Ölkəmizdə qadınlar cəmiyyətin bütün sahələrində aktiv rol oynayırlar

Bakı:

32 °C

40 %

11 m/s

Əlaqə

AZ RU EN

Ana səhifə / Daxili siyasət / Ölkəmizdə qadınlar cəmiyyətin bütün sahələrində aktiv rol oynayırlar

Ölkəmizdə qadınlar cəmiyyətin bütün sahələrində aktiv rol oynayırlar

18.09.2014 [09:55]

Samux rayonunda qadınların ictimai-siyasi fəallığının artırılması sahəsində qarşıda duran vəzifələrə həsr olunmuş elmi-praktik konfrans keçirilib
Sentyabrın 16-da Yeni Azərbaycan Partiyası (YAP) Samux rayon təşkilatının və Heydər Əliyev Mərkəzinin birgə təşkilatçılığı ilə elmi-praktik konfrans keçirilib. Konfransda qadınların ictimai-siyasi fəallığının artırılması sahəsində qarşıda duran vəzifələr müzakirə edilib.
Konfransı giriş sözü ilə açan Samux rayon İcra Hakimiyyəti başçısının müavini, YAP Samux rayon təşkilatı Qadınlar Şurasının sədri Kəmalə Xəlilova rayonun ictimai-siyasi həyatında qadınların rolu, onların fəaliyyətinə yaradılan şərait barədə danışıb.
Sonra çıxış edən YAP Samux rayon təşkilatının Aparat rəhbəri Sevinc Xəlilova bildirib ki, Azərbaycanın dövlət müstəqilliyinin bərpasından sonra ölkə qadınlarının qarşısında yeni məqsəd və vəzifələr dururdu. Belə bir şəraitdə qadınların dövlət idarəetmə sistemində lazımi səviyyədə təmsil olunması üçün Ümummilli lider Heydər Əliyevin “Azərbaycan Respublikasında dövlət qadın siyasətinin həyata keçirilməsi haqqında” 2000-ci il 6 mart tarixli Fərmanı müvafiq istiqamətdə mühüm dövlət sənədi oldu.
Vurğulanıb ki, Ulu öndər Heydər Əliyevin əsasını qoyduğu siyasəti uğurla davam etdirən Prezident İlham Əliyevin 2006-cı il 6 fevral tarixli Fərmanı ilə ölkəmizdə Ailə, Qadın və Uşaq Problemləri üzrə Dövlət Komitəsinin yaradılması qadınlarımızın ictimai-siyasi həyatda fəallığının artırılmasına təkan verib. Bu il ölkəmizdə keçiriləcək bələdiyyə seçkilərində qadınların rolundan danışan S.Xəlilova bildirib ki, məqsədimiz qadınların seçkilərdə fəallıq nümayiş etdirmələri, bələdiyyə üzvü olan qadınların sayının daha da artmasına nail olmaqdır.
Konfransda çıxış edən Heydər Əliyev Mərkəzinin direktoru Aygün Həsənzadə qeyd edib ki, bələdiyyə seçkilərində qadınların fəallığı nəticəsində ölkə üzrə qadın bələdiyyə üzvlərinin sayı 4 faizdən 20 faizə çatıb. Azərbaycanın birinci xanımı, Heydər Əliyev Fondunun prezidenti, UNESCO-nun və İSESCO-nun xoşməramlı səfiri, Milli Məclisin deputatı Mehriban Əliyevanın çoxşaxəli fəaliyyətinin qadınlara örnək olduğunu vurğulayan A.Həsənzadə xalqımızın milli-mənəvi dəyərlərinin, mədəniyyətimizin və incəsənətimizin bütün dünyada təbliğində onun xidmətlərinin əvəzsiz olduğunu bildirib.
Konfransda çıxış edən YAP Samux rayon təşkilatı Qadınlar Şurasının üzvü Raziyə Orucova, Çobanabdallı kənd bələdiyyəsinin sədri Svetlana Aslanova, Heydər Əliyev Mərkəzinin elmi işçiləri - İradə Məmmədova və Raziyə Əsədova, fəal qadınlardan Nərgiz Bədəlova qadınların ictimai-siyasi fəallığının artırılması istiqamətində görülən işlərdən, həyata keçirilən tədbirlərdən danışıblar. Bildirilib ki, Azərbaycanda da qadınların cəmiyyətin bütün sahələrində, o cümlədən ölkənin ictimai-siyasi həyatında aktiv rol oynaması vacib məqamlardandır və bu bizim gələcək inkişafımız üçün çox önəmlidir.
NURLAN

Paylaş:

Baxılıb: 1614 dəfə