Azərbaycan–Slovakiya münasibətlərində yeni strateji mərhələ

Bakı:

15 °C

88 %

0 m/s

Əlaqə

AZ RU EN

Ana səhifə / Arxiv / Azərbaycan–Slovakiya münasibətlərində yeni strateji mərhələ

Azərbaycan–Slovakiya münasibətlərində yeni strateji mərhələ

15.07.2026 [16:46]

Slovakiya Respublikasının Prezidenti Peter Pelleqrinin Azərbaycana rəsmi səfəri çərçivəsində iyulun 14-də Şuşa şəhərində keçirilən görüş və Azərbaycan Prezidenti İlham Əliyevin səsləndirdiyi bəyanatlar iki ölkə arasında münasibətlərin inkişafında mühüm siyasi hadisə kimi qiymətləndirilir. Dövlət başçısının çıxışında səslənən fikirlər təkcə mövcud əməkdaşlığın nəticələrini deyil, eyni zamanda gələcək strateji tərəfdaşlığın əsas istiqamətlərini də əhatə etdi. Bu görüş bir daha göstərdi ki, Azərbaycan qarşılıqlı hörmətə, etimada və bərabərhüquqlu əməkdaşlığa əsaslanan xarici siyasət kursunu uğurla davam etdirir. Son illər Prezident İlham Əliyevin rəhbərliyi ilə həyata keçirilən xarici siyasət nəticəsində Azərbaycan beynəlxalq münasibətlər sistemində etibarlı və məsuliyyətli tərəfdaş kimi mövqeyini daha da gücləndirib. Ölkəmizin həm Avropa, həm də digər region dövlətləri ilə formalaşdırdığı qarşılıqlı faydalı əməkdaşlıq modeli Azərbaycanın beynəlxalq nüfuzunun davamlı şəkildə artdığını təsdiqləyir. Slovakiya ilə münasibətlərin strateji tərəfdaşlıq səviyyəsinə yüksəlməsi də məhz bu siyasətin uğurlu nəticələrindən biridir.

Slovakiya Prezidentinin Azərbaycana səfərinə Şuşadan başlaması xüsusi siyasi məna daşıyır. Bu seçim Azərbaycanın suverenliyinə və ərazi bütövlüyünə hörmətin, eləcə də Qarabağda formalaşmış yeni reallıqların qəbul edilməsinin açıq göstəricisidir. İşğaldan azad edildikdən sonra Şuşada həyata keçirilən genişmiqyaslı yenidənqurma və bərpa işləri şəhəri beynəlxalq tədbirlərin keçirildiyi nüfuzlu mərkəzlərdən birinə çevirib. Bu gün Şuşa yalnız Azərbaycanın mədəniyyət paytaxtı deyil, həm də mühüm siyasi və diplomatik görüşlərin təşkil olunduğu strateji məkan kimi tanınır. Prezident İlham Əliyev çıxışında Azərbaycan ilə Slovakiya arasında siyasi münasibətlərin yüksək səviyyədə inkişaf etdiyini və dövlət başçıları arasında qarşılıqlı səfərlərin artıq davamlı xarakter aldığını xüsusi vurğuladı. Bu fakt iki ölkə arasında qarşılıqlı etimadın möhkəmləndiyini, siyasi dialoqun isə uzunmüddətli əməkdaşlığın əsas dayaqlarından birinə çevrildiyini göstərir. Müntəzəm təmaslar yeni layihələrin reallaşdırılması, beynəlxalq təşkilatlar çərçivəsində qarşılıqlı dəstəyin gücləndirilməsi və ortaq maraqların müdafiəsi üçün əlverişli zəmin yaradır. Dövlət başçısı Slovakiyaya etdiyi əvvəlki rəsmi səfəri xatırlayaraq Prezident Peter Pelleqriniyə göstərilən yüksək qonaqpərvərliyə görə minnətdarlığını ifadə etdi. Bu, diplomatik münasibətlərdə qarşılıqlı hörmət və səmimiyyətin nə qədər vacib olduğunu bir daha nümayiş etdirir. Hazırda Azərbaycan və Slovakiya arasında əməkdaşlıq yalnız siyasi dialoqla məhdudlaşmır. İqtisadiyyat, energetika, nəqliyyat, müdafiə sənayesi, innovasiya, rəqəmsallaşma və humanitar sahələrdə həyata keçirilən birgə fəaliyyət münasibətlərin hərtərəfli inkişaf etdiyini göstərir. Prezident İlham Əliyevin nümayəndə heyətlərinin geniş tərkibdə görüşlər keçirməsini xüsusi qeyd etməsi də diqqətəlayiq məqam idi. Bu, əməkdaşlığın artıq sistemli və institusional xarakter daşıdığını nümayiş etdirir. Müxtəlif dövlət qurumları və şirkətlər arasında qurulan əlaqələr münasibətlərin davamlı inkişafına xidmət edir. Ən önəmlisi isə odur ki, bu əməkdaşlıq konkret nəticələrə yönəlib və praktiki layihələrlə müşayiət olunur. Azərbaycan bütün tərəfdaşlıqlarda real nəticələr əldə edilməsini əsas prinsip kimi qəbul edir.

Namiq Əhmədov

YAP Xəzər rayon təşkilatının sədri

Paylaş:

Baxılıb: 473 dəfə