir hesab edir ki, Paşinyan yalnız məhv etməyi və dağıtmağı bacarır.

Məsələ ilə bağlı “panorama.am” saytına müsahibəsində politoloq Hrant Melik-Şahnazaryan isə bildirib ki, N.Paşinyan Ermənistanın siyasi inkişafında destruktiv faktordur və uzun müddətdir, daxili siyasi gərginliyi qızışdırmaqla məşğul olur. Onun sözlərinə görə, N.Paşinyanın siyasi metodlarının olmaması səbəbindən ölkənin üzləşdiyi problemləri həll etmək mümkün deyil.

Fövqəladə vəziyyət rejimi etiraz dalğasını yatırmağa hesablanıb

Yuxarıda da vurğulandığı kimi, hökumətdaxili problemlərlə yanaşı, əhalinin narazılığı getdikcə artır. Belə ki, Yerevanda hökumətin siyasətinə qarşı növbəti etiraz aksiyaları keçirilib.“News.am” saytı yazır ki, sahibkarlar, restoran işçiləri, musiqiçilər və aparıcıların hökumət binası qarşısında etiraz aksiyasının qarşısı qəddarlıqla alınıb və iştirakçılar həbs olunub. Həmin gün “Adekvad” təşkilatının üzvləri və Respublikaçı Partiyanın gənclər qanadının nümayəndələrinin aksiyası da güc tətbiqi ilə dağıdılıb, fəalların bir çoxu həbs edilib.

Eitrazçıların həbsinə münasibət bildirən Respublikaçı Partiyanın mətbuat katibi, keçmiş deputat Eduard Şarmazanov deyib ki, koronavirusla mübarizə baxımından Paşinyan artıq vəziyyətə hakim deyil və fövqəladə vəziyyət rejiminin davam etdirilməsinin yeganə məqsədi etirazların qarşısını almaqdır. E,Şarmazanovun sözlərinə görə, vəziyyətin nəzarətdən çıxdığını anlayan N.Paşinyan hakimiyyətinə qarşı narazılıq dalğasını yatırmağa çalışır.

Sözügedən partiyanın sədr müavini A.Aşotyanın sözlərinə görə, sonuncu çıxışlarından da görünür ki, Paşinyan panika içərisindədir: “Buna səbəb yüz minlərlə vətəndaşın ondan narazı olmasıdır. Bu adam xalqın problemlərini həll etmək üçün hakimiyyətə gəlməyib. İki il əvvəl bu həqiqət bəzilərinə, o cümlədən bizə aydın idi, bu gün yüz minlərlə insana bəllidir”,-deyən A.Aşotyan bildirib ki, bu gün baş nazir koronavirusa qarşı mübarizə aparmaq əvəzinə, avtoritar idarəetmə sisteminə keçidlə məşğul olur.

Qaşqay ZİYƏDDİNOĞLU

Paylaş:

Baxılıb: 787 dəfə