COP29-da müzakirələr: İnsan kapitalına investisiyaların davamlı kənd təsərrüfatı transformasiyasına və iqlim fəaliyyətinə təsiri

Bakı:

24 °C

57 %

2 m/s

AZ RU EN

Ana səhifə / COP29 / COP29-da müzakirələr: İnsan kapitalına investisiyaların davamlı kənd təsərrüfatı transformasiyasına və iqlim fəaliyyətinə təsiri

COP29-da müzakirələr: İnsan kapitalına investisiyaların davamlı kənd təsərrüfatı transformasiyasına və iqlim fəaliyyətinə təsiri

18.11.2024 [22:58]

BMT-nin İqlim Dəyişmələri üzrə Çərçivə Konvensiyasının Tərəflər Konfransının Bakıda keçirilən 29-cu (COP29) sessiyası çərçivəsində Kənd Təsərrüfatı Nazirliyinin Yaşıl Zonada fəaliyyət göstərən pavilyonunda “AgriFuture 2024: Dayanıqlı və ədalətli gələcək üçün qadınları, gəncləri və innovasiyaları gücləndirən iqlim təsirlərinə davamlı kənd təsərrüfatı” mövzusunda panel müzakirələr keçirilib.

AZƏRTAC xəbər verir ki, İnsan inkişafı, Uşaq və Gənclər, Sağlamlıq, Təhsil Günündə keçirilən panel sessiyanın əsas məqsədi insan kapitalına investisiyaların davamlı kənd təsərrüfatı transformasiyasına və iqlim fəaliyyətinə təsirini müzakirə etməkdir.

Panel sessiyada moderatorluq edən Beynəlxalq Aqrar Tədqiqatlar üzrə Məsləhət Qrupunun (CGIAR) Torpaq, su və aqronomluq üzrə tədqiqat qrupunun rəhbəri Vinay Nangia aqrar sahənin uğurlu inkişafında qadınların və gənclərin mühüm rol oynadığını, innovativ yenilik və təcrübənin kənd təsərrüfatının inkişafına təkan verdiyini qeyd edib.

Panel sessiyanı giriş sözü ilə açan kənd təsərrüfatı naziri Məcnun Məmmədov bildirib ki, bu tədbir bəşəriyyətin gələcəyi üçün vacib məsələlərə xüsusi diqqət yetirilməsi baxımından mühüm əhəmiyyət kəsb edir. Onun sözlərinə görə, kənd təsərrüfatı cəmiyyətin əsasını təşkil etməklə iqtisadiyyatın dəstəklənməsi, əhalinin məşğulluğunun təmin olunması, ərzaqla təminatda vacib rol oynayır. Nazir Məcnun Məmmədov qeyd edib ki, hazırda iqlim dəyişikliyi, məhdud resurslar və dəyişən bazar tələbləri aqrar sahəyə hər tərəfdən təzyiq edir. Azərbaycanda aqrar sahənin inkişafı ilə bağlı icra edilən tədbirlərin tərkib hissəsi kimi gənclərin və qadınların potensial imkanlarının düzgün qiymətləndirilməsi, onların məşğulluq səviyyəsinin artırılması, innovativ layihələrdə iştirakının stimullaşdırılmasının aqrar siyasətin əsas hədəflərindəndir”.

M. Məmmədov fermerlərin üzləşdikləri çətinliklərin həlli istiqamətində Azərbaycanın kənd təsərrüfatı, ətraf mühit və iqlim məsələlərini özündə ehtiva edən fermerlər üçün “Bakı Harmoniya İqlim Təşəbbüsü”nü irəli sürdüyünü tədbir iştirakçılarının diqqətinə çatdırıb. Onun sözlərinə görə, harmoniya kənd təsərrüfatında, qida sistemlərində, su idarəçiliyində iqlim dəyişikliyinə uyğunlaşma və davamlı inkişafın təşviqinə yönəlməklə, müxtəlif təşəbbüsləri, koalisiyaları və tərəfdaşlıqları birləşdirən mərkəzi platforma rolunu oynayacaq, kənd təsərrüfatı sistemlərinin transformasiyasını dəstəkləyəcək, davamlı kənd təsərrüfatını dəstəkləyən investisiyaları səfərbər etməyə imkan verəcək, kənd təsərrüfatının onurğa sütunu və gələcək dayanıqlığın əsas hərəkətverici qüvvəsi olan fermerlərin, xüsusilə qadınların və gənclərin imkanlarının artırılmasına xidmət edəcək.

Panel sessiyada çıxış edən Quraq Ərazilərdə Kənd Təsərrüfatı Tədqiqatları üzrə Beynəlxalq Mərkəzin (İCARDA) İcraçı direktoru İsmahane Elouafi, BMT-nin Ərzaq və Kənd Təsərrüfatı Təşkilatının (FAO) İqlim Dəyişikliyi, Biomüxtəliflik və Ətraf Mühit Ofisinin direktoru Kaveh Zahedi iqlim dəyişikliyi, qida təhlükəsizliyi, su qıtlığı kimi qlobal çağırışların həlli istiqamətində qadınların, gənclərin fəal iştirakının vacibliyinə toxunub, kənd təsərrüfatında rəqəmsal texnologiyaların tətbiqinin əhəmiyyəti, rəqəmsal həllərin istehsalın avtomatlaşdırılmasında rolu, iqlim dəyişikliklərinin təsirlərinin azaldılması, məhsuldarlığın artırılması yolları ilə bağlı fikirlərini bölüşüblər.

“İqlimə davamlı aqroqida sistemləri üçün insan kapitalı: liderlik, elm və icma perspektivləri” mövzusunda panel sessiyada Quraq Ərazilərdə Kənd Təsərrüfatı Tədqiqatları üzrə Beynəlxalq Mərkəzin (İCARDA) mütəxəssisi Akmal Əkrəmxanov, Azərbaycan Kənd Qadınları Assosiasiyasının sədri Gülbəniz Qənbərova fərdi təsərrüfatlara dəstək, ərzaq təhlükəsizliyinin təmin olunması, iqlim dəyişikliyinin aqrar sahəyə təsiri, torpaq, su resurslarından səmərəli istifadə, təbii sərvətlərin, ekoloji tarazlığın qorunması, aqroərzaq sistemlərinin rəqəmsal transformasiyası, kənd yerlərinin, icmaların davamlı inkişafı üçün dayanıqlı kənd təsərrüfatı sisteminin qurulması mövzuları ətrafında fikir mübadiləsi aparıblar.

Panel müzakirələr sual-cavab formatında davam etdirilib.

Paylaş:

Baxılıb: 522 dəfə