Ermənistanda xalq hərbi xuntanı devirdi

Bakı:

17 °C

58 %

10 m/s

Əlaqə

AZ RU EN

Ana səhifə / Dünya / Ermənistanda xalq hərbi xuntanı devirdi

Ermənistanda xalq hərbi xuntanı devirdi

25.04.2018 [08:58]

Apardığı işğalçı siyasətə görə Ermənistanı bütün regional və beynəlxalq layihələrdən kənarda qoyan Sarkisyan rejimi qovuldu
Ermənistanda aprelin 13-dən başlayan etiraz mitinqləri baş nazir Serj Sarkisyanın istefası ilə nəticələndi. Belə ki, aprelin 17-də Ermənistan parlamentinin Serj Sarkisyanı baş nazir “seçməsinin” ardından daha da güclənən etiraz aksiyaları qısa zaman kəsiyində bütün ölkəni bürüdü. Belə demək mümkündürsə, Sarkisyan rejimindən cana doymuş ermənilər hərbi xuntanın öz hakimiyyətinin ömrünü uzatması cəhdinin qarşısını aldılar. Nəticədə, etirazçıların təkidi ilə Sarkisyanın baş nazirlik sevdası yarımçıq qaldı. Baş nazir vəzifəsinin müvəqqəti icrası isə baş nazirin birinci müavini Karen Karapetyana həvalə olundu.
Vurğulayaq ki, Ermənistan prezidenti Armen Sarkisyan artıq hökumətin istefasını qəbul edib. Etirazçıların lideri Nikol Paşinyan isə Serj Sarkisyanın istefası ilə kifayətlənmədiklərini dilə gətirib. O bildirib ki, Ermənistanda yeni parlament seçkiləri keçirilməlidir. Paşinyanın sözlərinə görə, baş nazir Serj Sarkisyan vəzifəsindən istefa verdikdən sonra gündəmdə bir sıra məsələlər var. Bu sırada isə ilk addım parlamentin istefaya getməsi və yeni parlament seçkilərinin keçirilməsidir.
Erməni xalqı ölkəni öz biznesinə çevirən mafioz klandan canını qurtardı
Beləliklə, Ermənistanda baş verənlər Sarkisyan rejiminin - hərbi xuntanın həyata keçirdiyi siyasətin məntiqi sonluğu sayıla bilər. Serj Sarkisyan illərdir ki, rəhbərlik etdiyi klan vasitəsilə Ermənistanın bütün resurslarını istismar edib, sistemli korrupsiya maşını yaradaraq xarici diasporun göndərdiyi ianələri belə mənimsəyib. Bu gün Ermənistanda iqtisadi vəziyyət acınacaqlı haldadır. Ölkə iqtisadiyyatının elə bir sahəsi yoxdur ki, orada çöküş hiss olunmasun. İllik gəlirlər isə ildən-ilə azalmaqdadır. Uzun illərdir ki, Ermənistan hakimiyyəti rəsmi şəkildə heç bir iqtisadi inkişaf proqnozlaşdırmaq iqtidarında deyil. Bu isə Ermənistanda cinayətkarlığın sayının xeyli artmasına zəmin yaradıb. İqtisadi durumun pis olması bu ölkədə insanların istər ərzaq təminatında, istərsə də sağlamlıqla bağlı böyük problem yaradıb. Bundan başqa, Rusiyaya və digər ölkələrə miqrasiya edən ermənilərin sayı da ildən-ilə artmaqdadır. Bu faktlar ölkədə vətəndaşların acınacaqlı vəziyyətini açıq şəkildə izah edir. Bununla yanaşı, bu ölkədə, demək olar ki, hər iki aydan bir enerji tariflərinin artması müşahidə olunur və yerli kənd təsərrüfatı məhsullarının satışı çox aşağı səviyyədədir. İşsizlik problemi isə həddindən artıq böyükdür və ildən-ilə işsiz insanların sayı artmaqdadır. Yaradılan azsaylı iş yerlərində isə Sarkisyan komandasına daxil olan məmur-oliqarxların qohumları çalışırlar.
Hərbi xunta ötən 20 il ərzində Dağlıq Qarabağ kartı ilə erməniləri aldatdı
Məhz bu faktlar bir daha göstərir ki, Ermənistanın bir dövlət kimi varlığı sual altındadır. Dövlətini idarə edə bilməyən, bütün strateji obyektlərini “investisiya” adı altında xarici ölkələrin şirkətlərinə satan Serj Sarkisyan komandası apardığı işğalçı siyasətin məngənəsində boğulmaqdadır. Apardığı işğalçı siyasətə görə bölgədə reallaşan bütün qlobal və regional layihələrdən kənarda qalan, Cənubi Qafqaz regionunun ümumi inkişaf tempindən aşağı səviyyədə olan Ermənistanın iqtisadiyyatı artıq son nəfəsini vermək üzrədir. Görünən isə budur ki, erməni xalqı aparılan yanlış siyasətin - işğalçılıq və özünütəcrid siyasətinin zərərlərini hiss edir və yaşayır. Azərbaycanın artan iqtisadiyyatının, güclənən ordusunun fonunda Ermənistanın düşdüyü acınacaqlı durum bir çox mətləblərdən xəbər verir. Belə ki, artıq Ermənistan tərəfi Dağlıq Qarabağ kartı ilə hər hansı bir manevr imkanına malik deyil. Həm siyasi, həm iqtisadi, həm də hərbi cəhətdən Azərbaycandan dəfələrlə geri qalan işğalçı Ermənistan artıq özünü “qalib” kimi təqdim edə bilmir. 2016-cı ilin aprel döyüşlərində uğradığı ağır məğlubiyyət bütün reallıqları çılpaqlığı ilə ortaya çıxarıb. Sarkisyanın illərdir ki, arxasına sığınaraq erməniləri aldatdığı bəhanəsi də əlindən çıxıb. Bundan başqa, Ermənistanın “özünün dostu” elan etdiyi ölkələrin də Azərbaycanla yaxın münasibətlər qurması artıq Sarkisyanın yalanlarının ifşasını gerçəkləşdirən amil kimi çıxış edir.
Xocalı qatili Serj Sarkisyan məhkəmə qarşısında cavab verməlidir
Beləliklə, xalqın etirazı nəticəsində artıq istefaya göndərilən Serj Sarkisyanın etdiyi cinayətlər sayagəlməzdir. Azərbaycan torpaqlarının işğalı zamanı erməni qoşunlarına rəhbərlik edən Sarkisyan XX əsrin ən böyük hərbi cinayətlərindən sayılan, yüzlərlə dinc insanın qətlə yetirildiyi Xocalı soyqırımının təşkilatçılarından və iştirakçılarından biridir. Eləcə də Sarkisyan 2008-ci ildə Ermənistanda ona etiraz edən kütləni gülləbaran etməklə dinc etirazçıların da qətlində günahkar sayılır. Bu mənada, onun ədalət məhkəməsi qarşısında cavab verməli olması yenidən aktuallıq qazanır. Və Azərbaycan dövləti Sarkisyanın hərbi tribunal qarşısında cavab verməsi üçün əlindən gələni edəcək...
Pərviz SADAYOĞLU

Paylaş:

Baxılıb: 1278 dəfə