Fransada sənaye böhranı dərinləşir

Bakı:

14 °C

77 %

8 m/s

Əlaqə

AZ RU EN

Ana səhifə / Dünya / Fransada sənaye böhranı dərinləşir

Fransada sənaye böhranı dərinləşir

03.11.2025 [19:20]

Fransa Ümumi Əmək Konfederasiyasının (CGT) baş katibi Sofi Bine artan sosial planlar və 300 mindən çox iş yerinin təhlükədə olması barədə xəbərdarlıq edib.

AZƏRTAC xəbər verir ki, Fransada sosial planların — yəni ixtisar və işdən çıxarma proqramlarının — sayı dramatik şəkildə artmaqdadır. Ölkənin ən böyük həmkarlar ittifaqlarından biri olan CGT-nin baş katibi Sofi Bine bu vəziyyəti kütləvi sənayesizləşmə kimi qiymətləndirib.

CGT-nin hesablamalarına görə, 2024-cü ilin iyun ayından bəri 444 sosial plan elan edilib, bunların 325-i sənaye müəssisələrinə aiddir. Bu proses nəticəsində 300 minə yaxın iş yeri risk altındadır: “Bu, buz dağının yalnız görünən hissəsidir. Rəqəmlər əsl miqyasın çox kiçik bir hissəsini əks etdirir”.

Fransa Statistika İnstitutu (Insee) tərəfindən yayılan məlumatlara görə, 2024-cü ilin üçüncü rübündə işsizlik səviyyəsi artıb.

“Rəqəmlər aydındır. Onları kiçiltməyə çalışmaq əbəsdir. İşsizlik bütün kateqoriyalarda artır və bu, artıq ilboyu davam edən bir tendensiyadır”, – deyə Sofi Bine RTL radiosuna müsahibəsində bildirib.

CGT lideri xüsusilə sənaye müəssisələrinin bağlanmasına diqqət çəkib. Onun sözlərinə görə, hazırda Fransada açılan hər yeni zavodun əvəzində iki zavod bağlanır. O, həmçinin prezident Emmanuel Makronun iqtisadi siyasətini kəskin tənqid edərək onun sosial fəlakətə və iqtisadi iflasa səbəb olduğunu bildirib. CGT hesab edir ki, hökumətin təklif yönümlü siyasəti – yəni şirkətlərə böyük maliyyə dəstəkləri vermə strategiyası – əks effekt verib: “211 milyard avro dövlət vəsaiti şirkətlərə heç bir şərt və qarşılıq olmadan verilib. Nəticədə bizim sənayemiz çamadanlarını yığıb gedir”.

Sofi Bine bu gün sənaye naziri Sebastyan Martin ilə görüşəcəyini, iqtisadi və sənaye siyasətində kurs dəyişikliyi tələb edəcəyini deyib.

“Bizim ilk tələbimiz sadədir; iqtisadi siyasət dəyişməlidir. “Çek kitabı siyasəti” artıq davam edə bilməz. Dövlət dəstəyindən yararlanan şirkətlər işçiləri ixtisar etməməlidir”, – deyə CGT rəhbəri vurğulayıb.

Fransa hazırda sənaye strukturlarının zəifləməsi, işsizliyin artması və ictimai narazılığın yüksəlməsi ilə xarakterizə olunan bir mərhələdən keçir. CGT-nin xəbərdarlığı yalnız həmkarlar ittifaqı ritorikası deyil, həm də Avropada sənaye rəqabətinin zəifləməsi fonunda ciddi iqtisadi siqnaldır. Əgər hökumət yaxın aylarda şirkətlərə verilən dəstəyin şərtlərini sərtləşdirməsə, Fransa istehsal gücünün bir hissəsini itirə və sosial gərginliyin yeni dalğası ilə üzləşə bilər.

Paylaş:

Baxılıb: 442 dəfə