Ermənistanda Putinin Bakıya səfərini həzm edə bilmirlər

Bakı:

18 °C

68 %

3 m/s

Əlaqə

AZ RU EN

Ana səhifə / Dünya / Ermənistanda Putinin Bakıya səfərini həzm edə bilmirlər

Ermənistanda Putinin Bakıya səfərini həzm edə bilmirlər

28.08.2013 [09:16]

Artak Zakaryan: Təbii ki, tərəfdaşımız olan bir ölkənin düşmənimiz sayılan ölkə ilə istənilən ikitərəfli münasibəti bizi narahat etməlidir
Rusiya Federasiyasının prezidenti Vladimir Putinin avqustun 13-də Bakıya rəsmi səfəri Ermənistanda məyusluğa səbəb olub. Həmin səfərdən düz 10 gündən artıq vaxt keçməsinə baxmayaraq, Vladimir Putinin Azərbaycana məlum səfəri Ermənistanda hələ də ciddi müzakirə predmeti olaraq qalır. Ermənistan mediasının erməni politoloqlarının açıqlamalarına istinadən verdiyi xəbərlərdən belə məlum olur ki, rəsmi İrəvan sözün əsl mənasında ciddi çaşqınlıq içindədir. Bütövlükdə, belə qənaətə gəlmək olar ki, Rusiya prezidentinin Azərbaycana səfəri Ermənistanın təhlükəsizliyinə ciddi hədə kimi qəbul olunur. Belə ki, Ermənistanın prezidenti Serj Sarkisyanın Vladimir Putini dəfələrlə ölkəsinə dəvət etməsinə baxmayaraq, o, Bakıya səfər edib. Bu fonda ekspertlər Rusiya-Azərbaycan əlaqələrinin yaxşılaşmasını Ermənistan diplomatiyasının tamamilə iflası kimi qiymətləndirirlər.
İşğalçı ölkədəki müxtəlif dairələr hesab edirlər ki, Rusiyanın Azərbaycana doğru addım atmasında səbəb guya Ermənistanın Avropa yolunu tutmasındadır. Yəni, Ermənistanın Avropa İttifaqı (Aİ) ilə assosiativ saziş imzalamaq niyyəti rəsmi Moskva tərəfindən dəstəklənmir. Cavab tədbiri olaraq isə Moskva tərəfindən atılan addımlar nəticəsində Ermənistanın ixrac etdiyi mallarının Rusiyada idxalı əhəmiyyətli dərəcədə azalacaq. Bundan başqa, Rusiyadakı 2,5 milyonluq erməni diasporunun vəziyyəti pisləşəcək, 2,5 milyard dollara çatan pul köçürmələri azalacaq. O da istisna edilmir ki, Aİ ilə assosiativ sazişdən sonra Rusiya Ermənistana satılan qazın qiymətini yenidən gözdən keçirəcək. Həmçinin, Ermənistan hərbi sferada Rusiyanın ən təhlükəli sanksiyaları ilə üzləşə bilər.
Xatırladaq ki, daha öncə oxuculara təqdim etdiyimiz Ermənistanda nəşr olunan “Lragir” qəzetində dərc edilən “Vladimir Putin prezident kürsüsünə qayıtdıqdan sonra bölgədə ilk səfərini Azərbaycana etdi” başlıqlı yazı da deyilənləri sübut edir. Məqalədə deyilir ki, Vladimir Putin ilk regional səfərini “strateji müttəfiqi olan ölkəyə yox, onun düşməni olan ölkəyə” etdi. Materialdan açıq şəkildə hiss olunur ki, rəsmi Moskvanın son vaxtlar atdığı addımlar Ermənistanda mənfi əks-səda doğurub: “Ermənistanda Rusiyaya qarşı münasibət hələ müsbət olsa da, tendensiyalar ondan xəbər verir ki, yaxın illərdə bu balans dəyişə bilər. Çünki Moskvanın siyasəti Ermənistan üçün çoxlu problem yaradır”.
Qəzet yazır ki, Ermənistanın narazılığına baxmayaraq Moskva Ermənistan üçün məqbul hesab edilməyən mövcud siyasətini davam etdirməkdədir.
Ermənistanlı politoloq Levon Şirinyan isə bildirir ki, Vladimir Putinin Azərbaycana səfəri narahatlığa səbəb olmalıdır: “Rusiya Prezidenti Vladimir Putinin Bakıya rəsmi səfəri Ermənistanda həyəcan yaradır. Rusiya rəsmi olsa da, Ermənistanın strateji tərəfdaşıdır”.
Ermənistanın hakim partiyasının nümayəndəsi, parlamentin xarici münasibətlər üzrə komissiyasının üzvü Artak Zakaryan da vəziyyəti narahatlıq doğuran böyük bir məsələ adlandırıb: “Təbii ki, tərəfdaşımız olan bir ölkənin düşmənimiz sayılan ölkə ilə istənilən ikitərəfli münasibəti bizi narahat etməlidir”.
Başqa bir erməni politoloqu Ağasi Yenokyan qeyd edib ki, Putinin səfərinə, ilk növbədə, Rusiya ilə Azərbaycanın ikitərəfli münasibətləri kontekstində baxmaq lazımdır. Onun sözlərinə görə, Ermənistan rəhbərliyinə mümkün daxili təzyiq imkanlarını itirən Rusiya xaricdən yararlanır: “Ermənistan üçün qazın qiymətini qaldırır, Azərbaycana silah satışı ətrafında səs-küyü artırır, Ermənistan vətəndaşlarını Rusiyadan deportasiya edir. Başqa sözlə, Rusiya Ermənistanla münasibətlərdə “qamçı” nümayiş etdirməyə başlayıb”.
Bununla yanaşı, Ermənistan rəhbərliyi Vladimir Putinin səfəri fonunda regionda geosiyasi vəziyyətin, xüsusən də Ermənistan-Azərbaycan, Dağlıq Qarabağ münaqişəsi ətrafında status-kvonun dəyişə biləcəyindən narahatdır.
Qeyd edək ki, Ermənistan prezidenti Serj Sarkisyan sentyabrın 3-də Moskvaya gedəcək. Bu barədə Ermənistanda nəşr olunan “Joxovurd” qəzeti şəxsi mənbələrinə istinadən məlumat yayıb: “Biz mətbuat katibi Arman Saqatelyanla əlaqə saxladıq. O deyib ki, Serj Sarkisyanın səfərləri barədə bütün məlumatları prezident aparatının informasiya xidməti yayır: “Xahiş edirəm, rəsmi xəbərləri izləyin”.
SEVİNC

Paylaş:

Baxılıb: 1679 dəfə