Siyasi iradədən doğan nəticələr

Bakı:

29 °C

54 %

10 m/s

Əlaqə

AZ RU EN

Ana səhifə / Arxiv / Siyasi iradədən doğan nəticələr

Siyasi iradədən doğan nəticələr

16.07.2026 [10:06]

Şuşada Prezident İlham Əliyev və Slovakiya Prezidenti Peter Pelleqrinin birgə bəyanatları Azərbaycan-Slovakiya münasibətlərinin hazırkı inkişaf səviyyəsini və gələcək perspektivlərini aydın şəkildə ortaya qoydu. Səsləndirilən fikirlər göstərdi ki, son illərdə formalaşan qarşılıqlı etimad artıq konkret layihələr və davamlı siyasi dialoq vasitəsilə öz real nəticələrini verməyə başlayıb.

Azərbaycanın xarici siyasətində mühüm yer tutan prinsiplərdən biri etibarlı tərəfdaşlıq münasibətlərinin qurulmasıdır. Məhz bu yanaşma sayəsində ölkəmiz Avropanın müxtəlif dövlətləri ilə qarşılıqlı maraqlara əsaslanan əlaqələrini ardıcıl şəkildə genişləndirir. Slovakiya ilə münasibətlər də həmin siyasətin uğurlu nümunələrindən biri kimi diqqəti cəlb edir. Son illərdə yüksək səviyyəli qarşılıqlı səfərlərin intensivləşməsi, siyasi məsləhətləşmələrin müntəzəm xarakter alması və müxtəlif istiqamətlər üzrə dialoqun genişlənməsi bunun bariz göstəricisidir. 2024-cü ildə strateji tərəfdaşlığa dair Birgə Bəyannamənin imzalanması ikitərəfli münasibətlərdə yeni mərhələnin əsasını qoydu. Ən vacib məqam isə ondan ibarətdir ki, bu sənəd qısa müddətdə praktik məzmun qazanmağa başlayıb. Müxtəlif sahələr üzrə əməkdaşlığın genişlənməsi, nümayəndə heyətlərinin fəal təmasları və konkret layihələrin icrası siyasi iradənin real nəticələrə çevrildiyini göstərir. Şuşada aparılan müzakirələr bir daha təsdiqlədi ki, tərəflər əməkdaşlığı yalnız siyasi dialoqla məhdudlaşdırmaq niyyətində deyillər. İqtisadi-ticari əlaqələrin genişləndirilməsi, energetika, hərbi-texniki əməkdaşlıq və digər istiqamətlər üzrə yeni imkanların dəyərləndirilməsi münasibətlərin çoxşaxəli xarakter aldığını nümayiş etdirir. Bu yanaşma qarşılıqlı maraqlara söykənən uzunmüddətli tərəfdaşlığın möhkəmlənməsinə xidmət edir.

Münasibətlərin diqqət çəkən istiqamətlərindən biri də Qarabağın bərpası prosesində əməkdaşlıqdır. Xarici şirkətlərin bu prosesə cəlb olunması Azərbaycanın həyata keçirdiyi yenidənqurma siyasətinə beynəlxalq inamın artdığını göstərir. Ağdam rayonunun Baş Qərvənd kəndində həyata keçirilən "Ağıllı kənd" layihəsi də bu baxımdan xüsusi əhəmiyyət daşıyır. Slovakiya şirkətləri tərəfindən həyata keçirilən bu layihə həm müasir yaşayış modelinin formalaşdırılması, həm də beynəlxalq əməkdaşlığın praktik nəticələrinin nümayişi baxımından diqqətəlayiqdir.

Cənab Prezident İlham Əliyevin bəyanatında səsləndirilən fikirlərdən aydın görünür ki, Azərbaycan ikitərəfli münasibətlərin inkişafında konkret nəticələrə üstünlük verir. Məhz buna görə də müxtəlif sahələr üzrə əməkdaşlığın genişləndirilməsi, yeni layihələrin reallaşdırılması və müntəzəm siyasi dialoqun davam etdirilməsi gələcək fəaliyyətin əsas istiqamətləri kimi müəyyənləşdirilir. Şuşadan verilən mesajlar göstərdi ki, Azərbaycan ilə Slovakiya arasında formalaşmış tərəfdaşlıq təsadüfi deyil, düşünülmüş siyasi xəttin və qarşılıqlı etimadın məntiqi nəticəsidir. Bu münasibətlərin möhkəm siyasi əsaslara söykənməsi isə qarşıdakı dövrdə əməkdaşlığın daha da genişlənəcəyinə və yeni uğurlu layihələrlə zənginləşəcəyinə ciddi əsas verir.

Rüstəm Nağıyev,

YAP Gədəbəy rayon təşkilatının sədri

Paylaş:

Baxılıb: 248 dəfə