İctimai nəzarət mexanizmlərinin gücləndirilməsi və vətəndaş cəmiyyəti institutları ilə əməkdaşlığın genişləndirilməsi vacibdir

Bakı:

26 °C

83 %

10 m/s

AZ RU EN

Ana səhifə / Arxiv / İctimai nəzarət mexanizmlərinin gücləndirilməsi və vətəndaş cəmiyyəti institutları ilə əməkdaşlığın genişləndirilməsi vacibdir

İctimai nəzarət mexanizmlərinin gücləndirilməsi və vətəndaş cəmiyyəti institutları ilə əməkdaşlığın genişləndirilməsi vacibdir

17.07.2026 [16:10]

Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyi və Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin birgə təşkilatçılığı ilə “Satınalma sahəsində dövlət–vətəndaş cəmiyyəti əməkdaşlığı” mövzusunda tədbir keçirilib.

Agentlikdən AZƏRTAC-a bildirilib ki, “Korrupsiyaya qarşı mübarizənin gücləndirilməsinə dair 2022-2026-cı illər üçün Milli Fəaliyyət Planı” üzrə Tədbirlər Planı çərçivəsində təşkil olunan tədbirdə qeyri-hökumət təşkilatları və vətəndaş cəmiyyəti institutları nümayəndələri iştirak ediblər.

Tədbir zamanı Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyinin sədri Elnur Bağırov və Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin İdarə heyətinin sədri Aygün Əliyeva açılış nitqi ilə çıxış ediblər. Çıxışlar zamanı dövlət idarəçiliyində hesabatlılığın və ictimai iştirakçılığın əhəmiyyəti vurğulanıb, dövlət satınalmaları sahəsində rəqabətli və bütün iştirakçılar üçün əlçatan satınalma sisteminin formalaşdırılması istiqamətində həyata keçirilən tədbirlərdən bəhs edilib, ictimai nəzarət mexanizmlərinin gücləndirilməsi və vətəndaş cəmiyyəti institutları ilə əməkdaşlığın genişləndirilməsinin vacibliyi qeyd olunub.

Daha sonra Qeyri-Hökumət Təşkilatlarına Dövlət Dəstəyi Agentliyinin Müşahidə Şurasının sədri Fuad Məmmədov və agentliyin sədrinin birinci müavini Cəfər Babayevin çıxışları dinlənilib. Çıxışlarda dövlət qurumları ilə qeyri-hökumət təşkilatları arasında əməkdaşlığın gücləndirilməsinin və maarifləndirmə fəaliyyətinin əhəmiyyətindən bəhs olunub. Eyni zamanda, dövlət satınalmalarına dair təqdimat nümayiş etdirilərək satınalmaların həcminin dinamikası, elektron satınalmaların tətbiqi nəticəsində əldə olunan göstəricilər, rəqəmsallaşma istiqamətində görülən işlər, Dövlət satınalmalarının vahid internet portalının (etender.gov.az) funksional imkanlarının genişləndirilməsi, digər dövlət informasiya sistemləri ilə inteqrasiya, süni intellekt texnologiyalarının tətbiqi barədə məlumat verilib.

Tədbirdə, həmçinin müxtəlif fond və ictimai birliklərin təmsilçiləri çıxış ediblər. Çıxışlarda satınalma sahəsində mövcud çağırışlar, bu istiqamətdə maraqlı tərəflər arasında kommunikasiyanın gücləndirilməsi və birgə təşəbbüslərin həyata keçirilməsi imkanları diqqətə çatdırılıb.

Tədbir mövzu ətrafında qarşılıqlı müzakirələr və sual-cavab sessiyası ilə yekunlaşıb.

Paylaş:

Baxılıb: 369 dəfə